1 Petlo 4 - UPANGANO UPYA

uWikalo upya

¹ Ichino fino Klisto wachushile uku mwili, nemwe kwene tolini ichaso cha melengusi ndi yaya kwene, kuno wino wachushile uku mwili, watana na maifyo,

² kuti ukufuma kasalaka mutashala un-tama sha antu, leelo unkukunda kwi Leesa uku manda ino, yano yashala ukwikala kuno ukusi.

³ Kuno amanda ya mikalo itu aya kali, yaati yavula ukuchita fino akulukuwa yakunda, ukuwa ni mvimbi ni tama nukolesi, ni vimulo vya mvimbi ni vya kukoleka, nu kupepa imyao chino chitaile.

⁴ Ichino yasunguka mwemwi ukuntalondekana ponga nayo un-nyamfi uo, angi yalumwifikisha.

⁵ Leelo nayo yalulanda kuli wino ali suwa ukuyaputwila imilandu yao apuma nafwi.

⁶ Kuno uku ifintu fiyo nayano yafwa kwene yasushilwe iswi-sipe, ukuti yaputwilwe imilandu yao uku mwili, ndi fino antu yakuputwilwa, leelo yawe apuma uku mweso, ndi fino Leesa ali.

Miele ya aklisto

⁷ Leelo ukusila kwa ifintu fyoshi ukupalamila. Ichino, muwe na mano, angi mulamwike uku kusalika.

⁸ Ukuluta fyoshi muwe nunte ukukundana, kuno ulukundo lukulukuwa ukufula kwa maifyo.

⁹ Muchitane ilya untu nanti kung'wing'wisa.

¹⁰ Chila ntu ndi fino wapokelile uwila, muuombele uku kwaswana, wi yakasunga asipe aya nkumbu tupu ishi Leesa.

¹¹ Untu ngalufwanga, afwange wa maswi yi Leesa. Untu ngaluomba, aombe uku maka yano wapiwa na Leesa. Ukuti Leesa atensiwe uku ifintu fyonsi kuli Yesu Klisto. Ukulu na maka yali nawe manda ti na ti. Chiwe fiyo kwene!

¹² Yakundikwa, mutachisunguka pa moto wa machulo, uno uli pano muli uwa kumwesha, ungati ichintu chipya chino chamuzana.

¹³ Leelo ndi fino muminkine um-machulo yi Klisto, chimbai, ukuti apa kusweluka kwa ukulu waakwe muchimbe uku nsânsa.

¹⁴ Ngi mwavwangilwa ifiipe uku nnandu wizina li Klisto, inkata yino, kuno Mweso wa ukulu nu wi Leesa umwikalile.

¹⁵ Kuno untu wa kuno muli atachula wa mumosi nanti wa mwivi, nanti wi kachita wa viipe, nanti wa nkwakwa.

¹⁶ Leelo, ngi wachusiwa kuno unklisto, atachilola insoni, leelo amtensye Leesa ukwisina liyo.

¹⁷ Kuno amanda iyafika aya uputusi wa milandu ukutalikila a ng'anda yi Leesa; ngi yatangula kuno tuli, ichisila kuli yao yano yatayela izwzi-ipe ilyi Leesa chiluwa uli?

¹⁸ “Nga ndi uwa chumi wafyuntuka, wino ataachindike Leesa nu wa maifyo chiluwa uli?”

¹⁹ Ichino yano yaluchula ndi fino Leesa akasime, yamwikila imyeso yao uku kuomba ifisipe kuli Kaumba wa kuta ilwa.