Aefeso 5 - UPANGANO UPYA

Kusokesha

¹ Ichino londelini Leesa wa yana yano yakundikwa,

² mupitae undukundo, ndi fino Klisto nawe wamukunda mwemwe, na kaili waufimile uku nnandu witu ukuwa uwila ni chipelo kuli Leesa, ukuwa ununkilo wa manukato.

³ Leelo upundu utachitakwa kuno muli nanti uche, nanti ivya chinyai vyonsi nanti ukukumbuka, ndi fino chiile aswefiwa.

⁴ Nanti nsoni na maswi ya kupundililwa nanti ulupaka, yao yatazifile, nkambi ukusamalizya.

⁵ Kuno iswi li mulimanyile ningo, fino kusi umpundu nanti untakati nu walozu ali kapepa wa myao wino angawa nu upyani um-wene wi Klisto na Leesa.

⁶ Umwi atachimuzosya uku maswi ya uwelewele; kuno kuli vyenevyo ukali wi Leesa ukulwizila ana ya misalula.

⁷ Ichino mutachuminkana nayo.

⁸ Kuno kali mwemwi mwali un-chanda, leelo li kwene mwamwa mwengelela um-Mwene; mu pitange wa ana ya mwengelela.

⁹ Kuno ichisêke cha mwengelela uvyalike onsi ni chumi cha kapanga ni vya mpomvu.

¹⁰ Angi mulumanyikisya ngi chani chino chingazipila uMwene.

¹¹ Mutachuminkanya um-milimo iya chanda ino italusêka, leelo muikalipile.

¹² Kuno fino viluombeka kuno yali uku mbali, ivya nsoni nu kuvilanda.

¹³ Leelo vyonsi fino vyakalipilwa, vikuluswelulwa nu mwengelela, kuno chonsi chino chasweluka chili apaswe.

¹⁴ Ichino aluvwanga, ati: “Lanka we wino alupunila. Uzyuke nnjafwi na Klisto wamkukosesha!”

¹⁵ Ichino mulole ningo fino mulupita uli, asi wa antu yano yasi na mano, leelo wa antu ya mano.

¹⁶ Angi mulufyusya makati, kuno amanda ya aipe.

¹⁷ Ichino mutachiwa yapupani, leelo mumanyikisye ngi chani chino chazipa uku Mwene.

¹⁸ Kaili mutachikoleka isute, muno muli uonzo, leelo muzyule uMweeso,

¹⁹ angi muluvwanzyanya uku Sabuli ni Ntensyo ni Myimbo zyamweeso, angi mululunda nu kuchimbila Mwene um-myeso ino.

²⁰ Nu kusamalizya Leesa Tata manda yoshi uku ifintu vyonsi, umwizina lya Mwene witu Yesu Klisto.

²¹ Mutontelane un-chopo chi Klisto.

Miele ya aklisto um-mang'anda

²² Mwe yanachi, muchindike ya wino, ndi fino muchindike uMwene.

²³ Kuno umonsi untwe wa nchi, ndi fino na Klisto nawe untwe wi kanisa; nawe Unkuluzi wa mwili.

²⁴ Leelo ndi fino ikongani lyachindika Klisto, ifino na anachi yachindike yaiya um-fintu fyonsi.

²⁵ Mwe yoshi, mukunde achi ino, fino na Klisto nawe wakunda ikongani nu kuufima uku nnandu wi lyenelyo

²⁶ Ukuti aliswefye nu kulifula na amansi umwiswi,

²⁷ ukuti autolele ikongani lya ukulu ilisi ni lyala nanti mikunya nanti chimwi ichikoline na fiyo, leelo lino lyaswefiwa ilisi ni ndema imwi.

²⁸ Fiyo kwene ifino chiile ayoshi nayo kwene yakunde achi yao, wa mwili wao akola. Wino wakunda unchi, waikunda unkola.

²⁹ Kuno kusi untu nanti umwi wino watuwa umwili wakwe nanti pamwi, leelo akuulyisya nu kuusunga, ndi fino na Klisto kwene aluombela ikongani.

³⁰ Kuno sweswe fyai vya mwili wakwe.

³¹ Ichino untu alusya isi na nyina nu kulemana nunchi, na yao yaili yaluwa umwili onga.

³² Melengwe ya amakulu, leelo nemwi ndulanda amaswi ya pali Klisto ni ikongani.

³³ Leelo nemwe kwene chila ntu akunde unchi ndi fino waikunda unkola, nunchi ataula unchinzi kuli iya.