2 Kolinto 5 - UPANGANO UPYA

¹ Kuno tumanyile fino ing'anda ya mikalo itu iya kuno ukunsi ngi yononwa, tuli ni ng'anda ino ifumile kuli Leesa, ing'anda ino itakusilwe uku makasa, iya manda ti um-mwiyulu.

² Kuno un-ng'anda i tulupemela, tulukumbuka ukuswikwa uwikalo witu uno ufumile umwiyulu.

³ Ngi twaswikwa, tutalusha tuloleke fino tuli tupu.

⁴ Kuno swe yano tuli um-mikalo ya, tulupemela, twanwamilwa, asi kuti tulusita tusulwe, leelo tiiswikwe, ukuti ichintu chino Chili ninfwa, chimilwe nupuma.

⁵ Ichino wino watuchisile uku nnandu wiswi liyo kwene i Leesa, wino watupile unnahani wa Mweso.

⁶ Ichino twasisimisha manda yoshi, na kaili tumanyile fino amanda yano tuchilipo pa um-mwili, tutese ukutali nu Mwene.

⁷ Kuno imiele itu iya usumilo, isi kwa kulola.

⁸ Leelo twasisimisha, neswe tululola chingawa ningo ukuntawa nu mwili nu kwikala ponga nu Mwene.

⁹ Ichino kaili, ngi tulipo pa, nanti tusipo pa, tuluchita amaka ukumsifisha aliwe.

¹⁰ Kuno tulungime swensi ukuyu wimilila apa chisumbi cha uyangusi ichi Klisto, ukuti chila ntu apokelele amalipo ya milimo yaakwe iya ku mwili, ndi fino waomfile, ngi fisipe nanti ifiipe.

Kupulikana na Leesa muli Klisto

¹¹ Ichino ngi twamanya fino uMwene uwa kofya, tukwese antu; leelo twaswelulwa apa maaso yi Leesa, nene ntaile fino twaswelulwa mwiswi-lya-myeso ino kwene.

¹² Kuno tutaluitensha apa maaso yino kaili, leelo tulusita kumupa mwemwe nnandu wa kuutensha kuno tuli, kuti muwe ni chakunena yano yaluutesha uku ifintu fino fyaloleka, asi ku ifintu fya m-mweso.

¹³ Kuno ngi twakolana na wino wapena chili uku nnandu wi Leesa; nanti ngi tuli na mano yitu yoshi, chili uku nnandu wino.

¹⁴ Kuno ulukundo lwi Klisto lulutusunkilisha, kimo twaputula fi ukuti, wenga wafwilile yoshi. Ichino yafwile Yoshi.

¹⁵ Na kaili wafwilile antu yoshi, ukuti apuma yatawa apuma kaili apa lwao, leelo kuli wino wafwile nu kututuluka uku nnandu wao.

¹⁶ Ichino ukufuma apa kasalaka tutamanyile untu umwi uku mwili. Nanti fino swemwi tummanyile Klisto uku mwili, leelo apa kasalaka asi fino tummanyile.

¹⁷ Ichino ngu ntu umwi ali muli Klisto, wawa ichilengwa chipya: ifya kali fyoshi fyasila; lola fyoshi fyawa ifipya.

¹⁸ Leelo fyoshi kwene fikufiuna kuli Leesa, wino watupulikanya sweswe nawe muli Klisto, nawe watupile uomvi wa kupulikanya,

¹⁹ uli kuti, Leesa wali muli Klisto angi alupulikanya antu nu mweso wakwe, nanti kwala amaifyo yao, nawe watela muno tuli uomvi wiswi lya kupulikanya.

²⁰ Ichino swe ntumi shi Klisto, ndi fino Leesa alulailila uku milomo yitu; tulumulomba mwemwe kuli Klisto: mupulikanywe na Leesa.

²¹ Wino atamanyile iifyo, wamchisile iifyo uku nnandu witu, ukuti sweswe tuwe chumi chi Leesa muli wenewe.