Aeblania 13 - UPANGANO UPYA

Fino tungasipila Leesa

¹ Ulukundo lwa achitu mutasasha,

² Mutachilatila ukupokelela ayeni, kuno uku nsila ndi i yamwi yapokelile yamalaika nanti kumanya.

³ Mwelengulae yao yano yanyepwa, kunti mwanyepwa ponga nayo; na yao yano yaluchitilwa ifiipe, ndi fino nemwe kwene fino muli ummyili.

⁴ Kufumalila kuchindikwe na antu yoshi, ni chitala chitachichilwa; kuno apundu ya yano yakunda anachi, Leesa aluyaputwila imilandu fino ayononi.

⁵ Mutachiwa ni ntambi ya kukunda impia, muukondele uni-ifintu fino muli nafyo. Kuno unkola kwene wafwanga ukuti: Ntalukuulilwa nanti uche, nanti ntalukuta nanti uche.

⁶ Ichaleka tulusisimisha nukuti: “uMwene uwino alungaswa, ntalopa. Untu anganchita chani?”

⁷ Muyelengule yakangalila ino yano yamunenile iswi lyi Leesa; kaili lolekesyini nkani kusila kwa miele yao, londelini usumilo wao.

⁸ Yesu Klisto uwiwi kwene iyulu ni leelo na manda ti.

⁹ Mutachikweswa na masambilisho ya misango yinji, iya eni; kuno chisifile umweso ukomiwe uku nkumbu, leelo asi ku fyakulya; yao yano yafilondile yatachili yapate chimwi.

¹⁰ Tuli ni altale yino yalye yano yaombelanga iHema lilye, yatasumilwe ukulya ifintu vyaakwe.

¹¹ Kuno inyama silye sino uwasi wao ukuletwa unkasi apaswefu na Kapela-nkulu uku nnandu wa maifyo, ifyala vyao fyochelelwanga nu kusikisha ukunsi ya nkambi.

¹² Uku nndandu uo Yesu nawe kwene, ukuti aswefye antu uku wazi waakwe unkola, wachusiwe ukunsi ya nsi.

¹³ Ichino tufume tuye kunali ukunsi ya nkambi, angi tusensile imisuli yaakwe.

¹⁴ Kuno alapa tusi nunsi uno utalusila, leelo tulusita ulye uno ulwisa.

¹⁵ Ichino uku nsila yaakwe unkola, tumpe Leesa ichipelo cha utensho manda yoshi, uli ichisêke cha milomo, ino ilutaka isina lyaakwe.

¹⁶ Leelo mutachilatila ukuchita ifisipe nu kwankanya ifintu fyako, kuno amawila ndi yao yakulusipila Leesa.

¹⁷ Muyachindike yakangalila ino nu kuyatontela, kuno yao yakululolela imyeso ino, kumo yalulanda apa milimo yao; yachite fiyo uku kuchimba, leelo asi kukupemela, kuno chitange chimuye mwemwe.

¹⁸ Mutupepelae; kuno tusumile fino tuli nu mweso ntiswe, angi tulusita ukuwa ni miele ya ningo um-ifintu vyonsi.

¹⁹ Nene ndumukonkomesha likani ukuchita fiyo, kwakuti yambweshe suwa kuno muli.

Maswi ya kumalila

²⁰ Leesa wa uwelesho wino wannesile uMwene witu Yesu ukufuma uku yafwi, Unchemi Nkulu uwa nfwele, uku maka ya wasi wa upangano wa manda ti na ti,

²¹ amukomye mwemwe ukuchita fisiipe fyoshi, kuti muchite chino wakasi; nawe angi aluchita muli sweswe lino lisifile apa maaso yaakwe, kuli Yesu Klisto. Ukulu uli nawe manda ti na ti. Chiwe fiyo kwene!

²² Leelo ndumukonkomesha yachane, mutontelane niswi li ilya kusokesha; kuno namwandikila uku maswi mache sile.

²³ Mumanye fino uwachitu Timoteo watasapulwa; wino ngi wisa suwa, ndulolana nemwe pali ponga nawe.

²⁴ Mulaule yakangalila ino yoshi naswefiwa yoshi. Aya mu Italia nayo yalumulaula.

²⁵ Inkumbu siwe nemwe mwensi.