Aeblania 3 - UPANGANO UPYA

Yesu alusile Mose

¹ Ichino yachane yaswefiwa, yano mwisilwe kufuma mwiyulu wi sweswe kwene, mulolekesye nkani Untume na Kapela-nkulu wa usumilo witu, ali Yesu.

² Wino wali uwa kutailwa kuli Wino wainwika uku nnino, ndi fino Mose kwene wali wa kutailwa un-ng'anda yaakwe yoshi.

³ Kuno wiyo walilwa ukulu nkani fino chinjile ukuluta Mose, ndi fino kakula wa ng'anda ali nu nchinsi nkani ukuluta ing'anda.

⁴ Kuno chila ng'anda yakusilwe nu ntu, leelo Kakula wa ifintu fyoshi i Leesa.

⁵ Nga Mose umwenemo wali uwa kutailwa un-ng'anda yaakwe yoshi, wa momfi, awe syuta wa ifintu fino filufwangwa pa chisila.

⁶ Leelo Klisto, wa mwana, apa ng'anda yaakwe. Ni ng'anda yaakwe isweswe, ngi twalema nkani uposye nu kulu wa utailo witu, fika ni chisila.

Mutawela uku chisila

⁷ Ichino ndi fino afwasile Mweso Nswefu, ati: “Ilelo ngi mwapulika iswi lyaakwe,

⁸ mutachikomya imyeso ino, ndikuti amakati ya kulakalisha, uwanda wa kwesiwa undusanga;

⁹ Pano yaso ino yangesishe nu kundinganya; nanti fino yalola imilimo yane imyaka amakumi yani.

¹⁰ Ichino nalakalikile umpanda u, nafwanga, nati: Manda yoshi antu ya yalowana um-myeso yao; yatamanyile insila shane.

¹¹ Ndi fino nalafile uku chilakali chane: yatalwingila un-kupusa kwane!”

¹² Lolini yachane, atachiwa-po umwi pali mwemwe nu mweso uipe nuwa kuntasumila, uku kuutalula kuli Leesa wa upuma.

¹³ Leelo musokeshanae chila wanda, lino kuchili “Ilelo”, ukuti umwi pali mwemwe atakoma umweso uku uchenjesu wi yifyo.

¹⁴ Kuno twati tuminkana na Klisto, ndi twalemasha uku maka intangulo ya utailo witu, fika ni chisila.

¹⁵ Apano chifwansilwe, ukuti: “Ilelo, ngi mwapulika iswi lyaakwe, mutachikomya imyeso ino, ndi kuti amakati ya kulakalisha.”

¹⁶ Kuno ayani yano yalakalisha Leesa, pano yapulike iswi lyaakwe? Asi yalye yoshi yano yafumile uku Misili angi yakolelilwe na Mose?

¹⁷ Kaili aya wini yano yannakalishe um-myaka amakumi yani? Asi yalye yano yononile, yano yalala ifyala fyao un-nusanga?

¹⁸ Kaili ayani yano walapile ukuti: Yatalwingila un-kupusa kwakwe, leelo yalye yano yachisile imisalula?

¹⁹ Ichino twalola fino yatali ingile uku nnandu wa kuntasumila kwao.