Aefeso 1 - UPANGANO UPYA

¹ Paulo untume wi Klisto Yesu, uku kukunda kwi Leesa, uku yaswefiwa yano yali uku Efeso, yano yazumila Klisto Yesu:

² Inkumbu siwe kuno muli nu welezyo fino vilufuma kuli Leesa Tata witu nu ku Mwene Yesu Klisto.

Usafi wa asolole

³ Utensyo kuli Leesa, Tata wa Mwene witu Yesu Klisto, wino watupepelile uku upepelelo onsi wa mweso ummwiyulu, muli Klisto.

⁴ Ndi fino watusolwile muli Wenewe intangulo ya kulengwa kwa nsi, ukuti tuwe yaswepe, antu yano yasi ni ndema apa maaso yaakwe undukundo.

⁵ Kuno watusolwile intangulo, ukuti tuwe anakwe uku nsila yi Yesu Klisto, ukuyana nu kukunda kwakwe.

⁶ Utensiwe ukulu wa nkumbu zyaakwe, sino watukumbukila muli wiyo Unkundikwa.

⁷ Muli Wenewe tuli nukuluzi uku wasi wakwe, ukwelelwa kwa maifyo, ukuyana nu kuvula kwa nkumbu zyaakwe,

⁸ sino watuvuzizizye um-mano yoshi nu kumanya,

⁹ pano watumanyisya amelengwe ya kukasama kwakwe, ukuyana na fino wakasime unkola, chino wakasi muli Wenewe,

¹⁰ ali kuti, wali uwa kufiomba ifintu fiyo, pano makati yafikilila, ayakuminkanya ifintu fyonsi muli Klisto, ifintu vya mwiyulu ni ifintu vya pansi kwene.

¹¹ Na muli Wenewe sweswe kwene twachisilwe upyani, na kuno twasololwa ukufuma kali ukuyana na fino wakasime unkola. wino akuchita ifintu fyonsi uku kukunda kwakwe.

¹² Neswe tuwe utensyo wa ukulu wakwe, sweswe yano twatangula ukuwikila Klisto utailo witu.

¹³ Nemwe kwene muli Wenewe, mwati mulipulika iswi lya chumi, iswi-zipe ilya ufyusi wino; na kaili mwati mumzumila Wenewe, nu kutelwa akamanyililo ki Mweso Nswefu wilye uwa ulanyo.

¹⁴ Wino ali unnahani wa upyani witu, ukuti alete ukuluzi ku antu yaakwe, nu kuwa utensyo wa ukulu wakwe.

Kupepa kwi Paulo

¹⁵ Ichino nene kwene, fuma lino napulike amaswi ya usumilo wino um-Mwene Yesu, nu lukundo lwino uku yaswefiwa yoshi,

¹⁶ ntatile ukusamalizya uku nnandu wino nu kumwelengula un-sala zyane.

¹⁷ Kuti Leesa wa Mwene witu Yesu Klisto, Tata wa ukulu, amupe mwemwe uMweso wa mano nu wa kuswelulwa, ukummanya unkola.

¹⁸ Amanso ya myenzo yino yatelwe umwengelela; mumanye utailo wa lwito lwakwe, fino uli, nu savi wa ukulu wa upyani waakwe um-yaswefiwa, fino uli.

¹⁹ Nuzipe wa ukulu uwa maka yaakwe muli sweswe yano tuzumile, fino uli, ukuyana nu kuomba kwa maka yaakwe,

²⁰ yano waomvile muli Klisto, pano wamtutulwile uku afwi, amwika ukwikasa lyaakwe ilya kwi lunji um-mikalo ya mwiyulu.

²¹ Piyulu nkani ukuluta uwene onsi, na maka, nukulu, nulâsi, nizina lyonsi lino lyatakwa, asi un-nsi i mpela, leelo na ino ilwiza kwene.

²² Awika ifintu vyonsi apansi apa mulu yaakwe. Amwika awe untwe apiyulu ya ifintu vyonsi, uku nnandu wikongani,

²³ lino uli mwili wakwe, ukuyana kwakwe wino wayanya vyonsi muli fyonsi.