1 Timoteo 1 - UPANGANO UPYA

¹ Paulo untume wi Klisto Yesu, uku chilangaso chi Leesa, unkuluzi witu, na Klisto Yesu, utailo witu.

² Kuli Timoteo, umwanane tometome um-usumilo. Inkumbu siwe kunuli nu kukumbukilwa nu welezyo, fino filufuma kuli Leesa Tata na kuli Klisto Yesu uMwene witu.

Amasambilizyo ya ufi

³ Ndi fino nakunenile, pano napisile ukuya uku Masedonia, uwikale uku Efeso, ukuti uyaleshe yamwi, yatachisambilisha masambilisho manina.

⁴ Nanti ukulanga ummweso ifilai nu kulondosya kafumo ki yatata-kulu kuno kutakusila, fino viluleta ulupaka, navyo asi maka yi Leesa yano yali um-usumilo.

⁵ Leelo ilûnga lya kusunda ulukundo ulukufuma um-mweso ntiswe na melenguzi masipe, nusumilo uno usi nufi.

⁶ Yamwi yaulilwa fiyo yasenukila um-maswi ya uwele-wele.

⁷ Yakunda ukuwa yakasambilisha ya ntambi, nanti fino yatamanyile chino yalutaka, nanti ifintu filye fino yalufwanga uku maka.

⁸ Leelo tumanyile fino masunde yasipa, ngu ntu wayaombela uku nsila ya ningo.

⁹ Ngi walimanyikisya iswi li, fino amasunde yatizile untu wa chumi, leelo kuli yano yatanduka, na yano yalelengana, na asi na uleza, na yamaifyo, na nyamvi, na yano yakulutuka ivya uleza, na yano yakulumola yaisi na yanyina na yumozi.

¹⁰ Na apundu, na yano yalukundana ayonsi yatupu, na yakongolosya ya antu, na yaufi, na yano yakululapa uku ufi, nanta kwawa iswi limwi lino litaine na masambilisho ya mpomvu.

¹¹ Ndi fino chavwanzilwe umwiswizipe ilya ukulu wi Leesa alutensiwa, lino napiwa ukusunda.

Paulo asamalisha uku nkumbu zyi Leesa

¹² Nene ndusamalizya Klisto Yesu uMwene witu, wino wampile amaka, kuno wambwine fino ne wa kapanga. wambwika um-uomvi uo,

¹³ nanti fino apa ntaliko nali katukana, uwa kuzunya antu, napotenkinye. Leelo nakumbukilwa, kuno nachitanga fiyo um-upupani, nu kuntawa nu usumilo.

¹⁴ Ni nkumbu zya Mwene witu zyavulisye nkani, ponga nusumilo nu lukundo, luno luli muli Klisto Yesu.

¹⁵ Iswi lya kutailwa, na kaili liine ukuzumilwa nkani, fino Klisto Yesu wizile kuno ukunzi, afyusye aya maifyo; yano uwa ntangulo wao inene.

¹⁶ Leelo uku nnandu u nakumbukilwe, ukuti muli nene uwa ntangulo, Yesu Klisto alange icheleleshi chakwe choonsi, kuti mbwe ulangizyo kuli yano yalumzumila ichisila, yawe nupuma wa manda ti.

¹⁷ Kasalaka uku Mwene wa manda ti, wino atalufwa, atakuloleka uku manso ya antu, Leesa wenga mpela, achindikwe na kulaliwe utensyo manda ti na ti. Chiwe fiyo kwene!

¹⁸ Timoteo mwanane, nakupa isunde, liwe kuno uli, ukuyana na maswi ya ulau, yano yavwanzilwe kuli wewe, ukuti muli yeneyo ulwe isumo lya mpomvu.

¹⁹ Ulemasye usumilo, uwe numweeso wa kumanya ivizipe mpela. Kuno yamwi yakana fiyo, ichaleka yonona usumilo wao.

²⁰ Pali yao pali Imeneyo na Aleksanda, wene yao nayapa Shetani, kuti yasundike yatachisula kaili.