Aeblania 10 - UPANGANO UPYA

Ichipelo chi Klisto chilusile ifya kali

¹ Ichino Ntambi fino ichisau cha fisipe fino filwisa, leelo asi mwata unkola uwa ifintu fiyo, uku fipelo filye kwene fino yakulufima chila mwaka, inga yafikilisha yano yalupalamila?

² Ali ndi fiyo, fipelo fitangi fisasha ukufimwa, kuno yakapepa ngi yaswefiwa lyonga, yatangi yaulole kaili fino yali ni ifyo?

³ Leelo um-fipelo fiyo muli ukwisukila kwa maifyo chila mwaka,

⁴ kuno uwasi wa ntwasi nu wa mpwata utangi utishe amaifyo.

⁵ Ichino fiyo apa kwisa kwakwe ukusi, aluti: “Ifipelo ni fifimwa utakasi, leelo wambwikile umwili.

⁶ Amawila ya kocha na fino fyafimwa ku maifyo fitakusipile.

⁷ Apano nafwasile ukuti: Lola panondi, un-chitabu chikose umuno naandikilwa, nchite fino ukasime, we Leesa.

⁸ Apa ntangulo avwansile ukuti: Fipelo na mawila ni vyafimwa ukukocha ni fya ku maifyo utavikasime, nga fitakusipile, nanti fino fyafimwa uku kulondela intambi.

⁹ Apano wavwansile, ati: “Lola panondi, nchite fino ukasime. Atisha wamtangulo ukuti awimike uwa uwili.

¹⁰ Un-kukasama kuo twaswefiwa uku kufimwa kwa mwili wi Yesu Klisto, lyonga mpela.

¹¹ Na kapela wensi akulwimilila manda yoshi nu kupepa nu kufima ifipelo filye kwene amaila tupu, fino fitangi fitishe maifyo nanti uche.

¹² Leelo wene wafimile ichipelo chonga uku nndandu wa maifyo, chino chiile manda ti, apano awikala ukwikasa lyi lunji ilyi Leesa,

¹³ fuma liyo alulolela fika na lino yasiluembu yaakwe yaluwikwa yawe ichisumbi apa kuwika makulu yaakwe.

¹⁴ Kuno uku kufima lyonga, wayakomya manda ti yao yano yaluswefiwa.

¹⁵ Mweso Nswefu nawe alutwimikila; kuno ichisila cha kuvwanga ukuti:

¹⁶ “Alau uli Upangano uno nampangana nayo ichisila cha manda yalye,” uMwene afwansile, ati: “Ndutela ifilangaso fyane um-myeso yao, num-melengusi yao nduyaandikila fiyo.

¹⁷ Amaifyo yao nu kutanduka kwao ntaluyelengula kaili nanti uche.”

¹⁸ Ichino ukwelelwa kwi fiyo ngi kwa wako, kusi ichingafimwa kaili uku nnandu wa maifyo.

Kwimisha

¹⁹ Ichino, yachane, fino tuli ni chiposhe cha kwingila apaswefu uku wasi wi Yesu,

²⁰ ku nsila iyo impya ni ya upuma, ino Yesu watuyulila ipisile mwi pasia, ali umwili wakwe,

²¹ nu kuwa na Kapela-nkulu apa ng'anda yi Leesa,

²² tupalamile nu mweso wa chumi, uku kumanyikisha um-usumilo, na kuno angi imyeso itu yaswefiwa, itamanye ifiipe kaili, ni myili, ino yafulwa uku mansi masiipe.

²³ Tulemashe nkani usyuta wa utailo witu, utachi senuka; kuno wino walainye uwa kutailwa.

²⁴ Tulolanae swe yakola na akola, nu kuchinchishana uku lukundo nu milimo misiipe.

²⁵ Tutachita ukukongana apali ponga, ndi fino yamwi yakuluchita, leelo tusundanae nu kulusha ukuchita fiyo, ukuyana fino mululola uwanda ulye fino ulupalamila.

²⁶ Kuno ngi twachita iifyo ku manka, apa chisila pa kumanya ningo chumi, kutakuwa kaili ichipelo uku nnandu wa maifyo,

²⁷ leelo kuli ukulolelela uputusi wa kusimya nu kali wa moto imo wawikwa ukocha yao yano yalupingula.

²⁸ Untu wino wasula Amasunde yi Mose, alufwa kwaula nkumbu, ukwiswi lyi yasyuta yaili nanti yatatu.

²⁹ Mwalola uli? Chitannungime uputusi unkulunkani untu wilye, wino wannyata uMwana wi Leesa, nu kwelengula uwasi wa Upangano uno wafusilwe kuli weneo, ukuwa ichintu cha chaka chaka, nu kumchitila intumpu Mweso wa nkumbu?

³⁰ Kuno tummanyile wenewe wino wavwansile, ati: “Ukulifya ichilandusi chili kuli nene, nene ndulipa!” Na kaili: “uMwene aluputwila antuyaakwe imilandu.”

³¹ Ichintu cha kusimya ukupona um-makasa yi Leesa wa upuma!

³² Leelo mwelengule amanda ya ntangulo, yano pano mwatezilwe umwengelela, mwasisimisha ukulwa nkani na machulo,

³³ yano maila yamwi mwachisilwe ichilolwa pa antu ku kutukwa nu kuchusiwa kwino, maila yamwi pano muminkine na yalye yano yachitilwa fiyo.

³⁴ Kuno muminkine ponga na yalye yano yali um-minyololo, kaili mwasumile uku kuchimba ukupokwa insao sino, angi mumanyile fino muli ni nsao insipe nkani, ya manda yoshi.

³⁵ Ichino mutatompola chiposhe chino, kuno chili nu nnambu unkulu.

³⁶ Kuno chiile muwe nu ute, ukuti, ngi pano mwachita fino Leesa akasi, musane ulanyo ulye.

³⁷ “Kuno kwashala akasimbo kache nkani, wino alwisa, wamwisa, atalusimba.

³⁸ Leelo uwa chumi wane alwikala uku usumilo. Nawe ngi wasunsuka, umweso wane usi nu kuchimba nawe.”

³⁹ Leelo swemwi tusimo muli yano yalusunsuluka nu kulowa, leelo tulimo muli yao, yano yali nusumilo wa kufyusha imyeso.