1 Yoane 3 - UPANGANO UPYA

Kuwa mwana wi Leesa

¹ Lolini, ulukundo uli luno Tata watukunda, ukwitwa yana yi Leesa, wene ifino tuli. Ichino fiyo akunzi yatatumanyile. kuno nawe kwene yatammanyile.

² Yakundikwa, nga wene li kwene swe yana yi Leesa, chichili chimanyike fino tuluwa; leelo tumanyile fino pano wacha waloleka, tulukolana nawe; kuno tulunnola ndi fino ali.

³ Na wesi uwa utailo u muli wenewe, akuluuswefya ndi fino nawe unsevefu.

⁴ Wesi wino aluchita amaifyo, alutanduka, kuno amaifyo ukutanduka.

⁵ Nemwe mumanyile fino walolike kuti atisye amaifyo, na muli wenewe musi amaifyo.

⁶ Wesi wino atesi muli wenewe ataluchita amaifyo; kachita wa maifyo wesi atachili annole nanti ukummanya.

⁷ Yana yanono, umwi atamusosha. Wino aluchita ivya chumi, umfumi wa chumi, ndi fino nawe uwa chumi.

⁸ Kachita wa maifyo uwi Chiwa, kuno Chiwa waifyanga kufuma uku ntangulo. Ichino fiyo Mwana wi Leesa walolike, kuti aonone imilimo yi Chiwa.

⁹ Wesi wino wavyalwa na Leesa asuchita maifyo; kuno imbesu yaakwe ili muli wenewe; nga atangi achite ifyo, kuno wafyalwa na Leesa.

¹⁰ Uku chintu chi ana yi Leesa yamanyike, na ana yi Chiwa nayo kwene: untu wensi wino ataluchita ivya chumi, atafumile kuli Leesa, na wino atakunda uwachakwe.

Mukuundane

¹¹ Kuno alaya ali maswi yano mwapulike fuma intangulo, ukuti tukundane swe yakola.

¹² Asi wi Kaini wino wali nu njipe, wumola uwachakwe. Nawe wamumolile chani? Kuno imilimo yaakwe yalile yaipa, ni ya wachakwe yali iya chumi.

¹³ Yachane mutachizunguka ngu kunzi kwamutuwa.

¹⁴ Swemwi tumanyile fino twapita ukufuma kunfwa, twingila um-upuma, kuno twakunda achitu. Wino atakunda achakwe, atenzi un-nfwa.

¹⁵ Wensi wino watuwa uwa chakwe, umumozi, nemwe mumanyile fino umumozi wensi atakwite upuma wa manda ti muli wenewe.

¹⁶ Muli chi tumanyile ulukundo, kuno wene waufimile upuma waakwe Uku nnandu witu. Chituile neswe kwene tuufime upuma witu uku yachitu yao.

¹⁷ Leelo untu nsavi kuno ukushi, ngi walola uwachakwe wino aulilwe, waula ukumkumbukila, Chene! ulukundo lwi Leesa luli uli munali?

¹⁸ Yana yanono, tutakundana uku maswi sile, nanti apa lulumi, leelo uku milimo ni chumi.

uKumanyikisya kwitu pali Leesa

¹⁹ Uku chintu chi tumanyile fino swe ya chumi, neswe tuluteka imyeso itu apa maaso yaakwe.

²⁰ Kuno ngi myeso itu ilutuputwila unnandu, Leesa wakula ukuluta imyeso itu, nawe amanyile fyoshi.

²¹ Yakundikwa, ngi myeso itu italutuputwila unnandu, tuli ni chiposye kuli Leesa.

²² Na chosi chino twalomba kunali, atupa, kuno twalema amasunde yaakwe nu kuchita ifintu fino ifisifu apa maso yaakwe.

²³ Ichilangaso chakwe ichi: fino tusumile ishina lya Mwana kwe, Yesu Klisto, nu kukundana swe yakola, ndi fino watupile ichilangaso.

²⁴ Na wino alemile amasunde yaakwe akulwikala munali, nawe muli wenewe. Na muli chi tumanyile fino atesi muli sweswe: uku Mweso wino watupa.