2 Timoteo 1 - UPANGANO UPYA

¹ Paulo untume wi Klisto Yesu, uku kukunda kwi Leesa uku ulanyo wa upuma uno uli muli Klisto Yesu,

² kuli Timoteo umwanane unkundikwa: Inkumbu siwe kunuli nu kukumbukilwa nuwelezyo, ivilufuma kuli Leesa Tata na kuli Klisto Yesu, uMwene witu.

Nsamalizyo nu kuteka umweso

³ Ndusamalizya Leesa, wino nkupepa uku mweso nzipe ukufuma kali pali yatata, ndi fino nkulukwelengula ti, unkupepa kwane usiku nu nsanya.

⁴ Pano nelengula amonsozi yako, ndukumbuka nkani ukukulola, kuti nchimbe nkani.

⁵ Kuno nelengula usumilo uno uli nao uno usi wa ufi, uno intangulo wali muli nyokokulu Loisi, na muli nyoko Yunise, nene manyile ningo fino newe kwene uli nao.

⁶ Ichino fiyo ndukwelenguzya usonkanye uwila wi Leesa, uno uli munuli uku kuwikilwa amakasa yane.

⁷ Kuno Leesa atatupile umweso wa ngofi, leelo uwa maka nu lukundo nu kutekanya umweso.

⁸ Ichino utalolela insoni usyuta wa Mwene witu, nanti kuli nene ne nnyepwa wakwe, leelo uteke umweso um-machulo ponga nene ukwiswi-zipe, ukuyana na maka yi Leesa,

⁹ wino watufyusizye, watwita umwito nswepe, asi ku milimo yitu sweswe, leelo ukuyana na fino akasi unkola, uku nkumbu zyaakwe. Inkumbu ziyo twapilwe muli Klisto Yesu ukufuma kali kali.

¹⁰ Leelo apa kasalaka zyasweluka uku kuloleka kwi kafyusya witu Klisto Yesu, wino wononile amaka yanfwa, nu kulanga upuma nu kuntaola ukwiswi-zipe liyo.

¹¹ Kuli lyenelyo nawikilwa imbwe kasunda nu ntume na kasambilizya.

¹² Ichaleka nazanwa na machulo ya, leelo ntalukulwa untwe, kuno mmanyile wino nazumila nu kulola fino angasunga ningo chino wansêkela, fika nu wanda ulye.

¹³ Uleme ichilangizyo cha maswi ya upuma yano wapulika kuli nene, um-usumilo nu lukundo, luno luli muli Klisto Yesu.

¹⁴ Usunge ichintu chizipe chiyo chino wasêkelwa uku Mweso Nswefu wino atenzi muli sweswe.

¹⁵ Umanyile ichintu chi, fino yoshi ya mu Asia yantalwike, pali yeneyo pali Figelo na Elmogene.

¹⁶ uMwene ayape ukukumbukilwa aya ng'anda mwi Onesifolo, kuno amaila tupu wantekezyanga, atalolanga insoni uku kunyepwa kwane.

¹⁷ Leelo pano waliko apa Loma, wansita ukunte apalinji wandola.

¹⁸ uMwene ampe ukukumbukilwa apa maaso ya Mwene uwanda ulye. Nu ku ifintu ivinji wambombile uku Efeso, wemwi umanyile ningo.