Aefeso 4 - UPANGANO UPYA

Mwito wi Leesa ukuwa ichilichonga

¹ Ichino ndumupapata, nemwi ne nnyepwa um-Mwene, imiele ino iwe ndi fino mwisilwe.

² Uku kuuchefya konsi nu kuvyalika ni cheleleshi, nu kutontelana undukundo,

³ Mulemasha ukusunga uuminkano wa Mweso un-chinyepelo cha uwelesho.

⁴ uMwili onga nu Mweso wenga, ndi fino mwisilwe um-utailo onga uwa lwito lwino.

⁵ uMwene uli wenga, usumilo uli onga, nu lubatisho luli longa.

⁶ Leesa uli wenga, nawe Isi wa yantu yoshi, wino ali apiyulu ya antu yoshi, na kuli yoshi, nu nkasi muli yoshi.

⁷ Leelo chila ntu pali sweswe wapiwa inkumbu, ukuyana ni chilingilo cha wila wi Klisto.

⁸ Ichaleka chitile: “Pana wakwezile umwiyulu, awalem azya; apa antu amawila.”

⁹ Ichino iswi liyo: Wakwezile, alikuti chani, ngi kusi kuti wene wino wikile aya ni nsansa zya pansi izya nsi?

¹⁰ Nawe wino wikile, ali wino wakwezilwe umwiyulu nkani, ukuluta piyulu ponsi ukuti azuzye ifintu vyonsi.

¹¹ Nawe wapile yamwi yawe imitume na yamwi yawe akalauzya na yamwi yawe aInjilisti, na yamwi yawe achemi na yakasambilizya,

¹² uku kukomya aswefiwa, kuti unnimo uombeke, nu mwili wi Klisto ukulwe.

¹³ Fika na lino neswe twacha twafikilila uuminkano wa usumilo nu kummanyikisya nkani uMwana wi Leesa, fika nu kuwa ntu wino aile, nu kufikilila uku ukulu wa chimo cha kuzyula kwi Klisto,

¹⁴ kuti tutawa ana acheche kaili nu kusumbwa kuo na kuo, nu kusendwa nunza wonsi uwa masambilizyo ya antu, yano yalusenoka-senoka, uku uchenjezu wao, nu kulondela inzila zya mazosyo.

¹⁵ Leelo tuleme ichumi uku lukundo nu kukula, tufike muli Wenewe kuli vyonsi, wino ali untwe, Klisto.

¹⁶ Muli wenewe umwili wonsi ulimbikana nu kulemana ukukwazwana kwa vyai vyonsi, ukuyana nu kuomba kwa chila chai chonga chonga vikulukuzya umwili undukundo.

Miele mipya muli Yesu

¹⁷ Ichino nduvwanga iswi li na kaili ndwimikila um-Mwene, ukufuma li kwene imiele ino itawa wa antu yakulukuwa, umu uwelewele wa melenguzi yao.

¹⁸ Yano mano yao yatelwa ichanda, nayo yatanywa nupuma wi Leesa, uku nnandu wa kuntamanya kwao, nu kukoma kwa myeso yao.

¹⁹ Yano ngi yafwa ichashi, yaluutela um-ifintu vya unyamvi, kuti yachite utakati wonsi wonsi uku kukumbuka.

²⁰ Leelo mwemwi asi fiyo: fino mwasambilile Klisto,

²¹ ali ngi mwapulika nu kusambilishiwa muli Wenewe, ndi fino ichumi chili muli Klisto,

²² musule imiele ino iya ntangulo iya untu wa kali, yino ikulononeka uku kulondela itama zino zili na mazosyo,

²³ muchitwe upya um-melenguzi ya myenzo ino.

²⁴ Muzwale uuntu upya uno waumvilwe ukoline na Leesa, uku chumi nu swefu wa kapanga.

²⁵ Ichino zulini ufi, muvwangilane ichumi cnia ntu uku ya mwipamba, kuno sweswe vyai, chila wenga ichai cha yanina.

²⁶ Muwe ni chilakali, leelo mutaifya. Ilanzi litasyutukila nukali wino angi uchili umuputuke.

²⁷ Nanti ukupa Chiwa apa kwikala.

²⁸ Umwivi atachiya kaili, leelo chiile achite amaka, aombe unnimo unzipe uku makasa yakwe unkola, kuti awe ni ifintu vya kupa wino aulilwe.

²⁹ Iswi lyonsi iipe litachifuma um-milomo ino, nkambi lino lyazipa lino lingakuzya wino alusita, ukuti lizipile yano yalulipulika.

³⁰ Mutachisusuwalika Mweso Nswefu uwi Leesa, wino kuli wenewe mwatelwa akamanyililo kufika nu wanda wa ukuluzi.

³¹ Chilakali chonsi na kafundo nukali, nu lwambo ni ntusi, vitine kuno muli, ponga nuipe onsi.

³² Kaili mwazwilizyane mwe yakola na akola, aya kukumbukilwa, mwelelane ndi fino na Leesa muli Klisto wamwelela mwemwe.