Aeblania 2 - UPANGANO UPYA

Ufyusi ukulu

¹ Ichino chitulungime ukulemasha nkani, yao yano twapulika, kuti tutacha tupaluke.

² Kuno ngiswi lilye, lino lyafwansilwe na malaika, lyali na maka, nuipe onsi ni misalula yapiwile amalipilo ya chumi,

³ nganeswe, Chene! tulufyuka uli, ngi twasula ufyusi unkulu ndukuti u? Uno intangulo wafwansilwe nu Mwene, ichisila ukonkomesiwe kuli sweswe na yano yapulike.

⁴ Leesa nawe kwene akulwimikila ponga nayo uku vilangisho ni vipesha-mano na maka tupu na tupu nu ku wankanyo wa Mweso Nswefu, ndi fino wakasime unkola.

Katungulula wa ufyusi.

⁵ Kuno atawisile apansi yi yamalaika insi ilye uno ilwisa, ino tulutaka.

⁶ Leelo untu wenga wimikile kumwi, ukuti: “Untu uli chani, wino umwisukile, nanti mwana-ntu kuti unnange umweso?

⁷ Uku kasimbo kache wanchita unnono ukuluta yamalaika; wanswika inkata ya ukulu nu nchinsi;

⁸ wawika ifintu fyoshi apansi apa mulu yaakwe.” Kuno apa kuwika ifintu fyoshi apansi apa mulu yaakwe, atasile chimwi chino chitawisilwe apa mulu yaakwe. Leelo li kwene tuchili tulole ifintu fyoshi ukuwikwa apa mulu yaakwe.

⁹ Leelo tulunnola Yesu, wino wachisilwe unnono ukuluta yamalaika, uku nnandu wa kuwaya kwa nfwa, ukuti uku nkumbu shi Leesa alola infwa uku nnandu wa ntu wensi, wazwikwa inkata ya ukulu nu nchinsi.

¹⁰ Kuno chanjile Wenewe, wino uku nnandu waakwe na kuli wenewe ifintu fyoshi vilipo, alete ana inji yafikilile ukulu, kuyanya katungulula unkulu wa ufyusi wao uku nsila ya machulo.

¹¹ Kuno wiyo wino aluswefya na yao yano yaluswefiwa, yoshi kwene yafumile kuli wenga. Ichino fiyo atalulola insoni ukuyita anina.

¹² Afwansile, ati: “Nannanda isina lyako apa achane. Apakasi yi kanisa Nankulundila nu kutesha.”

¹³ Na kaili: “Namwa nntaile wenewe.” Na kaili: “Lola Inene ndipo pa kwene na ana yano napilwe na Leesa.”

¹⁴ Kuno ana yao yali ni myili nu wasi, fino nawe kwene watosile mwili, uli onga, ukuti ku nila ya nfwa amonone wino wali na maka ya nfwa, uli Chiwa,

¹⁵ nu kukulula yao yoshi yano yali azya manda yao yoshi, kuno yali ni ngofi sha nfwa.

¹⁶ Kuno umwenemo atalolile yamalaika nkumbu, leelo walolela nkumbu mpanda wi Ablahamu.

¹⁷ Ichino channungime ukukolana na anina um-ifintu fyoshi, kuti awe iKapela-nkulu uwa nkumbu, uwa kutailwa, pa maaso yi Leesa, ukuti awe Kapulikanya uku maifyo ya antu yaakwe.

¹⁸ Angayaswa na yao yano yalwesiwa, kuno nu nkola kwene wachusile pano wesiwe.