Akolosai 1 - UPANGANO UPYA

¹ Paulo untume wi Klisto Yesu uku kukunda kwi Leesa, na Timoteo uwachitu,

² uku aswefiwa, achitu yano yazumila muli Klisto, yano yali uku Kolosai. Inkumbu ziwe kuno muli nu welezyo fino vifumile kuli Leesa Tata witu.

Ipepo lya nsamalisho

³ Tulusamalizya Leesa, Tata wa Mwene witu Yesu Klisto, manda yoshi, pano tulumulombela.

⁴ Fuma lino twapulike ukuzumila kwino muli Klisto Yesu, nu lukundo luno muli nalo uku aswefiwa yoshi,

⁵ uku kutaila kwino kuno mwawikilwa umwiyulu. Kuno mwapulike kali amaswi yaakwe umwiswi-zipe lya chumi,

⁶ lino lizile kuno muli; Ndi fino lili un-nsi yoshi, nu kusêka ivisêke nu kukula, ndi fino lilukula kuno muli kwene, fuma uwanda uno mwapulike nu kuzimanyikisya nkani inkumbu zyi Leesa un-chumi.

⁷ Ndi fino mwasambiliziwa na Epafla umuofi nachitu un-kundikwa, umuofi uwa kutailwa uwi Klisto kuno muli.

⁸ Nawe watulandile ulukundo lwino lwa muli Mweso.

⁹ Ichino neswe fuma uwanda uno twapulike, tutatile ukulomba Leesa nu kumpapata kuno muli, kuti muzyule amano ya kukunda kwakwe; uku mano yoshi nu kumanya kwa mweso,

¹⁰ mupitae ndi fino chimuile uku Mwene, munzipile nkani, musêke ivisêke uku nnimo onsi unzipe, mulusye nkani ukumanyikisya kuli Leesa.

¹¹ Mukome uku maka yoshi ukulingana na maka ya ukulu wakwe, ukuti mutekele uku ifintu vyonsi ni chelelezi; ponga nu kuchimba,

¹² angi mulusamalizya Tata, wino wamuyanya ukupokelela upyani uwa aswefiwa um-mwengelela.

¹³ Nawe watutuzile um-maka ya chanda, atusamya nu kutwingizya um-wene wa Mwana wa lukundo lwakwe.

¹⁴ Wino muli wenewe tuli nukuluzi, uli ukwelelwa amaifyo.

Klisto nu ndimo waakwe

¹⁵ Wene akoline na Leesa wino atakuloleka, uwiyele uku vilengwa vyonsi.

¹⁶ Kuno muli Wenewe ifintu vyonsi vyaumvilwe, fino vili umwiyulu na fino vili kuno ukunzi, fino viluloleka na fino vitakuloleka, ngi ivisumbi vya wene, nanti ukulu, nanti ulâsi, nanti amaka; ifintu vyonsi vyaumvilwe nawe, na kuli wenewe.

¹⁷ Nawe waliko inkolelo ya ifintu vyonsi, ni ifintu vyonsi vilemine muli wenewe.

¹⁸ Nawe alu untwe wa mwili, ukuli kuti, uwi kanisa. Ali wa ntangulo, uwiyele ukufuma uku yaafwa, ukuti akolelele ifintu vyonsi.

¹⁹ Kuno muli Wenewe chazifile ukuyanya konsi kuweko.

²⁰ Na kuli Wenewe wapulikinye ifintu vyonsi, pano wachita uwelezyo uku wazi wa nsalaba wakwe, kuli wenewe, ngi ifintu fino vili kuno ukunzi nanti umwiyulu.

²¹ Nemwe kwene, yano kali mwalile mwapaluka, na kaili yasiluembu um-myenzo ino uku milimo ino imiipe, leelo apa kasalaka watamupulikanya,

²² uku mwili waakwe uwa untu, uku kufwa kwakwe, ukuti amulete mwemwe panali yano mwaswepa, yano musi nu ui nanti kutakilwa iviipe.

²³ Angi mukônkile usumilo angi muwisilwe pa chiimbili, nu kwimilila, ngi mutasenwilwe nu kuta utailo wiswi-zipe lino mwapulika, lino lyasundwa uku vilengwa vyonsi, fino vili kuno ukunzi, lino nene Paulo nawa umuofi.

Undimo na machulo yi Paulo

²⁴ Na kasalaka nduchimbila um-machulo yano ndi nayo ku nnandu wino; na kaili ndufikilizya um-mwili wane amachulo yi Klisto yano yasyala, uku nnandu wa mwili wakwe, uli ikongani lyaakwe.

²⁵ Nachitwa umuofi wakwe, ukuyana nu wangalizi wi Leesa, uno napilwe uku nzano wino, nfikilizye iswi li Leesa.

²⁶ Amelengwe yano wafisile fuma kali na kali uku yantu yoshi, leelo apa kasalaka walanga uku aswefiwa yaakwe.

²⁷ Yano Leesa wakasime ukuyamanyisya usafi wa ukulu wa melengwe ya uku yakulukuwa: nawe i Klisto ali muno muli, utailo wa ukulu.

²⁸ Wino sweswe tulusunda amaswi yaakwe, nu kusokesha chila untu nu kusambilisha chila ntu uku mano yoshi, ukuti tuletele ntu wensi ukuwa wa kapanga muli Klisto.

²⁹ Nene nduuchuzya ukwiswi liyo kwene, nu kulemasha ukulingana nu kuomba kwakwe, wino aluomba unnimo uku maka munondi.