Aeblania 11 - UPANGANO UPYA

Uusumilo

¹ Ichino usumilo ukumanyikisha ifintu fino twataila, ichimanyililo cha ifintu fino fitaluloleka.

² Kuno kuli uo ayikolo yitu yimikilwe.

³ Uku usumilo tumanyile fino iyulu ninsi fyalensilwe ukwiswi lyi Leesa, ni ifintu fino filuloleka fitachisilwe uku ifintu fino fili apatiswe.

⁴ Uku usumilo Abeli wafimile Leesa ichipelo chino chasipa ukulusha Kaini; ichino wimikilwa fino unfumi wa chumi, Leesa wamwimikila amawila yaakwe, ichino, nanti fino wafwa, achili alufwanga.

⁵ Uku usumilo Enoki wasenzilwe atise alole infwa, atachili aloleke, kuno Leesa wamsamishe. Kuno pano achili amsamye, walile wamwimikila fino wasipile Leesa.

⁶ Leelo ndi kusi usumilo, utangi umsipile. Kuno untu wino aluya kuli Leesa, chiine asumile fino wene aliko na fino akuluyapa unnambu yalye yano yakulunsita.

⁷ Uku usumilo Noa, pano Leesa wamsokishe um-maswi ya ifintu fino fichili viloleke, fino walile wachindika Leesa, wapangile isafina, kwa kuti afyushe ing'anda yaakwe. Ichino waputwila aya kuno tikunsi, wawa mpyani wa chumi chino chikusanwa um-usumilo.

⁸ Uku usumilo Ablahamu pano wisilwe, witaile ukutina aye ukunji kulye, kuno alusana upyani, ampita atamanya na kuno aile,

⁹ Uku usumilo wikasile ukuweni un-nsi ilye iya ulanyo, kunti un-nsi ino isi yaakwe, angalwikala umwi hema ponga na Isaka na Yakobo, apyani ponga nawe aya ulanyo uu kwene.

¹⁰ Kuno walolelanga unsi wa viimbili, wino wa welengwile nu kuukula i Leesa.

¹¹ Uku usumilo na Sala kwene wapokelile amaka ya kusenda inda, pano walile wakote, kuno welenginye fino wino walainye uwa kutailwa.

¹² Nu ku ifintu fiyo yafyalwa ku monsi wenga, nawe wali kunti umfwi, antu tupu wa ntanda sha mwiyulu kuvula kwao, na kunti misenga ino ili umbali mbali i yemba, ino itangi isolosiwe.

¹³ Ya yoshi yafwile um-usumilo angi yachili yapokelele malanyo yalye. Leelo yayawine yachili, ukutali nu kuyachimbilila nu kusumila fino yali ayeni na pitansila.

¹⁴ Kuno yao yano yalufwanga amaswi ndi kuti fiyo, yaluloleka apatiswe fino yalusita insi yao akola.

¹⁵ Nga ngi yali yamwelengula insi ino yafumile, yali nu wasa wa kusuwilila.

¹⁶ Leelo li kwene yalukumbuka insi yino yasipisha, uli iya mwiyulu. Ichino fiyo Leesa atalulola insoni ukwitwa i Leesa wao; kuno wayakulila unsi.

¹⁷ Uku usumilo Ablahamu pano wesiwe, wafima Isaka awe ichipelo, na wenewe wino wapokelile malanyo yao, wafimile wino wali mwanakwe umfyalwa wenga.

¹⁸ Endita, wenewe wino wanenilwe ukuti: “Muli Isaka mulufuma uluko,”

¹⁹ angi alwelengula fino Leesa angamtutulula nanti kufuma ukwasimu. Wansana kaili fuma kweneko uku kukolenkana.

²⁰ Uku usumilo Isaka wapepelile Yakobo na Esau, wafwansile kwene ku mbalu sha ifintu fino filuwako inkolelo.

²¹ Uku usumilo Yakobo pano wali pipi nu kufwa, wapepelile ana yi Yosefu, apepa angi asintilile pa nonga ya ntuwa yaakwe.

²² Uku usumilo Yosefu pano walile atapalamila ukufwa kwakwe, watasile amaswi ya kufuma kwa ana ya Islaeli, wakonkomesha uku maswi ya mafupa yaakwe.

²³ Uku usumilo Mose pano wafilwe, wafisilwe imyesi yitatu na fyasi yaakwe, kuno yawine fino umwana wasipa. Nga yatofile isunde lya mwene.

²⁴ Uku usumilo Mose pano wakula, wakana ukwitwa umwana wa mwana-kachi wi Falao.

²⁵ Walola chisifile ukuwa na machulo ponga na antu yi Leesa, kuleka ukuchimba um-maifyo amanda mache.

²⁶ Angi alwala fino ukusulwa kwi Klisto usavi unkulu ukuluta insao sha mu Misili. Kuno walolelanga chilambu.

²⁷ Uku usumilo atina uku Misili nanti kopa chilakali cha mwene; kuno wimisye kunti alunnola wino ataluloleka.

²⁸ Uku usumilo wachisile iPasaka, nu kupaka uwasi, ukuti wilye wino alumola ana aiyele, atachiyemya.

²⁹ Uku usumilo yapisile muli yemba wa Syamu kunti musi mansi; aMisili pano yesishe ukuchita fiyo, yanwele.

³⁰ Uu usumilo ulung'umba lwa Yeliko lwaponile, pano yalulizile amanda saba.

³¹ Uku usumilo Laabu wilye chiselele atafwile ponga na yao yano yalile yatanduka, kuno wapokelile yalye yakachecheta nu kutondokesha ukukuyawelesha.

³² Nene mvwange uli kaili? Kuno kusi uwasa wa kulanda ifya pali Gideoni na Balaka na Samsoni na Yefta na Daudi na Samweli ni fya malau,

³³ yano uku usumilo yaposile ulâsi wa yene, yachisile ivya chumi, yasanile chino Leesa wayalainye, yafumbatika imilomo yi yakalangu.

³⁴ Yasimya maka ya moto; yafyuka uku ukali wa mpanga, yapilwe amaka pano yalile yatonta, yaposishe umwisumo, yawingile amaumba yi yasiluembu.

³⁵ Anachi yapokelile afwi yao yano yatutulwilwe. Yamwi yachusiwe nu kufwa, yakana ukutulwa, kuti yawe nu ututuluko wa mpomfu.

³⁶ Yamwi yesiwanga uku misowe nu kumwa ni fikoti, na yamwi ukunyepwa, nu kutelwa umminyololo.

³⁷ Yatamilwe na mafinga, yalepwilwe ni misumeno, yesiwanga, yumolwanga uku mpanga; yalilokanga angi yaswite iniikwela ya mfwele ni mikwela ya mbusi, yaulilwe, yachusiwanga nu kuchitwa ifiipe,

³⁸ —antu yano ukunsi kutayaile—yalilokanga un-nusanga nu myamba num-machele nun-nsenje.

³⁹ Na antu ya yoshi pano yimikilwa uku nnandu wa usumilo wao, yatapokelile chino chalainywe.

⁴⁰ Kuno Leesa walile watangula ukutuwikila sweswe ichintu chisipe, ukuti ndasi sweswe, yao yatangi yayane.