2 Kolinto 11 - UPANGANO UPYA

Paolo untume

¹ Ndusita muntekelele nene um-uwele-wele wane uche; endi, mwantekelela.

² Kuno ndi nusuwa kuli mwemwe, usuwa wi Leesa, kuno namwimalisha uku monsi wenga, uli Klisto, kuti mtwale wa nsumgu wino atatana wonona uto wakwe.

³ Leelo ndopa, ndi fino isoka ilye yasosishe Eva uku uchenjesu wakwe, nemwe kwene amelengusi yino yalowane, mute uololosi nu swefu muli Klisto.

⁴ Kuno wino wisa kuno muli, ndi wasunda Yesu unji wino swemwi tutamsundile, nanti mwapokelela umweso unji uno mutapokelile, nanti iswi-sipe ilinji, lino mutasumile, mulumtekelela ningo.

⁵ Kuno ndwelengula fino nemwi nsi unnono apa mitume anji akulu.

⁶ Leelo nanti fino ntamanyile ukuvwanga, uku kumanya asi fino ndi, leelo muli chila iswi twachimanyisha kuno muli.

Paulo ni mitume ya ufi

⁷ Chene! naifishe, kuno nau chefishe, kuti nemwe mukule, kuno namusunzile iswi-siipe ilyi Leesa uwila?

⁸ Napokile amakongani yamwi insao yao, ntola ichakulya chane, kuti mmuombele ningo mwemwe.

⁹ Nene pano nali ponga nemwe nu kuulilwa, ntilikile umwi. Kuno achitu yao yano yisile ukufuma uku Masedonia yangaswishe fino naulilwe; nene um-ifintu fyoshi fiyo natekine kuti ntamwilikila nanti uche; ifino nanchitaa.

¹⁰ Ndi fino ichumi chi Klisto chili muli nene, kusi untu wino anganfumbatika unnomo uku kuutensha ku, umu Akaya yoshi.

¹¹ Kuno ichani? Chene! kuno ntamukusile mwemwe? Leesa amanyile.

¹² Leelo chino nduomba, nkuombaa, ukuti mpingule yao yano yalusita uwasa, yataulola, ukuti ukwiswi liyo lino yaluutensesha, yakolane neswe.

¹³ Kuno antu ndi yao imitume-ya-ufi, yaluomba unnimo uku uchenjesu, yano yaluusenula yakolane ni mitume yi Klisto.

¹⁴ Chisi cha kusunguka, kuno Shetani unkola kwene akulusenulula awe wi malaika wa mwengelela.

¹⁵ Ichino chisi chimwi cha kusunguka, nga omvi yaakwe yausenulula, yawe wa yaomfi ya chumi; leelo ukusila kwao kuluwa wa milimo yao.

Machulo yi Paulo

¹⁶ Kaili nanti kutawa umwi uwa kwelengula fino nayungana; leelo nanti mwangelengula fiyo, musumile wa njungani; ukuti nene kwene mbuteshe, nanti uche.

¹⁷ Chino ndufwanga apa kasalaka, ntalufwanga fino icha Mwene, leelo wa njungani, uku chiposye chi ichakuutesha.

¹⁸ Kuno ainji yaluutensesha uku mwili, nene kwene mbutenshe.

¹⁹ Mwemwi fino muli na mano, mulutontelana na yungani uku kuchimba.

²⁰ Kuno mulutontelana nu ntu ndi wamutela um-usha, ndi wamumila, ndi watola ifintu fino, ndi waukusha, ndi wamupatula uku maaso.

²¹ Uku nsoni nduweela fino tutali na maka; leelo ngu ntu waposesha chimwi chonsi—ndufwanga wa mwele-wele—nene kwene mposizye.

²² Akola aEblania? Nene kwene! Akola aIslaeli? Nene kwene! Akola umpanda wi Ablahamu? Nene kwene!

²³ Akola aomfi yi Klisto? Nduvwanga wi chipena—nemwi ndusile! Uku machulo ndusile nkani; uku kunyepwa maila tupu; uku fyumo numwa nkani na nkani; ukunfwa amaila tupu.

²⁴ Uku aYudea numwa maila yasano ifyumo amakumi-yani-kushala-chonga.

²⁵ Amaila yatatu numilwe ni ntuwa, na lyonga natamilwe na mafinga, maila yatatu wato wane wafunikile muli yemba; usiku nu nsanya angi ndi muli yemba.

²⁶ Undwendo maila tupu, nfyuka ungusi, nfyuka kuli yakapoka fya antu, nfyuka uku yantu ya kumwitu, nfyuka nu ku yantu yakulukuwa kwene, nfyuka nummizi, nfyuka unduselesenga, nfyuka muli yemba, nfyuka achitu-antumpu.

²⁷ Um-machulo nu kusamala maila tupu, ukuntalala maila tupu, ukuwaika ni nsala nu nsala, amaila tupu kuulilwa ifyakulya, uku nsusi nu kunsisha.

²⁸ Ukuluta fi kuli ni ifintu ifya chila wanda nu kuchunchumbikila amakongani yoshi.

²⁹ Uwini watonta ndi nemwi ntakutonta? Uwini wafwitoka, nene chitawaya?

³⁰ Ngi chandungama ukuutensha, nambutensha ukutonta kwane.

³¹ Leesa, Isi wa Mwene Yesu, uwa utensho manda ti, amanyile fino ntaluvwanga ufi.

³² Uku Damaski unnâsi wa mwene Aleta, walolaa usi wa yaDamaski, ukuti andeme.

³³ Nene yangisha um-mpanda uku nswefya yilinga, nga nafyuka um-makasa yaakwe.