1 Timoteo 6 - UPANGANO UPYA

¹ Yoshi yano yachili un-nkonkoli ya uzya, yachindike aene yao, fino chiyaile, uku nchinzi wonsi, kuti izina li Leesa na masambilizyo yitu yatanyatwa.

² Na yano yali na ene yano yazumile, yatachiyasula kuno achao, chiile yayaombelange nu kuluta, kuno wene yano aya usumilo nu kukundikwa, yalwezya kuomba ningo. Usambilizya ifintu vi nu kusunda.

Untyo wa usavi

³ Untu angawa wensi ngi wasambilizya masambilizyo yano yauwelile, ngi atayazumile amaswi yaya ya upuma aya Mwene witu Yesu Klisto, nanti amasambilizyo yano yaine ni chopo-kuli-Leesa,

⁴ aluivuna, atamanyile chimwi, leelo wapenela uku vyakutondosya na amaswi ya kupazyana, fino muli vyenevyo mukufuma uzuwa nu lwete, ni ntusi nu kuifikizya.

⁵ Nu lupaka luno lususila uku yantu yano yononeka amano yao, yano yaulwa ichumi, nakuno angi yalwelengula vini chopo-kuli-Leesa inzila ya kuzanile chimwi.

⁶ Leelo chopo-kuli-Leesa chili nunzano unkulu ponga nu kwikondela.

⁷ Kuno tutalesile chimwi kuno ukunzi, na kaili tutalusenda chimwi.

⁸ Leelo ngi tuli ni chakulya ni cha kuzwala, tuluzigala mwenemo.

⁹ Leelo yao yano yalusita ukuwa ni nsao, yakulupona um-mazosyo ni mityo, ni tama tupu zya uwele-wele, zino ziluzanya, zino zilutuwizya antu un-kulowa nu kononeka.

¹⁰ Kuno isinda lyonga ilya viipe vyonsi ukukunda impia nkani. Vino yamwi ngi yavilondela fiyo yatana nu zumilo, yautwala um-malanda tupu.

Masunde kuli Timoteo

¹¹ Leelo wemwi we ntu wi Leesa, uwituke ifintu fiyo; ulondele ivya chumi, chopo-kuli-Leesa, usumilo, ulukundo, unte nu kuvyalika.

¹² Ulwe isumo lizipe ilya usumilo, uleme upuma uo uwa manda ti uno witilwe, ndi fino imika usyuta uzipe apa maaso yi yasyuta tupu.

¹³ Nakupa kuli Leesa, wino akulupa ifintu vyonsi upuma, na pali Klisto Yesu, wino wimike usyuta uzipe ulye apa maaso yi Pontio Pilato,

¹⁴ ukuti usunge iswi li nanti lyala, nanti kusumbikilwa, fika na lino Mwene witu Yesu Klisto aluloleka.

¹⁵ Kuno Wene, pano amanda yaakwe yafika, alukulanga unkola wino watensiwa, uwa-maka wenga kwene, uMwene wa yene, Unnâsi wa yalâsi,

¹⁶ wino wene wenga kwene atangi azanwa ninfwa, wikala um-mwengelela, uno utangi upalamilwe, kusi nanti untu wino watana wannola, nanti uwino angannola. Unchinzi na maka uli nawe fika na manda ti. Chiwe fiyo kwene.

¹⁷ Asafi ya kuno kunshi kwa kasalaka, uyasunde yatachiuwanza, nanti yatachiutaila usavi uno ukusila zuwa, leelo yataile Leesa wino akutupa ifintu fyonshi uku winji, ukuti tuviombele uku kuchimba.

¹⁸ Yachite ivizipe, yawe asavi um-milimo mizipe, yatatala ukufima insao zyao, yazwane nanina ukumweeso wonga.

¹⁹ Na kuno angi yaluwuwikila chimwi chino yalwikalila um-manda yano yalwiza, ukuti yawe nupuma uwa chumi.

²⁰ We Timoteo, usunge chino wasêkelwa, uleuke amaswi aya uwele-wele, nu kupazyana kwa ufi, kuno yamwi yakuluti ali kumanya.

²¹ Yamwi yano yayazumila, yalowa inzila ya usumilo. Inkumbu ziwe ponga nemwe.