1 Petlo 1 - UPANGANO UPYA

¹ Petlo untume wi Yesu Klisto, uku yasololwa yasambala, yano yatesi uweni um-Ponto num-Galatia num-Kapadokia num-Asia num-Bitinia,

² kuyana nu kumanya inkolelo kwi Leesa Tata, nu kuswefiwa nu Mweso, kuti muchindike nu kukontolelwa uwasi wi Yesu Klisto. Inkumbu nutekano sifule kuno muli.

Utailo wa maka

³ Atensiwe Leesa, Tata wa Mwene witu Yesu Klisto, wino uku nkumbu shaakwe tupu, watufile ilya uwili, ukuti tuwe nutailo wa upuma, uku kututuluka kwi Yesu Klisto uku yafwi,

⁴ tuwe nupyani utakuola utakufita utakunyala, uno mwawikilwa umwiyulu.

⁵ Nemwe mulusungwa na maka yi Leesa uku nsila ya usumilo, kuti mupokelele ufyusi, uno wateyanyiwa ukuswelulwa um-manda ya mpelelekesho.

⁶ Chimbini nkani muli fiyo kwene, nanti fino kasalaka uku manda mache, ndi chawa, mwalola malanda pa kwesiwa um-ifintu na ifintu,

⁷ kuti kwesiwa kwa usumilo wino, uno ulusile nkani isaabu ino ikusila, nanti fino ikulwesiwa um-moto, kuloleke uku utensho nukulu nu nchinsi, pano Yesu Klisto wacha wasokoloka.

⁸ Wino mwakunda nanti fino mutachili munnole; wino, nanti fino mutalunnola li kwene, mumsumile, nu kuchimba nkani uku kuchimba kukulu kuno kutangi kulandikwe.

⁹ Uku kupokela umalililo wa usumilo wino, alikuti ufyusi wa myenzo ino.

¹⁰ Apa ufyusi uo yakalausha yausitanga nu kulondosha ukunte, yano yalawishe inkumbu sino silumwisila mwemwe.

¹¹ Yasita ngi li nanti amanda chi yano uMweso wi Klisto, uno wali muli yeneyo, wayasontelile nu kwimikila inkolelo amachulo yano yalusana Klisto, nukulu uno uluwako ichisila.

¹² Yaswelwilwa fino fisi kuli yao sile, leelo kuli mwemwe yaomfile ifintu fiyo, fino kasalaka filusundwa kuno muli na yano yalumusunda iswi-siipe uku Mweso Nswefu, wino watumilwe ukufuma umwiyulu. Ifintu fi na yamalaika kwene yalukumbuka ukuvilola.

Mikalo misipe

¹³ Ichino mswale sileme um-myeso ino, mutekane nu kutaila ningo nkumbu sino mululetelwa uku kusweluka kwi Yesu Klisto.

¹⁴ Wa yana ya nchinsi, mutalondelela ukukumbuka kwino ukwa ntangulo, ukwa kuntamanya kwino,

¹⁵ leelo wino wamwisile ndi fino Unswepe, nemwe kwene muwe yaswepe um-mikalo ino yoshi.

¹⁶ Kuno chaandikwe: “Muwe yaswepe kuno nemwi nene Nswepe.”

¹⁷ Ngangi mulumwita we Tata, wino akuputula imilandu ya antu nanti usolosi, ukuyana nu nnimo wi chila wenga, muwe ni chopo apa manda ino ayakwikala kuno wa yeni.

¹⁸ Nemwe mumanye fino mwakulwilwe asu ku ifintu fino filuola, kuli fesa nanti saabu, kuti mutine um-wikalo wino uno utasifile, uno mwapokelile kuli yaso ino,

¹⁹ leelo uku wasi wa mpangila, ndi kuti uwa mwana-nfwele wino asi ni ndeme nanti lyala, ali wi Klisto.

²⁰ Wino wamanyike fuma kali, lino insi ichili yalengwa, leelo waswelwilwe uku manda ya chisila uku nnandu wino,

²¹ yano kuli wenewe mwawa yakusumila Leesa, wino wamtutulwile uku yafwi, ampa ukulu, kuti usumilo wino nutailo wino uwe kuli Leesa.

²² Pano mwaswefya imyeso ino uku kuchindika ichumi, muwe nu lukundo lwa ali yonga ulusi lwa ufi, muchite amaka uku kundana uku mweso.

²³ Kuno mwafyalwa ilya uwili, kusi uku mbesu ino iluola, leelo ino itakuola, ukwiswi li Leesa ilya upuma ilya manda yoshi.

²⁴ Kuno: “Antu yoshi yali wisote; nukulu waakwe onsi uli wa ngala ya mwisote. Isote lilunyala, ni ngala ilukuta.

²⁵ Leelo iswi lya Mwene lilipo manda ti.” Ni iswi liyo iswi-siipe lino lyasundwa kuno muli.