2 Kolinto 1 - UPANGANO UPYA

¹ 1 Paulo untume wi Klisto Yesu, uku kukunda kwi Leesa, nu wachitu Timoteo, ukwi kanisa li Leesa, lino lili uku Kolinto, ponga naswepe yoshi, yano yali unsi ya Akaya.

² Inkumbu siwe kuno muli nu welesho, fino fifumile kuli Leesa, Tata witu, nu ku Mwene witu Yesu Klisto.

Samalisho kuli Leesa

³ Utensho kuli Leesa Tata-wa Mwene witu Yesu Klisto, Tata wa nkumba, Leesa wa kusungula koshi.

⁴ Wino akulutusungula um-machulo antu yoshi, kuti neswe tusungule yalye, yano yali um-machulo yoshi uku kusungula, kuno neswe tulusungulwa na Leesa.

⁵ Kuno ndi fino amachulo yi Klisto yavula kuno tuli, ifino nu kusungulwa kwitu kwene kuluvula muli Klisto

⁶ Leelo ngi sweswe tuli um-machulo, chili kuti mwemwe musungulwe nu kufyushiwa; nanti tulusungulwa, uku kusungulwa kwino, muwe na maka ya yano yaloleka, pano mulusimpa um-machulo yaya kwene, yano neswe kwene tuluchula.

⁷ Nutailo witu sweswe kuno muli ukomu, na kuno tumanyile fino muminkine um-machulo yaya kwene, ifino muminkana nu kusungulwa kuo kwene.

⁸ Kuno yachitu, tutakasi ukuti mutamanya amachulo yano yatuzanile umu Asia; fino twanwamilwe ndi, ukuluta apa maka yitu, apalinji twaulola fino swe ya kufwa.

⁹ Endi, um-myeso yitu swemwi swe yakola twawine, fino swe ya kufwa, ukuti tutautaila swenga, leelo tutaile Leesa, wino akulututulula afwi.

¹⁰ Wino watufyuntulwile un-nfwa, intasu ndi iyo, na kaili alutufyuntulula: ndi fino tutaile wamwa alutufyusha.

¹¹ Nemwe kwene ndi mwaswana neswe ukupepa, ukuti uku wila-wa-nkumbu, uno twapiwa sweswe, uku antu tupu, antu ainji yasamalisha uku nnandu witu.

Akolinto yasumbikila Paulo

¹² Kuno ukuutensha kwitu uli ku, usyuta wa myeso itu, fino uku uswefu nutiswe wa mweso uno ufumile kuli Leesa, asi ku mano ya mwili, leelo uku nkumbu shi Leesa, umuno twikalile kuno ukunsi, na nkani kuno muli.

¹³ Kuno tutalumwandikila amaswi manina, leelo yano mulusoma nu kuyamanya; nene ntaile fino muluyamanyikisha.

¹⁴ Ndi fino mbalinga mwatusumila, fino muluutensesha kuli sweswe, ndi fino nemwe muluwa utesho witu, apa wanda ulye uwa Mwene witu Yesu.

¹⁵ Nene indi nu utailo uo kwene, nakasime ukwisa inkolelo kuno muli, kuti mupiwe uwila-wa-nkumbu wa uwili.

¹⁶ Nu kupitila ukumwino, lino nduya uku Masedonia, nu kufuma uku Masedonia ukuwela uku mwino nu kusindikilwa nemwe ukuya uku Yudea.

¹⁷ Pano nakasime ukuchita fi, Chene! nasenwike? Nanti ifintu fino nkasime ukuchita, Chene! fikuwa ifya ku mwili, ukuti chiwe fino nkasime; ngi nati: Ee, chiwe Ee; ngi nati: Awe, chiwe.

¹⁸ Leelo ndi fino Leesa uwa kutailwa, ifino iswi litu kuno muli, litakwite amaswi yaili: Ee na Awe.

¹⁹ Kuno uMwana wi Leesa, Yesu Klisto, wino twamusundila-ko, nene na Silvano na Timoteo, kutali Ee na Awe, leelo muli wenewe muli “Endita.”

²⁰ Kuno ulanyo onsi uwi Leesa, uno ulipo uwakuti, Endita, na muli wenewe muli: Chiwe fiyo kwene,’ kuti Leesa atensiwe kuli sweswe.

²¹ Ichino wino watukomya ponga nemwe muli Klisto nu kutupaka amafuta, i Leesa.

²² Uli wino watutelile akamanyililo, pano watupile uMweso awe unnahani um-myeso itu.

²³ Leelo nemwi ndwita Leesa awe isyuta wa mweso wane, fino uku kumukumbukila ntachili ngise kaili uku Kolinto.

²⁴ Kusi kuti twalâsa usumilo wino, leelo tulwaswilishana uku kuchimba kwino; kuno mwimilile uku usumilo.