Akolosai 3 - UPANGANO UPYA

¹ Ichino ngi mwatutuluka ponga na Klisto, sitangi ivya mwiyulu, kuno Klisto ali, atenzi ukwikasa lilunji ily Leesa.

² Mwelengulae ifintu ivya mwiyulu, asi vya pano api nsi.

³ Kuno mwafwile, nupuma wino wafiswa ponga na Klasto muli Leesa.

⁴ Pano Klisto wacha waloleka, wino ali upiuma witu, apano nemwe kwene muloleke ponga nawe um-ukulu.

IMiele ya kali ni miipya

⁵ Ichino umolini ivyai fino, fino vili un-nsi: upundu, utakati, ukukumbuka iviipe, amelenguzi maipe ni nyengwa ichili chonga nu kupepa imyao.

⁶ Ukali wi Leesa ukulwizila uku ifintu ndi fiyo.

⁷ Nemwe kwene kali mwaviombanga, lino mwatenzi muli vyenevyo.

⁸ Leelo apa kasalaka sumbini ukutali fiyo vyonsi kwene: ichilakali, nukali, nuipe, nu lwambo, ni ntusi um-milomo yino.

⁹ Mutavwangilana ufi; kuno mwati muzula uuntu -wa-kali, ponga ni milimo yaakwe.

¹⁰ Mwazwala uuntu-upya, uno uluchitwa upya, kuti mumanyikisye ningo ukukolana kwakwe wino wamuumvile.

¹¹ Penepo kusi icha mGliki nanti mYudea, ukuchitwa-ichibalu nanti kusi-kuchitwa-ichibalu, umweni nanti umwila, unzya nanti umwana-wa-ng'anda; leelo Klisto ali wensi muli vyonsi.

¹² Ichino fino mwasololwa na Leesa, aswefiwa yano mwakundikwa, muwe nu mweso wa nkumbu, wa untu, wa kuuchefya, wa kuvyalika, wa chelelezi.

¹³ Mutekelelane nu kwelelana, ngi umwi ali na chino angasumbikila unji; ndi fino uMwene wamwelela mwemwe, nemwe kwene muchite.

¹⁴ Ukuluta apa ifintu fiyo vyonsi, muwe nu ulukundo, kuno lukululemanya ningo ifintu vyonsi.

¹⁵ Nutekezyo wi Klisto wangalile imyenzo ino, uno mwitilwe uku mwili onga; na kaili muwe yantu ya nsamalizyo.

¹⁶ Iswi li Klisto livulisye nu kwikala muno muli; uku mano yoshi musambilizyanye nu kusundana uku Sabuli ni myimbo ni ntensyo-zyamweso, angi mululundila Leesa um-myenzo ino ku nsamalizyo.

¹⁷ Na chonsi chino mungaomba ukwiswi nanti unnimo, muombe vyonsi umwizina lya Mwene Yesu, angi mulusamalizya Leesa Tata kuli Wenewe.

Miele ya aklisto um-mang'anda

¹⁸ Mwe yanachi muchindike yawino, ndi fino chisifile apa Mwene.

¹⁹ Mwe yoshi, mukunde achi ino, mutayatuwa.

²⁰ Nemwe yanche, muchindike avyazi ino uku ifintu vyonsi, kuno ichintu chi chazipa apa Mwene.

²¹ Nemwe yatata mutachisonka ana yino, kuti yaatize yakatale.

²² Mwe yazya, muchindike yao yano uku mwili aene ino uku ifintu vyonsi, kusi ku uzya wa ku maaso, ndi fino yakuluupapatisha uku antu, leelo uku utekezu wa mweso nu kuchindika uMwene.

²³ Chonsi chino muluomba, muchiomba ukumweeso na pe, fino uku Mwene, kusi ku yantu.

²⁴ Mumanye fino mulupokelela uku Mwene unnambu wa upyani. Muombele uMwene Klisto.

²⁵ Kuno wino aluchita iviipe, alupokelela iviipe vya uipe wakwe, ndi fino wachisile, kuno kusi usolozi.