1 Yoane 5 - UPANGANO UPYA

Usumilo ukuupota ifyakushi

¹ Wesi wino azumile fino Yesu i Klisto, wafyalwa na Leesa; na wesi wino wakunda Wino wafile, alukunda na wino wavyalwa nawe kwene.

² Uku chintu chi tumanyile fino twakunda ana yi Leesa, ngi twakunda Leesa nu kulema amasunde yakwe.

³ Kuno ku ali kukunda Leesa: ukulema amasunde yakwe. Na masunde yakwe yatakomile,

⁴ kuno chonsi chino chavyalwa na Leesa chikupota ivya kunzi. Na kuo ali kupota kuno kulupota ivya kuno ukunzi, usumilo witu.

⁵ Wino alupota ivya kunzi uwini, siku wino azumile fino Yesu uMwana wi Leesa.

⁶ Wiyo uwino wizile uku manzi nu ku wazi, Yesu Klisto. Asu ku manzi sile, leelo uku manzi nu ku wazi.

⁷ Nu Mweso alwimikila, kuno uMweeso ali wa chumi.

⁸ Kuno yali yatatu yano yalwimikila (umwiyulu, Tata ni Iswi nu Mweso Nswefu, na yatatu ya ali yonga.

⁹ Nga kuli yatatu yano yalwimikila kuno ukunzi,) Mweso na manzi nu wasi, na yatatu ya yapulikine kwiswi lyonga. Ngi twazumila usyuta wa yantu, usyuta wi Leesa waluta nkani; kuno usyuta wi Leesa uli u, fino wimikila uMwanakwe.

¹⁰ Wino amzumile Mwana wi Leesa, ali nu usyuta unkasi kakwe. Wino atamzumile Leesa, wamchita ukuti waufi, kuno atasumile usyuta uo, uno Leesa wimikila uMwanakwe.

¹¹ Nau uli usyuta, fino Leesa watupa upuma wa manda ti, nupuma u uli um-Mwanakwe.

¹² Wino ali nu Mwana ali nupuma uo; wino atakwite uMwana asi nupuma uo.

Amaswi ya kumalila

¹³ Namwandikila mwemwe ifintu vi, kuti mumanye fino muli nupuma wa manda ti, mwe yano muzumile izina lya Mwana wi Leesa.

¹⁴ Na chi chili chiposye chino tuli nacho apa maaso yaakwe, fino ngi twalomba chimwi ukuyana na fino akasi, akutupulika.

¹⁵ Nga ngi twamanya fino alutupulika chonsi chino twalomba, tumanya fino tuli ni visitwa fino tunnomvile.

¹⁶ Untu ndi walola uwa chakwe aluchita iifyo lisi lya nfwa, apepe Leesa angampa upuma, kuli yao yano yaluchita iifyo lino lisi lya nfwa. Kuli iifyo lya nfwa. Ntaluti fino angapepa kuli liyo.

¹⁷ Chosi chino chisi cha chumi iifyo, ni yifyo liliko lino lisi lya nfwa.

¹⁸ Tumanyile fino untu wesi wino wafyalwa na Leesa atakuchita amaifyo; leelo wino wavyalwa na Leesa akuluusunga, nanti unjipe wilye atangi amwemye.

¹⁹ Tumanyile fino swemwi swe yi Leesa, ninsi yoshi itesi um-makasa ya njipe wiyo.

²⁰ Neswe tumanyile fino Mwana wi Leesa wata wisa, nawe watupa mano kuti tummanye uWa-Chumi. Neswe tuli muli wenewe uWa-Chumi, muli Yesu Klisto Mwanakwe. Wiyo ali Leesa wa chumi nupuma wa manda ti.

²¹ Yana yanono, chenjelini mutapepa imyao.