2 Timoteo 4 - UPANGANO UPYA

¹ Ndukukonkomezya apa maaso yi Leesa na pa maaso yi Klisto, Yesu wino aluputula imilandu ya apuma na fwi, pano wacha waloleka ukwimika uwene wakwe:

² sunda iswi pano paile na pano pataile kwene, katukila nu kukalipila, nu kusunda uku chelelezi chonsi na masambilizyo.

³ Kuno kulwiza amakati yano yalukana masambilizyo ya upuma. Nga yaluusitila yakasambilizya tupu kuyana fino yakunda, yano yalusambilizya ifintu fino viluya um-makutwi yao.

⁴ Nayo yaluyala amakutwi yao uku vya chumi, nu kulondela ivilai vya ufi.

⁵ Leelo wemwi uukôle muli vyonsi, uteke mweso um-machulo, womba unnimo wa kusunda iswi-zipe; fikilizya uomvi wako.

⁶ Kuno, nemwi ntifimwa mbwe chipelo nu kufwa kwane ikupalamila.

⁷ Nalwa isumo lizipe, namalila ulwendo, nusumilo ndemisye.

⁸ Chisila chakwe nawikilwa inkata ya chumi, ino Mwene, Mputuzi wa chumi, alumpa uwanda ulye; nga asi nene nenga, leelo na antu yoshi, yano yakunda ukuloleka kwakwe.

Amaswi ya kumalila

⁹ Ukalauke ukwiza kunondi zuwa.

¹⁰ Kuno Dema wansile wakunda ivya nsi yi; wapita uku Tesalonike; Kleske nawe waya uku Galatia, Tito nawe waya uku Dalmatia.

¹¹ Luka wenga kwene uwino ali ponga nene. Usende Malko awize ponga newe, kuno angangazwa ningo um-milimo.

¹² Leelo Tikiko nantumile uku Efeso.

¹³ Inkanjo ilye ino nasile kuli Kalipo uku Tloa, pano ulwiza kuche undetele, ni vitabu vivi, nkani ivya mpapa.

¹⁴ Aleksanda, kasula wa mbisi wachisile iviipe tupu kunondi; uMwene alumpa ukuyana ni milimo yaakwe.

¹⁵ Newe kwene unchenjelele untu wiyo, kuno wapingula nkani amaswi yitu.

¹⁶ Um-mivwangile yane ilya ntangulo kusi wino wanvwangila, leelo yoshi yansile. Ndulomba yatavwangilwa uyipe uku chintu chiyo.

¹⁷ Leelo Mwene wimilile ponga nene, wampa amaka, ukuti uku nnimo wane, iswi-zipe lyumwe imbila fino chiine, ukuti yapulike yoshi ayakulukuwa; nene nfyuke un-nnomo wi kalangu.

¹⁸ uMwene alunfyusya ni viipe vyonsi nu kunsunga, kuti nfike um-wene waakwe uwa mwiyulu. Utensyo uwakwe manda ti na ti. Chiwe fiyo kwene.

¹⁹ Undawile Plisika na Akila, na ya ng'anda mwi Onesifolo.

²⁰ Elasto wasile uku Kolinto, Tlofimo nansile unwale uku Mileto.

²¹ Ukalauke ukwiza zuwa, pano amanda ya nzusi yachili; Eubulo alukulaula, na Pude na Lino na Klaudia na achitu yoshi kwene.

²² Umwene awe numweeso wako. Inkumbu ziwe ponga nemwe.