2 Petlo 2 - UPANGANO UPYA

Yakasambilisha ya ufi

¹ Leelo kwakatwike amalau ya ufi unjantu, ndi fino na kuno muli kulukatuka yakasambilisha ya ufi, yalwingisha uku uchenjesu ifintu fya kulofya, nu kumkana uMwene kwene, wino wayakasile, yauletelela uononi uno utalusimba.

² Nainji yalulondela mfimbi shao, na kuli yeneyo insila ya chumi ilusulwa.

³ Nu ku kukumbuka kwao yaluusafya usafi kuno muli uku maswi ya kufinda; yano fuma kali uputusi wao wa milandu utalusimba, nu kononeka kwao kutalupunila.

⁴ Kino ndi Leesa atayalekile yamalaika yano yononile, leelo wayasumbile un-chilina, wayanyepa um-finyepelo fya chanda, yalulolela uputusi wa milandu,

⁵ nanti atailekile, insi ya kali, leelo afyusya Noa, wino wasundanga ifya chumi na antu yanina saba, pano walesile nnambu ukunsi uku yantu yano yatachindike Leesa.

⁶ Kaili wochile imisi ya Sodoma ni Gomola, aisikisha iwa itwi, aichita iwe ichilangilisho uku antu yano yaluwa yatachindike Leesa,

⁷ afyusha Lotu untu wa chumi, wino wachusiwe nkani na amikalo ya unyamfi aya antu yao, yano yayembuka.

⁸ Kuno untu wi uwa chumi lino watensi muli yeneyo, walolanga nu kupulika imiele yao miipe, wachusike umweso waakwe uwa chumi manda yoshi.

⁹ Ichino uMwene wamanya ukufyusha ummasosho yano yamchindika, nu kuwika asi-ya-chumi ummalipisi fika nu wanda wa uputusi wa milandu.

¹⁰ Nkani ayaya yano yalondela tama sha ifintu fiipe fya mwili, nu kusula a maka. Apama, atalamane, yatakutetema pano yalusula ukulu,

¹¹ nanti fino yamalaika akulu nkani uku uposho na maka, yatakusongelela ifiipe kuno yali apa maaso ya Mwene.

¹² Leelo yao yakoline ni finyama fino fisi na mano, yano yafilwe sile wa finyama fya kulemwa nu kumolwa, yaluchita imisalula uku ifintu fino yatamanyile, yalumolwa un-kumola kwao.

¹³ Yasanwa ni fiipe, kuwa amalipilo ya uipe wao. Yakunda mfimbi nu ukolesi wa nsanya, yawa mala yikwi ni nsoni, nu kufimbilwa, yalusosha, pano yalulya ifimulo ponga nemwe,

¹⁴ Yakulusinisha achende, antu yano yatakuta ukuchita amaifyo; yakulusosha imyeso ya antu yasi na maka; imyeso yao yawelesha ifya tama, ana ya lutipu.

¹⁵ Kuno yata insila ino yololoka, yalowa, yalondela insila iyi Balaamu, umwana wi Beoli, wino wakunda amalipilo ya uipe.

¹⁶ Leelo wakalipilwe uku ononi waakwe unkola: kawalwe wino atangi avwange, afwanga ukwiswi lya chiuntu, walesishe usofu wi kalausha wiyo.

¹⁷ Yao yali wa fifula fino fisi na masi, na mapufi yano yakulusendwa ni chipupu, yano yawikilwa uluku wa chanda.

¹⁸ Kuno yakuluvwanga amaswi ya chiwele-wele aya chilumba, yakulusosha antu un-tama sha mwili nu ku unyamfi, antu yano yachitampa ukuituka yano yali un-kulowa kwao.

¹⁹ Yakuluyalanya ukauwele, na mbalinga akola asha ya kuola; kuno untu, ndu unji wampota, aluwa unsha wakwe.

²⁰ Kuno yano yituka ifiipe ifya kuno ukunsi nu kummanya uMwene na Katula Yesu Klisto, ngi yalemya kaili nu kupotwa, miele yao aya chisila ikuluipisha nkani ukuluta iya ntangulo.

²¹ Yaliwe inkata yao ngi yatamanyile insila ya chumi, kuleka ukuimanya, nu kuleuka isunde liswepe lino yapilwe.

²² Chawa kuno yali wa nnumbe wa chumi uno utile: “Imbwa yamyanta amalusi yaakwe inkola, na kapoli wino watafiulwa, wawelela ukufulukuta un-ntope kaili.”