1 Yoane 1 - UPANGANO UPYA

Amaswi ya upuma

¹ Lino lyalipo fuma uku ntangulo, lino twapulika, lino twawine uku maaso yitu, lino twafindamile na makasa yitu yalipalapasya ilya kwiswi lya upuma,

² Nupuma waswelwike, neswe twaulola na kaili tulwimikila nu kumusunda mwemwe upuma uo uwa manda ti, uno wali kuli Tata, watuswelukila.

³ Lino twalola nu kulipulika tulumusunda nemwe kwene, ukuti nemwe kwene muminkane neswe. Nu uminkano witu uli onga na Tata, ponga nu mwanakwe Yesu Klisto.

⁴ Tulumwandikila ifintu vi, ukuti ukuchimba kwitu kufikilile.

Kupita um-mwengelela

⁵ Na li iswi lino twapulike kunali nu kulisunda kuno muli, fino Leesa umwengelela, nanti ichanda chisimo munali nanti kache.

⁶ Ngi twati: tuminkana nawe, na kuno tulupita un-chanda, angi twavwanga ufi, tutaluomba nanti chimwi icha chumi.

⁷ Leelo ndi tulupita um-mwengelela, ndi fino wene ali um-mwengelela, angi tuminkana swe akola na akola; nu wasi wi Yesu uMwana wakwe, watufula amaifyo itu yoshi.

⁸ Ndi tuluti: tutakwite amaifyo, tuluusosha swe yakola, nanti chumi tutakwite.

⁹ Ndi twailongwela amaifyo itu, wene uwa kutailwa nu wa chumi angatwelela amaifyo itu nu kutuswefya uipe wonsi.

¹⁰ Ndi tuluvwanga, ukuti: tutatala twachita amaifyo, tulumchita fino wene uwa ufi, nanti iswi lyaakwe lisi muno tuli.