2 Timoteo 2 - UPANGANO UPYA

Unsalifi wa kutailwa wi Yesu Klisto

¹ Ichino wemwi, mwanane, uwe na maka uku nkumbu zino zili muli Klisto Yesu.

² Ni ifintu fino wapulike kuli nene apa maaso yi yasyuta tupu, ifino upe antu aya kutailwa yano yaine ukusambilizya anji.

³ Uminkane um-machulo ponga, wa nsalifi unzipe wi Klisto Yesu.

⁴ Kusi wino akululwa isumo, alondele ukusita ifintu vya chila wanda, ukuti azipile wino wamwika awe unsalifi.

⁵ Nanti umwi angalwila um-machindo, atangi asupwe inkata, ngi atalwilile um-chinane.

⁶ Unnimi wino aluomba unnimo ukomu, chinjile ukutomwela anji iviliwa.

⁷ Umanyikisye nkani chino nduvwanga, kuno Mwene alukupa amano um-ifintu vyonsi.

⁸ Utalatila Yesu Klisto, wino watutulwike uku yafwi, uwa mwikwata lyi Daudi, ndi fino iswi lyane izipe livwanzile.

⁹ Nene kuli lyenelyo nachuziwa nu kunyepwa wa ntu njipe. Leelo iswi lyi Leesa lisunyepwa.

¹⁰ Chaleka natekamweeso um-ifintu vyonsi, uku nnandu wa yasololwa, ukuti nayo kwene yazane ufyusi ulye uno uli muli Klisto Yesu, ponga nutensyo wa manda ti.

¹¹ Iswi li ilya kuzumilwa: kuno ndi twafwa ponga nawe, tulwikala ponga nawe kwene.

¹² Ndi twatekumweeso, tululâsa ponga nawe kwene. Ngi twantaluka unkola, nawe kwene alututaluka sweswe.

¹³ Ndi swemwi tusi ya kutailwa, wene amanda yoshi uwa kutailwa. kuno atangi aukana unkola.

Umuofi wino wazumilwa na Leesa

¹⁴ Uyelenguzye ifintu fiyo, nu kuyasunda apa maaso ya Mwene, yatachipazyana uku maswi ya uwele-wele, kuno yakululovya yano yalupulika.

¹⁵ Kalambana uku ulanga fino wazumilwa na Leesa, umuofi asi na chimwi icha kukulwa untwe, kuno wayanya ningo iswi lya chumi.

¹⁶ Uleuke amaswi ya uwele-wele, yano yataile, kuno yannunduluka nkani um-viipe.

¹⁷ Ni iswi lyao lyannimba wa mpofya. Muli yeneyo pali Imeneyo na Filete.

¹⁸ Yano yalowa uku vya chumi, yano yalutaka. yaluti: ututuluko wa yafwi waati upita, nu kuonona usumilo wa yantu yamwi.

¹⁹ Leelo ichiimbili chi Leesa, chino chili na maka, chimisye, chili na kamanyililo ka: “uMwene amanyile ali yaakwe.” Na kaili: “Wensi wino alutaka izina lya Mwene, atane nuipe.”

²⁰ Leelo un-ng'anda inkulu musi ivivya vya zaabu na feza sile, leelo ni vya viti ni vimatwa kwene, vimwi vyachindama, vimwi pole.

²¹ Nguntu wauswefya nu kutana navyo, aluwa ichivya chichindame chino chafulwa, chino chizipile uMwene, ichakuombela imilimo yoshi imizipe.

²² Leelo uwituke itama zya ulumendo; ulondele ichumi nusumilo nu lukundo nutekano, ponga na yano yalwita uMwene uku mweso untiswe.

²³ Leelo ukutondosya kuno kusi kwa mano ukukane, angi umanyile fino kukuleta ulwete.

²⁴ Kaili chitalingine umuofi wa Mwene ukuwa nu lwete; leelo atontele antu yoshi, wino angasambilizya, uwa chelelezi.

²⁵ Asunde ku utonte yano yalupazyana nawe; ukuti ndi chingawa, Leesa ayape ukuvipela nu kumanya ivya chumi,

²⁶ kaili amano yawele yafyuntuke um-ntyo wi Chiwa, uno wayalema yachite fino akasi.