Aeblania 1 - UPANGANO UPYA

Leesa wafwanga kunsia ya Mwanakwe

¹ Leesa wafwansile kali na yatata itu muli yakalausha maila tupu nu ku nsila tupu;

² num-manda ya chisila aluvwanga neswe uku Mwana, wino wamwisile awe umpyani wi fyoshi, kaili kuli wiyo waumfile insi.

³ Wenewe kuno umwengelela wa ukulu wakwe, ni chimanyisyo cha chata chakwe, wavisenda fyoshi ukwiswi lya maka yaakwe, pano wamala kuswefya antu ku maifyo yao, wikazile ukwikasa lya kwilunji ilya Ukulu umwiyulu.

Yesu alusile yamalaika

⁴ Wachindikwa ningo ukuluta yamalaika, ukuyana nisina lino wapyanile, lino ilya ukulu ukuluta ilyao.

⁵ Kuno uwini pali yamalaika, wino watana wanenwa nanti limwi, ukuti: “Wewe uli mwanane; nene ilelo nakufyala?” Na kaili: “Inene namwa isi wakwe; nawe wamwa kuli nene umwana?”

⁶ Na pa Wanda, uno aluleta mwana wiyele kaili un-nsi, ati: “Chiyaile yamalaika yoshi ayi Leesa kumfukamila.”

⁷ Na pali yamalaika avwanzile, ati: “Aluchita yamalaika yaakwe ukuwa unza; naomvi yaakwe yawe ivyenje vya moto.”

⁸ Leelo pa Mwana avwanzile, ukuti: “Ichisumbi chako icha ukulu, we Leesa, icha manda ti na ti. Ni isumo lya uwene wako isumo lya ololosu.

⁹ Wakunda ichumi, watuwa imisalula. Ichino we Leesa, Leesa wako wakupaka mafuta, amafuta ya kuchimbilila ukuluta anyonko.”

¹⁰ Na kaili: “Wewe, Mwene, intangulo wawisile ifiimbili fya nsi; niyulu unnimo wa makasa yako.

¹¹ Fiyo vilononeka, leelo wemwi ulusyala; navyo fyoshi filukulupa wa mwenda.

¹² Uluvikonsa kunti koti, navyo filukaoka wa mwenda. Leelo wemwi uwewe kwene. Ni myaka yako italusila.”

¹³ Chene! aliko malaika, wino watana wanenwa nanti limwi, ukuti: “Wikala ukwikasa lyane ilya kwilunji, fika na lino nacha nawika yasiluembu yako yawe ichisumbi apa kuwika makulu yako?”

¹⁴ Chene! yao yoshi asi myeso ya kuombela, nu kutumwa ukuyazwa yalye yano yalupyana ufyusi?