1 Timoteo 5 - UPANGANO UPYA

Asimbe mwikongani

¹ Unkombe utachi unkalipila, leelo usunde wi so; nalumendo wa yachako.

² Akolechi wi ya nyoko, na anachi asungu wa asiche yako, um-uswepe onsi.

³ Uchindike anachi yano afwilwa, yano afwilwa nalyoli.

⁴ Leelo umfwilwa ngali na ana nanti ayizikulu, wene yao yasambilile ukuombela chino chiyaile uku yaluko lwao akola, nu kulambula afyashi yao. Kuno alali lizumilwe apa maaso yi Leesa.

⁵ Ichino wino ngi wafwilwa nalyoli, wasyala wenga, nawe wataila Leesa, nawe usiku nu nsanya atalatile ukupepa nu kusalika.

⁶ Leelo, wino ataukôzile umweso wakwe, wafwa lupita nanti ifino umpuma.

⁷ Ifintu fiyo navyo kwene uvisundisya, kuti yaatize yasumbikilwe uipe.

⁸ Leelo untu wensi wino atalulela antu yaakwe, ndikuti, yalye aya ng'anda umwakwe unkola, wakana usumilo, na kaili waipisya ukuluta nuntu wino atasumile.

⁹ Umfwilwa atachaandikwa ndachili afisye imyaka amakumi sita, nawe wasasilwe nu monsi wenga.

¹⁰ Nawe wavwangilwa ivizipe uku milimo yaakwe imizipe, ndi watana walela ana, nu kupokelela aeni, ndi akulufula mulu ya aswepe, ndi akulwazwilizya aya machulo, ndi wakônka ukunte chila unnimo unzipe.

¹¹ Leelo afwilwa yano yachili yafisya imyaka iyo utachiyaandika, kuno, ndi nyengwa yayaluta nu kuyaakwesa kufuma kuli Klisto, yasita ukusakwa.

¹² Nayo yausulisya kuno yata utailo wao uwa ntangulo.

¹³ Na kaili, ponga na fiyo, yakulusambilila ukuwa akosu, angi yalupitana chila ng'anda; nga asi yakosu sile, leelo ayalwambo na ya lupaka, angi yaluvwanga amaswi yano yatayaile.

¹⁴ Ichino ndusita afwilwa, yano achili yakomile, yasakwe, yavyala ana, yalela ningo ing'anda zyao, ukuti yatampa ummwembu uwasa wa kuifikizya.

¹⁵ Kuno yamwi na li kwene yaati yapaluka, kunnondela Shetani.

¹⁶ Umwanachi wino wazumila ngali nafwilwa, ayazwe unkola; ikongani litachinwamilwa, ukuti liyazwe yalye yano asimbe nalyoli.

Ayikolo ayi kanisa

¹⁷ Ayikolo yano yalulola ningo unnimo wao, yapiwe unchinzi luwili, nkani kuli yano yachita unte wa kusunda nu kusambilizya.

¹⁸ Kuno Ilyandiko litile: “Utachinyepa unnomo ng'ombe ino ilupula.” Na kaili: “Kaomba wa unnimo aine nu kulipwa.”

¹⁹ Utazumila ukulanda uwikolo, leelo uku milomo yi yasyuta yayili nanti yatatu.

²⁰ Yaya yano yaluchita amaifyo, uyakalipila apa maaso ya antu yoshi, kuti na anji yope.

²¹ Ndukukonkomezya pali Leesa na pali Klisto Yesu, na pali yamalaika asolole, uchite ifintu fiyo, nanti kusya limwi; utaomba iswi limwi ukukuwila kumwi.

²² Utamwikila untu amakasa zuwa, nanti ukuminkana um-maifyo ya yantu yanji. Usunge umweso wako ningo.

²³ Ukufuma li kwene utachinwa amasi matupu, leelo na manzi mache ya mizabibu, uku nnandu wa nda yako, kuno ululwalikisya.

²⁴ Amaifyo ya yantu yamwi yali apatiswe, yayakolelile ukuya uku uputuzi wa milandu; na yamwi amaifyo yao yayalondile.

²⁵ Ifino ni milimo ya mpomvu ili apatiswe, nga ilye ino isi apatiswe, itangi ifisame itamanyika.