Akolosai 2 - UPANGANO UPYA

¹ Kuno ndusita mumanye fino unte wane uli kuno muli, na kuli yalye aya ku Laodikea, na kuli yano yatatana yandola uku maaso.

² Kuti yasungulwe imyenzo yao, yuminkanywe undukundo, yapate usafi onsi uwa kumanyikisha, kuti yamanye ningo amelengwe yi Leesa, yano ali Klisto,

³ wino muli Wenewe usafi wonsi uwa mano nu kumanya fyafisama.

⁴ Nafwanga iswi li, umwi atiza musoshe uku maswi ya kumutentemba.

⁵ Kuno nanti um-mwili wane nsi ponga nemwe, leelo um-mweso wane ndipo ponga nemwe, duchiimba ukulola ukusifya kwino nu kushuyansha kwa kusumila kwino muli Klisto.

Amano Amatalamane

⁶ Ichino fino mwapokelile Klisto Yesu, Mwene, mupitae fiyo kwene muli Wenewe.

⁷ Muwe misisi yi sinda, mukulwe muli Wenewe, wamukomya uku kusumila, ndi fino mwasambiliziwe, angi mulusamalisha.

⁸ Mulole umwi atamuchita uzya uku mano yaakwe aya chaka chaka nu kuzosya kutupu, ndi fino antu yakululema intambi ya yanji, na masambilisho ya nsi fuma kali, nga asi ndi fino kuli Klisto.

⁹ Kuno muli Wenewe muli ukuzyula kwi Leesa konsi uku mwili.

¹⁰ Nemwe mwazyula muli wenewe, wino alu ntwe wa ukulu onsi na maka.

¹¹ Muli wenewe mwachitwa ichibalu chino chitakuchitwa uku makasa, uku kuzula umwili-wa-untu uku kuchitwa ichibalu na Klisto,

¹² mwashikwa nawe uku lubatizyo. Na muli wenewe mwatutululwa ponga nawe, uku kuzumila amaka yi Leesa, wino wamtutulwile uku yafwi.

¹³ Nemwe pano mwalile mwafwa uku nnandu wa maifyo yino, nu kuntachitwa ichibalu uku myili ino, wamuchisile muwa ponga nawe, pano watwelela amaifyo yoshi.

¹⁴ Pano wazimya ichimanyisyo chilye, chino chaandikwa amaswi ya kutusongelela uku uputuzi waakwe uwa milandu, chino chali uanisi kuli sweswe; wachitisya chitachiloleka kaili, wachikonkomela apa nsalaba.

¹⁵ Apano wazula a maka nakulu na maka yao, wayalanga apatiswe fino yali cha nsoni, ayachimvya.

Uwelewele wa masunde matume na antu

¹⁶ Ichino umwi atamuputwila imilandu uku vyakulya, nanti ivyakunwa, nanti uku uwanda ikulu, nanti ndoleka ya mwezi, nanti sabato.

¹⁷ Ifintu fiyo ichisao sile cha ifintu fino vilwiza, leelo ichintu chikola i Klisto.

¹⁸ Umwi atamupoka ichilambu chino, uku kuuchefya kwa kukunda kwakwe unkola nu kupepa yamalaika, angi aluutela um-malele yaakwe, nu kuitensya chaka uku mano yaakwe aya untu.

¹⁹ Nga atalemile uNtwe, uno kuli weneo umwili onsi wapiwa nu kuwa ichili chonga uku vyai ni mikole, vikule kuli Leesa.

²⁰ Ichino ngi mwafwa ponga na Klisto, mwakululwa kufuma ku maka ya ulâsi wa viwa kuno ukunzi, uku chani kaili ukuwingizya un-vilangaso ungati muchili ya kuno ukinzi:

²¹ Mutachilema nanti ukusonka nanti ukwemya.

²² Ifintu vi vyonsi vilusila apa kuviombela na kuno mulondile amaswi mavinde na masambilizyo ya antu?

²³ Ifintu vi viluloleka ungati ivya mano, unkupepa kuno mwaivindila mwe akola, nu kuuchefya nu ku kuulâsa umwili uku ukali, nga vitaomvile chimwi, uku kuchingila itama zya mwli.