Akolosai 4 - UPANGANO UPYA

¹ Nemwe yene, yapini azya ino ivya chumi fino chiile, angi mumanyile fino nemwe kwene muli nu Mwene umwiyulu.

² Mukonkowezya nkani ukupepa, muchesya lino mulupepa na kuno angi mulusamalizya.

³ Angi mulutulombela neswe kwene, ukuti Leesa atuyulile unnyango kwiswi lyaakwe, tulande amelengwe yi Klisto, yano nanyepelwa-ko.

⁴ Ukuti njaswelule ndi fino chindungime ukuvwanga.

⁵ Mupitae uku mano kuli yao aya kunzi, ukuti muombele amanda yao ningo.

⁶ Amaswi ino yawe aya nkumbu manda yoshi, yano yachemekwa unsilya; mumanye fino chimulungime ukunena chila ntu.

Amaswi ya kumalila

⁷ Tikiko uwachane nkundikwa, umuofi wa kutailwa, umuofi ponga nene um-Mwene, alumumanyisya amikalo yane yoshi.

⁸ Wino natuma kuno muli uku nnandu wa ifintu fiyo kwene, kuti mumanye amikalo yitu, amuteke imyenzo ino.

⁹ Ponga na Onesimo, uwachitu uwa kutailwa unkundikwa, untu wa kumwino. Ayano yalumumanyisya ifintu vyonsi vya kuno tuli.

¹⁰ Alistako unnyepwa ponga nene alumulaula, na Malko nyinalume wi Balanaba, kuli wiyo mwapokelile amaswi; ngi wiza kuno muli, mpokelelini.

¹¹ Na Yesu wino yakuluti i Yusto; yao yatatu sile aYudea, yano yali aomvi ponga nene uku nnandu wa Wene-wi-Leesa, nayo kunondi yantekezya.

¹² Epafla wa kumwino alumulaula, umuofi wi Klisto Yesu, nawe ali nunte manda yoshi uku kumupepela, ukuti mwimilile nanti kutelengana, mukome nkani muli vyonsi fino Leesa akasime.

¹³ Kuno namvwangila fino ali nunte nkani kuno muli, na kuli yao yano yali uku Laodikea, nu ku Ielapoli.

¹⁴ Luka sing'anga nkundikwa, na Dema yalumulaula.

¹⁵ Mulaule achitu yano yali uku Laodikea; na Nimfa ni kanisa lino lili un-ng'anda umwakwe.

¹⁶ Imbaluwa i ngi yasomwa kuno muli, isomwe nu kwi kanisa lya ku Laodikea kwene, na ya ku Laodikea nemwe kwene muisome.

¹⁷ Munene Akipo aombele nkani uomvi uo uno wapiwe um-Mwene, ukuti aufikilizye.

¹⁸ Nene Paulo ndumulaula ukwikasa lyane nenkola. Mutalatila ukunyepwa kwane. Inkumbu siwe ponga nemwe.