1 Petlo 3 - UPANGANO UPYA

uMoshi nu waakwe

¹ Ifino nemwe kwene yanachi, mutontele ya wino, ukuti ndi kuli yamwi yano yatasumile Iswi, yalolele uku miele ya yachi yao, ukwaula iswi,

² angi yalulola imiele ino iya ningo, yawe ni chopo.

³ Ukuuyemvya kwino kutawa uku uyemvya kwa kunzi, alikuti: ukulûka inyele, nanti ukutela iviyembo vya zaabu nu kuzwalilila imyenda.

⁴ Leelo kuwe uuntu-wa-mweso-uno-utakuloleka, uku fiyembo fino fitakononeka, alikuti, umweso uno watonta nu kutekana, uwa mpangila apa maaso yi Leesa.

⁵ Kuno fiyo kwene ifino anachi aswepe ya kali yauyemvyanga, yano yataile Leesa nu kuchindika ya iya.

⁶ Ndi fino Sala wachindike Ablahamu, angaluti “mwene.” Nemwe mwawa yana yaakwe, ndi mwanchita ifisiipe, nanti kopa chimwi.

⁷ Nemwe kwene ayonsi, mwikale na achi ino uku mano, nu kuchindika uwapako, wa chifya ichisi na maka, kuno nayo kwene apyani ya nkumbu sha upuma ponga nemwe, kuti ukupepa kwino kutalesiwa.

uLukundo nu welesho

⁸ Apa kumalila: mwensi muwe nimweeso onga, uwa nkumbu, yano mwakundana wa yali yonga, mutontelane nu kuuchefya,

⁹ antu asi ni chilandusi, nanti ukusuwilisha intusi apa kutukwa, leelo alupepelela, kuno fiyo ifino mwitilwe, kuti mupyane upepelelo.

¹⁰ Kuno: “Wino angakunda mikalo nu kulola amanda yasipa, asunde akalomo kakwe ukuvwanga ifiipe, ni milomo yaakwe ukuvwanga ifya ntumpu.

¹¹ Ate ifiipe, achite ifisiipe, asite utekano nu kuukonka.

¹² Kuno amaso ya Mwene yakululola aya chumi, na makutwi yaakwe yakulupulika ukupepa kwao. Leelo Mwene akuyapa inkonto yakachita ya viipe.”

uKutekelela um-machulo

¹³ Nawe uwini wino angamusunya ndi mwawa nunte ukuchita ifisiipe?

¹⁴ Leelo ngi muluchula uku nnandu wa chumi, inkata ino. Mutachopa ukofya kwao, nanti ukusima.

¹⁵ Leelo mwimike Klisto ukuwa uMwene um-myeso ino. Muuteyanye manda yoshi ukunena untu wensi, wino wamutondosha apa utailo wa myeso ino, leelo uku utekesu ni chopo.

¹⁶ Nemwe muwe ni myeso misipe, ukuti ukwiswi lino muluifikisiwa, yakulwe yano yalusula imiele ino imisipe muli Klisto.

¹⁷ Chingawa ningo ukuchula uku vizipe, ndi fino Leesa akasime, kuleka ukuchita ifiipe.

¹⁸ Kuno na Klisto kwene wachusile lyonga uku nnandu wa maifyo, uWa-chumi uku nnandu wa yantu yasi ya chumi, ukuti atutwale kuli Leesa; umolwa uku mwili, leelo uku Mweso wapiwe upuma.

¹⁹ Muli uo kwene waile asunda imyeso ino yanyepwa umu nyololo,

²⁰ yano kali yatandikwe pano Leesa wayalolelanga uku chelelesi, um-manda i Noa, pano isafina ichili ilupangwa, muno yache, antu nnane sile, yafyusiwe, uku masi.

²¹ Chikoline nu lubatiso, luno lulumufyusha nemwe manda ya kasalaka, luno lutalufula ikwi lya mwili, leelo ululi ipepo kuli Leesa, ukuwa ni myeso misipe, uku kututuluka kwi Yesu Klisto.

²² Wene ali ukwikasa li lunji ili Leesa, wapita umwiyulu walâsa yamalaika na tesi na ya maka.