Afilipi 4 - UPANGANO UPYA

Kusokesha

¹ Ichino yachane yakundikwa, namulûkila, mwemwe muli ukuchimba kwane ni nkata yane, ichino mwimisye ningoum-Mwene, yakunde yane.

² Ndusunda Eodia, ndusunda na Sintike, yawe numweeso onga um-Mwene.

³ Endita, ndupapata newe kwene, wachane wa kutailwa, uyazwe anachi yao; kuno yalwilile ponga nene umwiswi-zipe na Klementi kwene, na yalye anji yano yaomvile unnimo ponga nene, yano amazina yao yali un-chitabu cha upuma.

⁴ Chimbaini um-Mwene manda yoshi; kaili nduti: Chimbaini.

⁵ Ukuvyalika kwino kumanyike nantu yoshi. uMwene ali pipi.

⁶ Mutachi chulila iswi limwi; leelo muli chili iswi uku kusalika nu kupepa ponga nu kusamalisha, fino mulusita vimanyike na Leesa.

⁷ Nu welesho wi Leesa uno ulusile amano yoshi, ulusunga imyenso yino na melengusi ino muli Klisto Yesu.

⁸ Apa chisila yachane, ifintu vyonsi fya chumi, vyonsi ivya nchinzi, vyonsi ivya kapanga, vyonsi ivya ningo, vyonsi fino vingakundikwa, vyonsi fino vilutensiwa ningo, ngi kungawa uku vyalika konsi, ngi kungawa ukutensiwa konsi kwene, mwelengule ningo uku ifintu fiyo.

⁹ Ifintu fino mwasambilile kuli nene nu kuvipokelela, nu kuvipulika nu kuvilola kuli nene, mumviomba; na Leesa wa utekezyo wamwanga ponga nemwe.

Nsamalisho shi Paulo uku yaFilipi

¹⁰ Nduchimba nkani um-Mwene, kuno li kwene kaili imuwezya amelenguzi yino kuli nene, ndi fino mwangelengulanga fino ndi, leelo mutawine uwasa.

¹¹ Asi kuti nduvwanga vi kuno ndusita chimwi; kuno nasambilila ukuu kondela ni ifintu vyonsi fino ndi navyo.

¹² Manyile ukuulilwa, na kaili namanya ukuvulilwa; um-miele yoshi nu umifintu vyonsi nasambiliziwa ukwikuta nu kulola inzala, ukuwa ni vivuzu nu kuulilwa.

¹³ Ngachita ifintu vyonsi muli Wenewe wino alumpa amaka.

¹⁴ Leelo mwachisile ningo, pano muminkine nene um-machulo yane.

¹⁵ Nemwe kwene, mwe yakola mumanyile, mwe yaFilipi, fino apa ntangulo yiswi-zipe, pano nafumile uku Masedonia, kutali ikongani limwi, lino lyuminkine nene um-maswi ya aya kufima nu kupokela, siku mwemwe sile.

¹⁶ Kuno nu ku Tesalonike kwene mwandetile uwazwilizyo wino, ndi fino nasitanga, ilisi ndi lyonga.

¹⁷ Asi kuti ndukumbuka uwila uo, leelo ndusita ivisêke fino vyaongelezeke nu kuvula.

¹⁸ Leelo apa kasalaka ndi ni ifintu vyonsi nu kuluta; na kaili nazuziliziwa nkani, napokelela ukwikasa lyi Epaflodito ifintu fino vyafumile kuno muli, unnunkililo wa wila uno wazumilwa, uzipile Leesa.

¹⁹ Na Leesa wane alumupa vyonsi fino mulusita ukuyana nu usavi wakwe, umu ukulu, muli Klisto Yesu.

²⁰ Li kwene atensiwe Leesa, Tata witu, manda ti na ti. Chiwe fiyo kwene!

Kati luumi

²¹ Mundawile aswefiwa yoshi muli Klisto Yesu. Achane yano yali ponga nene yalumulaula.

²² Aswefiwa yoshi yalumulaula, na nkani yano yali un-ng'anda mwi Kaisali.

²³ Inkumbu zya Mwene Yesu Klisto siwe ponga ni myenso yiino.