2 Petlo 3 - UPANGANO UPYA

Wanda wa Mwene

¹ Yakunde, imbaluwa i iya uwili ukumwandikila mwemwe; kuli shonsi siili ndumulansha imyeso ino iya chumi uku kumwelengusha,

² ukuti angi mwelengwile amaswi yano yafwansilwe nkolelo na yakalausha yaswepe, nisunde lilye lya Mwene na Katula, lino lyalesilwe ni mitume.

³ Mutangule ukumanya iswi li, fino uku manda ya mpejelekesho yalwisa antu ya misowe aya kusoweka, yano yalulondela tama shao akola.

⁴ Angi yaluti: Ulanyo wa kwisakwakwe ulikwi? Kuno fuma lino yatata-kulu yawisi ukunfwa, ifintu fyoshi fitensi fifi kwene, fuma pa kulengwa.

⁵ Kuno yakusula manka yatalola iswi li, fino iyulu lyaliko fuma kali ninsi kwene, yachisilwe ukufuma uku mansi nu kunsila ya mansi, ukwiswi li Leesa.

⁶ Kuli fiyo insi ya makati yalye, yasambesile muli unnamba, yanwela.

⁷ Leelo mayulu ninsi fya kasalaka fyawikwa wa nsao ku moto, ukwiswi liyo kwene, filulolelwa fika na pa wanda wa uputusi wa milandu nu wa kononwa kwa antu yano yatachindike Leesa.

⁸ Leelo yakundwa, mutalatila iswi li, fino uku Mwene uwanda onga ungati imyaka imyanda ikumi, ni myaka imyanda ikumi ungati uwandaonga.

⁹ uMwene atakusimba ukufikilisha ulanyo wakwe, ndi fino yamwi yalwelengula ukusimba kwakwe, leelo ali ni cheldesi kuno muli, kuno atakasime untu nanti unwi alowe, leelo yoshi yafikilile uku kufipela.

¹⁰ Leelo uwanda wa Mwene ulwisa wa mwifi. Uwanda uo mayulu yalutina uku nunkumo ukulu, ni yilengwa vya ku kafumo kakwe filochiwa nu kusambuluka, ninsi ni milimo ino ili mwenemo filuloleka.

¹¹ Ichino fino ifintu fyoshi filusunguluka fiyo, chingamusipila muwe yantu ya miele iswepe nu nchinzi-kuli-Leesa.

¹² Angi mululolela nu kwitukilila fika nu kwiza kwa uwanda ulye uwi Leesa, apa wanda uo mayulu yalusunguluka pano yapya, ni filengwa fya ku kafumo kakwe filusikisa nu kusunguluka.

¹³ Leelo ndi fino ulanyo waakwe uli, tululolela mayulu mapya ninsi mpya, muno ichumi chilwikala-mo.

¹⁴ Ichino yakunde, fino mululolela ifintu vi, chitini unte, kuti muloleke um-utekano fino musi na mala yikwi nanti insoni apa maaso yaakwe.

¹⁵ Mwelengule ichelelesi cha Mwene witu fino ufyusi, ndi fino nu wachitu unkundikwa Paulo wamwandikile uku mano yano wapilwe.

¹⁶ Ndi fino num-mbaluwa shaakwe shoshi fino wafwansile apa ifintu fiyo. Um-mbaluwa siyo muli ifintu fino fyatala ukumanya, ifintu fiyo antu yano yatakwite amano, yano yaatiimishe, yakululofyanya, ndi fino yakululofyanya na Maandiko manina, uku ononi wao akola.

¹⁷ Ichino yakunde fino mwatangula ukumanya ifintu fiyo, mwisunge apa lwino, mutakweswa nu ononi wao aipe, mupone nu kuta ukwimisha kwino.

¹⁸ Leelo mukule unnkumbu nu kummanya uMwene witu na Katula Yesu Klisto. Ukulu uli nawe, kasalaka na manda ti.