Aloma 11 - UPANGANO UPYA

Asi Islaeli yoshi yatenkelwa kumbali

¹ Ichino, ndutondosya: Chene! Leesa wayasumbila antu yaakwe ukutali? Mwiko ta! Kuno nene kwene ne mwIslaeli umwi apa mpanda wi Ablaamu, untu wa luko lwi Benyamini.

² Leesa atayasumbile ukutali antu yaakwe, yano wamanyile ukufuma kali. Nanti mutamanyile yano yavwanzilwe um-Maandiko pali Eliya? Vino alutaka aIslaeli pali Leesa?

³ “Mwene, yumola malau yako, yapomola altale zyako; nene nasyala nenga, nga yalusita umweso wane.”

⁴ Leelo Leesa wannenile uli? “Nausyila antu myanda amakumi saba, yano yatalufukamila pali Baali.”

⁵ Ifino chili na li kwene, kuli yano yasyala yano yasololwa uku nkumbu.

⁶ Leelo ndi uku nkumbu, kusi ku milimo kaili; ndi wino chili inkumbu zitali ziwe inkumbu.

⁷ Nga chili uli fwandi? Chintu chino aIslaeli yasitanga, yatachiwine, leelo yano yasolwilwe yachizana, na anina yakoma imyenzo.

⁸ Ndi fino chaandikwe: “Leesa wayapile umweso wa tulo, maaso yatachilola na makutwi yatachipulika, fika nu wanda wilelo.”

⁹ Na Daudi aluvwanga, ukuti: “Vimulo vyao viwe ichitembo nu ntyo. Ni chintu cha kuyatukizya na malipilo kwao.

¹⁰ Amanso yao yatelwa ichanda, ukuti yatachilola. Ukainamike intindi zyao manda yoshi.”

¹¹ Ichino ndutondosya vi: Chene! yakumika ichakuti yapone? Mwiko ta! Uku kupona kwao ufyusi waizila uku yakulukuwa, ukuti akola yalole usuwa.

¹² Ichino ngu kupona kwao kukuleta usafi ku yakunsi, nu kuulilwa kwao kwawa usafi ku yantu yakulukuwa, Chene! ukuyana kwao kutaluluta nkani?

Ufyusi wa antu yakulukuwa

¹³ Nduvwanga nemwe mwe yantu yakulukuwa. Chino ndi fino ne untume wa yantu yakulukuwa, ndutensya uomfi wane,

¹⁴ nalimwi nga yatela usuwa yano ayantu ya kumwitu, nu kuyafyusya yamwi pali yeneyo.

¹⁵ Kuno ndi chawa ukusumbwa kwao kwaleta ukupulikana kwa kunzi, Chene! ukusumilisiwa kwao kungawa ichani nda su upuma pa chisila cha kufwa?

¹⁶ Kaili fisêke vya ntomolo ndi vyawa iviswepe, chili chimwi ni chiulungwa kwene. Ni sinda ndi lyawa iswepe, ifino na matai kwene.

¹⁷ Leelo nga matai yamwi yasôlwa, newe mzeituni wa nchundu wasimpilwe pano yali, uminkana ni sinda lya mzeituni nu kuvunda kwakwe,

¹⁸ utachiutensya apa matai yaakwe! Nanti ngi uluute-nsha, asi wewe usensile isinda, leelo isinda ilino likusensile wewe.

¹⁹ Ichino ungati: amatai yalye yasôsilwe kuti nene nsi-mpwe-po.

²⁰ Chili ningo! Yasôlwe uku kuntasumila kwao; newe uwimilile uku usumilo wako. Utaikusha, leelo uope.

²¹ Kuno ndi Leesa atayalolile nkumbu amatai antangulo, atalukulolela nkumbu newe kwene.

²² Ichino lola ukutonta nu kukalipa kwi Leesa: Ukali uli kuli yalye yano yaponile, leelo kuli wewe ukutonta kwi Leesa, ndi wikala um-utonsu; ndi chisi fiyo, newe kwene uluputulwa.

²³ Na yao kwene ngi yatatensi uku kuntazumila kwao, yalusimpwa kaili; kuno Leesa ali na maka kuyasimpa kaili.

²⁴ Kuno ngi wewe, ndi waputulwa waatina apa mzeituni, nao mzeituni wa nchundu ku kafumo kakwe, apano wasimpwa apa mzeituni unsipe, fino chitaile ku kafumo kako, kuluta nkani yalye uku kafumo kao, yalusimpwa apa mzeituni wao akola.

Leesa akasi kufyusha yoshi

²⁵ Kuno, yachane, ntakasi kuti mutachiula ukumanya inkama ii, kuti mutaulola fino mwe ya malango: fino mbalinga utazu wayazana aIslaeli, fika nu kufikilila kwa akulukuwa.

²⁶ Ifino aIslaeli yoshi yalufyuka, ndi fino chaandikwe: “Unkuluzi alwisa ukufuma uku Sioni, alutisha utanduke muli Yakobo.

²⁷ Na u uli Upangano wane nayo, pano nduyaatisisha maifyo yao.”

²⁸ Ichino ku kulondela iswi-sipe yawa asiluembu uku nnandu wino, leelo ku kusololwa yawa yakundikwa uku nnandu wi yatata yitu.

²⁹ Kuno amawila yi Leesa nu kwita kwakwe fitakuwelela.

³⁰ Kuno ndi fino nemwe kwene ilya kali mwa-tandike kuli Leesa, leelo kasalaka mwakumbukilwa uku kutanduka kwao,

³¹ ifino nayo kwene apa kasalaka yatanduka, ukuti ukukumbukilwa kwino, nayo kwene yakumbukilwe.

³² Kuno Leesa wayuminkanya yoshi uku kutanduka, ukuti ayakumbukile yoshi.

³³ Vino zili nukulu insao na mano nu kumanya kwi Leesa, Uputusi waakwe utakufipililwa nanti nsila shaakwe sitangi sisitike!

³⁴ Kuno: “Uwini wino amanyile melengusi ya Mwene? Nanti uwini wino angasôlosha?

³⁵ Nanti uwini wino wampa chimwi intangulo, nawe alulipwa kalli?”

³⁶ Kuno ifintu fyoshi fyafumile kuli wenewe, fili uku maka yaakwe na kaili filusuwila kuno ali. Utensho uli nawe manda ti na ti. Chiwe fiyo kwene.