2 Kolinto 13 - UPANGANO UPYA

Wayasokesha ilya chisila nu kulaula

¹ Alali ilya utatu, lino ndwisa kuno muli: uku ufwasi wi yashuta yaili nanti yatatu iswi lyoshi lilumalilika.

² Natangwile ukumunena fuma kali, na pano nali ukumwino ilya uwili, kaili ndumunena kasalaka, nanti pano nsipo kuno muli, fino yao yano yachita ifya amaifyo ukufuma kali kwene, nanji yoshi fino ngi nacha nisa ntaluyaleka.

³ Kuno mulusita ulangisho wi Klisto, fino alufwanga munondi, wino asi nu tonte kuli mwemwe, leelo ali na maka muno muli.

⁴ Kuno wakonkamilwe mu utonte, leelo atesi uku maka yi Leesa. Kuno neswe kwene tuli nutonte muli wenewe, leelo tulwikala ponga nawe ukumakayi Leesa, yano yali kuli mwemwe.

⁵ Muwezye mwe yakola ngi muli um-usumilo, muulinge mwe yakola. Nanti mutaumanyile mwe yakola, fino Yesu Klisto ali muno muli? Ngi mutamanyile angi mwakanika.

⁶ Leelo ntaile fino mwamanya ukuti swemwi tutakanike.

⁷ Neswe tulupepa Leesa mutachita chimwi ichiipe, asi kuti tuloleke fino tutakanike, leelo kuti mwemwe muchite ifisipe, nanti fino swemwi tuli wi yano yakanika.

⁸ Kuno tutangi tuchite chimwi ichitaine ni chumi, leelo uku nnandu wa chumi.

⁹ Kuno tuluchimba ngi swemwi tusi na maka, nemwe muli na maka. Na kaili tululomba li, nalyo liyane kuno muli.

¹⁰ Ichino naandika fiyo nanti nsi penepo, ukuti nanti ndipo, ntakalipa ukuyana na maka yano uMwene wampile, kuti nkuule, asi kupomola.

¹¹ Apa kumalila, yachane, chimbini, muyane, musundane, muwe nu mweso onga, muweleshane; na Leesa wa lukundo nu kuweleshana aluwa ponga nemwe.

¹² Mulaulane ukwi tosolo liswepe. Aswefiwa yoshi yalumulaula.

¹³ Inkumbu zya Mwene Yesu Klisto na lukundo lwi Leesa, nu uminkano wa Mweso Nswefu viwe nemwe mwensi.