1 Kolinto 7 - UPANGANO UPYA

Kufumalila nu kuntafumalila

¹ Nga uku ifintu fino mwandika, chazipa umonsi atachema umwanachi.

² Leelo ukunnandu wa upundu umonsi wensi awe nunchi, nu mwanachi wensi awe niya.

³ Umonsi ampe unchi chino chiine, nu mwanachi kwene ampe iya chino chiine.

⁴ Umwanachi asi na maka uku mwili wakwe, leelo iya; ifino nu monsi kwene asi na maka uku mwili wakwe, leelo unchi.

⁵ Mutachikanana, shuko lino mwazumilizyanya uku makati yamwi, kuti muwe nu wasa wa kuiwika un-kupepa, nga kaili muwelelana, kuti Shetani atamwesha ku kuntapupusha kwino.

⁶ Navwanga pa lwane nene, uku kumwazwilisha, leelo kusi ku maka yisunde.

⁷ Leelo chino nkasime ukuti antu yoshi yangawa ndi fino nene ndi. Leelo chila ntu ali nu wila apa lwakwe uno wapiwa na Leesa, wenga vi nunji vi.

⁸ Yano yachili yapindula na yano yafwilwa nayanena fi: Chingazipa, ndi yikala ndi finondi.

⁹ Leelo ngi yatangi yateke imyeso, yapindule. Kuno chingazipa ukupindula kuluta ukulemwa ni nyengwa.

¹⁰ Na yano yapindulana nduyakonkomesha, nga penepo asi nene, leelo Mwene, umwanachi atachitana niya.

¹¹ Leelo ngi watana nawe, awikale atachisakwa, manye apulikane niya; niya kwene atachita unchi.

¹² Leelo antu yanji nduyanena nene, asu Mwene, fino ngi uwachitu umwi ali nunchi wino atasumile, nu mwanachi wiyo azumile ukwikala nawe, atachimta.

¹³ Nu mwanachi wino ali niya atasumile, nu monsi wiyo azumile ukwikala nawe, atachifuma muli iya.

¹⁴ Kuno umonsi wino atasumile, akuluswefiwa uku nchi, nu mwanachi wino atasumile, akuluswefiwa kuli iya; ngi chitali chiwe fiyo, ana ino ngangi yataswefile, leelo kasalaka yaswepa.

¹⁵ Leelo wino atasumile, ndi wasita kutana, yantana. Na po pao uwachitu wiyo, ndu monsi nanti umwanachi, atanyepike; kuno Leesa watwitile uku welezyo.

¹⁶ Kuno umanyile uli, we mwanachi, ngi ulufyusya uwako? Nanti umanyile uli we monsi, ngi ulufyusya uwapako?

Shala ndi fino Leesa wakwishile

¹⁷ Leelo, ndi fino uMwene wankinye chila wenga, ndi fino Leesa wisile chila wenga, afino angali; ifino ndusisintizya um-makongani yoshi.

¹⁸ Chene! untu umwi witwa angi wachitwa ichibalu? Atauchita ungati atachisilwe ichibalu. Umwi witwa angi atachili achitwe ichibalu? Fwandi atachichitwa ichibalu.

¹⁹ Ukuchitwa ichibali chisi chimwi, nu kuntachitwa ichibalu chisi chimwi, siku ukulema amasunde yi Leesa.

²⁰ Untu wensi awikale vivi kwene, ndi fino wali pano wisilwe.

²¹ Chene! wisilwe angi we nzya? Utachilola fino chaipa, leelo ndi wawezya ukuwa kauwele, chili ningo ukuuombela.

²² Kuno wino wisilwe um-Mwene angi unzya, uku Mwene wakululwa. Ifino na wino wisilwe wakululwa, unzya wi Klisto.

²³ Mwakazilwe uku mpangila. Mutawa azya yaantu.

²⁴ Yachane, untu wensi awikale pali Leesa, angi ali ndi fino wisilwe.

Pali yano yatafumalile na asimbe

²⁵ Asungu ntakwite ichilangaso cha Mwene kuli yeneyo. Leelo nalanda icha pa lwane, ne wino napiwe inkumbu zya Mwene ukuwa uwa kutailwa.

²⁶ Nalola fino chazipa ku nnandu wa machulo ya kasalaka, ukuti, chazipa untu ukwikala ndi fino ali.

²⁷ Ngi wanyepwa uku mwanachi, utachisita ukusapulwa; ngi wasapulwa, utachisita umwanachi.

²⁸ Leelo nanti wapindula, utaifizye; nanti ndi wapindukwa, ataifizye. Leelo antu ndi yao yangawa na machulo um-myili. Nene ndusita ukumufyusya kuli vyenevyo.

²⁹ Leelo yachane, ndumunena vi: amanda yano iyasyala, yasi tupu: Ichino ukufuma kasalaka yalye yano yali nachi, yawe ungati yatakwite.

³⁰ Na yano yalulila yawe ungati yatalulila; na yano yaluchimba, yawe ungati yataluchimba; na yano yalukala, yawe ungati yatakwite chimwi.

³¹ Na yano yaluombola ivya kuno ukunzi, yakole ungati yataluviombela nkani. Kuno ifintu vya kuno ukunzi vilupita nu kusila.

³² Leelo ndusita kuti mutachiziwa na chimwi. Wino atapindwile, akuluchuchumbikila ifintu vya Mwene, kuti azifye uli uku Mwene.

³³ Leelo wino wapindula, akuluchuchumbikila ifintu vya kuno ukunzi, fino angazifya uku nchi; wawa na melenguzi yaili.

³⁴ Nu mwanachi unfwilwa nu nsungu kwene, yaluchunchumbikila ifintu vya Mwene, kuti yaswepe ku mwili numweeso. Leelo wino wapindukwa, akuluchunchumbikila ifintu vya kuno ukunzi, achite uli kuti azifye kuliya.

³⁵ Nduvwanga vi kuti chimuzipile, asi kuti imutyile untembo, leelo kuli fino vizifile, na kaili kuti muombele uMwene nanti kulondela ifintu vinina.

³⁶ Leelo ndu ntu tunwi walola fino aluchita chino chitazifile uku mwanakwe unsungu, ndi wakulila, ndi chawa ichakuti apindukwe, achite chino akasi; atachisile iifyo; ayate aleke yapindulane.

³⁷ Leelo wino wasimpa um-mweso wakwe, kusi chimwi chakumzungola, leelo angatekamweeso wakwe, na kaili wasolola um-mweso wakwe, ukulesya umwanakwe unsungu atachipindukwa, aluchita ichizipe.

³⁸ Ichino wino alupindusya umwanakwe unsungu, aluchita ningo, na wino atampindwisye aluchita ningo kuluta.

³⁹ Umwanachi wanyepwa kuli iya lyonsi lino iya achili umpuma. Leelo ngiya wafwa, angi wasapulwa, angatolwa na wensi wilye wino wakunda, muli yano yali um-Mwene sile.

⁴⁰ Leelo chingazipila nkani ndi wikala fino ali; ifino nalola nemwi; nene nduwelengula fino ndi nu Mweso wi Leesa.