Afilipi 2 - UPANGANO UPYA

Kuuchefya kwi Klisto

¹ Ichino ndi kwawa ukusungulana muli Klisto, ndi kwawa utekezyo wonsi wa lukundo, ndi kwawa uminkano wonsi uwi Mweso, ndi ziwa inkumbu zyonsi nu kukumbukilwa

² nfikilishini kuchimba kwane, uku kuwa numweeso onga, wa lukundo luli longa, na melenguzi ali yonga, nu kusita ichili chonga.

³ Mutachi chita chimwi cha kuikunda nanti ku kuivuna; leelo uku kuichefya chila ntu alole unnina fino untu ukuluta unkola.

⁴ Chila ntu atachi lokolesya ifintu fyaakwe unkola, leelo chila ntu alolelange ifintu vya yanina kwene.

⁵ Muwe numweeso uo, uno walimo muli Klisto Yesu.

⁶ Wino wali um-mwata wi Leesa, wene atawine ukuwa wi Leesa, fino ichintu cha kulemantila.

⁷ Leelo unkola wauzula umwata wa uleza, wauzwika um-mwata wa umuofi, waukolanya na antu.

⁸ Na kaili pano walolike ali um-mwata wa ntu, wauchefizye, wazumile fika na pa kufwa, infwa ya pa nsalaba.

⁹ Ichino kaili Leesa wamkuzizye nkani, wampa izina lilye lino lilusile amazina yoshi.

¹⁰ Ukuti ukwizina li Yesu amakokola yoshi yafukame, aya ifintu vya mwiyulu ni vya pansi, ni vya kwazimu.

¹¹ Ni ndumi zyonsi zitake fino Yesu Klisto uMwene, uku utensyo wi Leesa Tata.

¹² Ichino yakundikwa yane, ndi fino mwatontile amanda yoshi, asi lino nene nalipo sile, leelo na li kwene mulusye nkani na pano nene nsipo, chulilini ufyusi wino mwe yakola uku chopo nu kutetema,

¹³ kuno Leesa uli akaomba milimo muli mwemwe, ukusita kwino nu kuomba kwino, akufikilizye fino akasi.

¹⁴ Muchite ifintu vyonsi nanti kung'wing'wintika nanti kutavyanya.

¹⁵ Kuti muwe yana yi Leesa yano yataluvwangilwa iviipe, aya kapanga, yasi ni ndema njipe, apa mpanda uipe uno watûkana, yano pali yeneyo mululoleka mwawa wa myengelela yansi,

¹⁶ ngi mwalema iswi lya upuma; kuti imbwe na chimwi cha kulolela ukulu apa wanda wi Klisto, fino ntitukanga chaka nanti kwamala sile.

¹⁷ Nanti nitululwa wa vipelo nu kupepa kwa usumilo wino, nduchimba, na kaili nduchimba ponga nemwe mwensi.

¹⁸ Ifino nemwe kwene chimbangi, kaili chimbangini ponga nene.

Timoteo na Epaflodito

¹⁹ Leelo ntaile um-Mwene Yesu ukutuma Timoteo, awize kuno muli zuwa, antekemweeso, pano nama nya fino muli.

²⁰ Kuno ntakwite untu unji, wino ali numweeso wonga nene, wino angamulangamweeso ningo.

²¹ Kuno yoshi yalusita ivyao akola sile, ivisi vyi Klisto Yesu.

²² Leelo mumanyile kutailwa kwakwe, fino waomba ponga nene uku nnandu wiswi-zipe ndi fino mwana nisi.

²³ Ichino ntaile ukumtuma wiyo zuwa, pano nacha namanya ngi chiluwa uli kunondi.

²⁴ Nene kwene ntaile um-Mwene, fino nasya ngize zuwa.

²⁵ Leelo nawine chiile, uku tuma Epaflodito kuli mwemwe, uwachane nu momvi ponga nene, unsalifi ponga nene, kaili untumi wino, umuofi wa kungazwa um-ifintu fino nasitanga.

²⁶ Kuno wali ni chilûka kuli mwemwe mwensi; akungumala nkani kuno mwapulika fino unnwale.

²⁷ Kuno mwenemo walwalisye, wasyalilile pipi nu kuiwa; leelo Leesa wannolile inkumbu; nga asi wenewe sile, leelo ponga nene kwene, kuti ntawa na malanda un-kalanda.

²⁸ Ichino nachita amaka ukumtuma zuwa, kuti mulolane nu kuchimba, nene amalanda yachepe.

²⁹ Ichino mpokelelini um-Mwene uku kuchimba konsi, munnola antu ndi wi fino antu ya kuchindikwa.

³⁰ Kuno uku ndandu wa milimo yi Klisto wasyalilile pipi nu kufwa, ataulangile umweso wakwe; kuti afikilizye fino vyaula um-milimo yino kunondi.