2 Tesalonike 3 - UPANGANO UPYA

Kupepa nu kulomba. Amaswi ya kumalila

¹ Pa kumalila yachitu, muntupepela, kuti iswi lya Mwene lilimbe suwa, nu ukulu waakwe uloleke, ndi fino chili ukumwino,

² tufyuke na antu asi ya chumi, aipe; kuno asi yoshi yano yali nusumilo.

³ Leelo uMwene uwa kutailwa, wino angamukomya nu kumusunga nu njipe wiyo.

⁴ Neswe twataila uMwene uku nnandu wino, fino muluomba fino twamunenile, na kaili muluviomba.

⁵ uMwene alange imyeso yino ku lukundo lwi Leesa, nu kutekela kwi Klisto.

⁶ Yachitu, tulumukonkomesha umwishina lya Mwene witu Yesu Klisto, mutâne nachino yano yalulondela ifya uwele-wele, asu kwa kulondela masambilisho yano twamupile.

⁷ Mumanyile mwe yakola, fino chimulungime ukutulondela, kuno tutapitaa chipite kuno muli.

⁸ Nanti chakulya tutalile sile kwa untu umwi, leelo uku uchusi nunte usiku nu nsanya angi tuluomba imilimo, ukuti tutilikila umwi uwa kuno muli.

⁹ Tutachisile fiyo, kuno tusi na maka, leelo kuti tumulangilile mutulondele.

¹⁰ Kuno nalino twaliko uku mwino, twamunenile iswi li, fino ngi umwi atakasi ukuomba unnimo, fwandi ni chakulya kwene atachilya.

¹¹ Kuno twapulika fino uku mwino kuli antu yano yasi ningo, yatakuomba imilimo yao akola, leelo yaluchunchumbikila ifintu fya sile sile.

¹² Ichino tuluyakonkomesha, nu kuyasunda um-Mwene Yesu Klisto, yaombae imilimo um-utekesu, nu kulya ichakulya chao akola.

¹³ Leelo mwemwi yachitu, mutatonta ukuchita ifisipe.

¹⁴ Nga ngu ntu umwi atalemile amaswi ya mbaluwa itu yi, mchenjelele untu wiyo, mutachiomba chimwi nawe, kuti akulwe untwe.

¹⁵ Leelo mutamchita wa mwembu, leelo mumsunde wa wachino.

¹⁶ Na kasalaka uMwene wa utekano amupe yoshi ukutekana un-nsila fyoshi. uMwene awe aponga nemwe mwensi.

¹⁷ Nene Paulo ndumulaula ukwikasa lyane nenkola. Alachi ichili chimanyisho um-mbaluwa fyoshi, alu mwandiko wane.

¹⁸ Inkumbu sha Mwene witu Yesu Klisto shawe ponga nemwe mwensi.