Aloma 10 - UPANGANO UPYA

¹ Yachane, kusita kwa mweso wane, na kulomba kwane kuli Leesa, uku nnandu wa kuti yafyusiwe.

² Kuno nduyimikila fino yali nu nte kuli Leesa, leelo asi ku mano.

³ Kuno, lino yatamanyile ichumi chi Leesa, yalusita kuwika ichumi chao akola, yatatontile vya chumi chi Leesa.

Chumi ku nzila ya usumilo

⁴ Kuno Klisto ali kusila kwa Ntambi, ukuti wensi wino azumila awalilwe ichumi.

⁵ Kuno Mose waandike pa chumi chino chifumile uku Ntambi, fino: Untu wino alemile Ntambi, wamwa nupuma kuli yeneyo.

⁶ Leelo ichumi chino chiluzanwa uku usumilo, chiluti: Utachivwanga um-mweso wako, ukuti: “Uwini wino alukwela ukuya umwiyulu?” kuli kuti: kumwisha Klisto apansi?

⁷ Nanti: “Uwini wino angika ukuya ukwasimu?” kuli kuti: kumkwesha Klisto kufuma ku yafwi.

⁸ Leelo chilutuli? Iswi liyo lili pipi newe, umu nnomo num-mweso wako, kuli kuti, iswi lya kusumila lino tulusunda.

⁹ Kuno ndi wataka Yesu uku nnomo wako fino uMwene, nu kusumila um-mweso wako fino Leesa wamtutulwile uku yafwi, ungafyuka.

¹⁰ Kuno uku mweso untu akuluzumila nu kwalilwa ichumi, nu ku nnomo akulutaka nu kusana ufyusi.

¹¹ Kuno Lyandiko liluti: “Wensi wino ansumile, atalukulwa untwe.”

¹² Kuno kusi ushutane wa mYudea nu mGliki. Kuno wenga ali Mwene wi yoshi, uwa usavi kuli yoshi, yano yalumwita.

¹³ Kuno: wensi wino alwita izina lya Mwene angafyuka.

¹⁴ Leelo yamwite uli wino yatasumile? Na kaili yamsumile uli wino yatalumpulika? Na kaili yampulike uli, ndi kusi kasunda?

¹⁵ Na kaili yangasunda uli, ngi yatatumilwe? Ndi fino chaandikwe: ‘Ichintu nu kuzipa ndi yakasunda yiswi zipe yiza.’

Kuntazumila kwi Islaeli

¹⁶ Leelo asi yoshi yano yapulikisya iswi-sipe liyo. Kuno Isaya atile: “Mwene, uwini wino asumile amaswi yitu?”

¹⁷ Ichino usumilo ukufuma uku kupulika, nu kupulika kukulwisa ukwiswi li Klisto.

¹⁸ Leelo ndutondosha: Chene! Yao yatapulike? Endita, yapulika: “Iswi lyao lyalimba insi yoshi na maswi yao fika ni mpelelekesho ya nsi shoshi.”

¹⁹ Kaili ndutondosha: Chene! aIslaeli yatamanyikishe? Inkolelo Mose wafwasile, ukuti: “Namtelela usuwa uku yantu yano asi antu, nu ku yantu yasi na mano, ndumulakalisha.”

²⁰ Na Isaya uku chiposha, ati: “Nazanilwe na yano yatalunsita, naswelwike kuli yano yataluntondosha.”

²¹ Leelo apa Islaeli ati: “Unsanya wonsi nayatambalulwile makasa yane antu yatanduke na alupaka.”