1 Timoteo 3 - UPANGANO UPYA

Yakaangalila na Diakoni

¹ Iswi li ilya kuzumilwa: ngu ntu alusita unnimo wi kaangalila, alusita unnimo unzipe.

² Ichino kaangalila awe untu wino atalufwangilwa uifu, wino ali nunchi wenga, wino atekine, awe na mano, untu uwanchinshi, kaulila wa yantu, wino amanyile ukusambilizya.

³ Atachiwa unkolesi, nanti ukuma antu, leelo awe untonte, asi ntu wa lupaka, nanti uwino wakunda impia.

⁴ Wino alulolela ing'anda yaakwe ningo, wino akululindikanya anakwe ningo ku nchinzi wonsi.

⁵ Kuno ngu ntu atamanyile ukulindikanya ing'anda yaakwe unkola, angalela uli ikongani lyi Leesa?

⁶ Atachiwa untu wino wachifyusiwa pipi kwene, atiza mbutensya nu kuponela um-uputushi wi Chiwa.

⁷ Na kaili chiine ukuvwangilwa uzipe na antu yano yali ukunzi, ukuti ataponela um-masumbikilo nu ntyo wi Chiwa.

⁸ Ifino na Diakoni kwene, yawe akondekane, yasi ya ndimi ziili, yasi yakolesi, yasi ya kukumbuka mpia mbi.

⁹ Yano yalemile inkama ya usumilo um-myenzo ya ningo.

¹⁰ Na yao kwene yatane yeziwe, nga pa chisila yaombe unnino wa Diakoni, pano yaloleka fino yasi nuipe.

¹¹ Ifino na achi yao kwene yawe aya nchinzi; asi ya kaifikizya, antu yano yatekana, aya kutailwa um-ifintu vyonsi.

¹² Adiakoni yawe antu ya achi wenga wenga, yano yalulela ana yao ningo, ni ng'anda zyao.

¹³ Yano yaluomba ningo unnimo wa udiakoni, yakuluwa nu nchinzi unzipe, nu kuposya nkani um-usumilo uno uli muli Klisto Yesu.

¹⁴ Nakwandikila ifintu vi nanti fino ndwelengula ukwiza ukwako zuwa.

¹⁵ Leelo ngi nazimba, umanye fino chiine antu ukwikala uli un-ng'anda yi Leesa, yino ikongani li Leesa wa upuma; uli luzyiko ni chiimbili cha chumi.

¹⁶ Kusi kutentenganya, inkama ya chopo-kuli-Leesa inkulu: walolike um-mwata wa ntu, wamanyika fino uwa chumi um-Mweso, waloleka na yamalaika, wasundwa unjantu akulukuwa, wazumilwa kuno ukunzi, wasendwa umwiyulu um-utensyo.