2 Kolinto 7 - UPANGANO UPYA

¹ Ichino, yakundikwa, lino tuli na malanyo ya, tuuswefye nu kutisha ikwi lyonsi ilya ku mwili nu ku mweso, na kuno angi tuinye uswefu witu un-chopo chi Leesa.

Paulo aluchimba

² Wezyini myenzo ino kuno tuli; tutakailile untu umwi, tutatana tonone untu, tutachenjishe umwi.

³ Ntalufwanga iswi li kuti immuputwile mwemwe; kuno natangwile ukumunena fino mwemwe muli um-myeso itu, nanti ukufwa ichaponga nanti ukwikala um-upuma ichaponga.

⁴ Indi ni chiposhe nkani kuno muli, ndulola ukulu nkani kuno muli; nasungulwa ningo, um-machulo itu yoshi nduchimbisya nu kuluta.

⁵ Kuno na pano twalile itwisa uku Masedonia, imyili itu itapusile, leelo twachulanga konsi konsi: ukusi kwali sumo, unkasi ingofi.

⁶ Leelo Leesa wino akusungula aluuchefya, watusungwile uku kwiza kwi Tito.

⁷ Asi ku kwisa kwakwe sile, leelo uku kusungulwa kuno wasungwile kuno muli; atulandila ukulûka kwino, nu kulosha kwino, nunte wino uwa kunondi, ifino nachimbisha nu kuluta.

⁸ Kuno nanti fino namuwayisha um-myeso uku mbaluwa yane, ntaluwesha umweso. Nanti fino nawesha umweso, ndulola fino imbaluwa ilye yamuwayishe myeso apa manda mache sile.

⁹ Apa kasalaka nduchimba, leelo asi kuno namuwayisha myenzo, leelo kuno kuwayisya imyeso kwino kwaleta ukufipela. Kuno mwawaikwe imyeso uku sila yi Leesa, ichino mutalofishe chimwi uku nnimo Witu, mwiswi lyonsi.

¹⁰ Kuno ichikonko cha kuli Leesa chikuleta ukufipela kuno kutakusila, kuno kukuleta ufyusi, leelo ichikonko cha kuno ukusi chikuleta infwa.

¹¹ Kuno lolini, ichikonko chiyo kwene Cha kuli Leesa, chaomvile kunte ndi wa chani muli mwemwe, endita, nu kuuwalila, nu kulakalika, ni ngofi, nukulukila nu kushasha ni chilandusi. Muli fyoshi mwaulanga fino muli ningo um-ifintu fiyo.

¹² Ichino nanti fino namwandikile, ntamwandikile kuli wino wachita ifiipe, nanti kuli wino Wachitilwa ifiipe, leelo kuti unte wino uku nnandu witu umanyike kuno muli apa maaso yi Leesa.

¹³ Ichino twasungwilwe. Na kaili uku kusungulwa kwitu, twachimvile nkani nu kuluta uku kuchimba kwi Tito, kuno umweso waakwe watamala kuno muli mwensi.

¹⁴ Kuno, ngi nautesha kunali ukwiswi lyonsi kuno muli, ntakusilwe untwe, leelo ndi fino twamunenile ifintu fyoshi uku chumi, ifino nu kuutesha kwitu kuli Tito kwali ukwa chumi.

¹⁵ Nu lukundo lwakwe lwafulisha kuno muli, lino welengula unchisi wino mwensi, ndi fino mwampokelile ni ngofi nu kutetema.

¹⁶ Nduchimba, kuno muli fyoshi nsimfile umweso uku nnandu wino.