1 Kolinto 4 - UPANGANO UPYA

Uomvi wa mitume

¹ Ichino untu wensi atumanye, fino sweswe yaomvi yi Klisto na yakasunga ya melengwe yi Leesa.

² Nga chino chilusitiwa kuli kasunga, imtu aloleke fino uwa kutailwa.

³ Leelo kuli nene nemwi chisi chimwi ngi mwamputwila unnandu, nanti uku uputuzi wa antu; nanti ntaluuputwila apa lwane.

⁴ Kuno ntawine icha kuusongelela apa lwane, leelo ntalwalilwa ichumi kuli chenecho; leelo wino angaputwila unnandu, uMwene.

⁵ Ichino mutachiputula unnandu wiswi limwi, pano amanda yakwe yachili yafika, ukufika na lino uMwene alwiza, wino alukozya ifintu vyonsi fino vyafisama un-chanda, na kaili uwino aluswelula apatiswe amelenguzi ya myenzo. Pao apano chila ntu alulola ichakuti autensezye kuli Leesa.

⁶ Uku ifintu vi yachane, ntisenwila kuli nene na kuli Apolo pa nnandu wino, ukuti, musambilile kuli sweswe mutaluta yalye fino yaandikwe, ukuti kutawa umwi wino angautensya apa nnina ukuti uwikolo.

⁷ Kuno uwini wino angakusyutanya nu nnyonko? Uli na chani chino utapokelela? Ngangi wapokelile, aluutensezya chani ungati utapilwe?

⁸ Mwati mwikuta, mwati musaya; mwauwika uwene, pano sweswe tusipo. Endita, ngangi mwalasa, ukuti neswe tulase ponga nemwe.

⁹ Kuno ndulola Leesa watuwika swe, mitume uku chisila, wa yantu yano yaputwilwa imilandu ya kufwa, kuno tululolekesyiwa na yantu ya nsi yoshi, kuli yamalaika nu ku yantu.

¹⁰ Swe viwele-wele uku nnandu wi Klisto, leelo mwemwi mwe ya mano muli Klisto; swemwi twatonta, leelo mwemwi muli na maka; mwemwi muli nukulu, leelo swemwi twasulwa.

¹¹ Na li kwene li tuli ni nzala nunsala, tuli tupu, tulumwi ifikonde, na kaili tusi na pa kwikala.

¹² Na kaili tuluchula, tuluomba imilimo uku makasa yitu swe yakola. Ngi twatukwa tupepelela; ngi twachuziwa tuzizimizya.

¹³ Ngi twaifikishwa utukopelesha; twachitwa wa ifikona vya kuno ukushi, wi ikwi lya ifintu vyonsi fika ni leelo li.

¹⁴ Ntalwandika ifintu vi kuti mukuzye imitwe, leelo kuti musunde wa yanayano yakundikwa.

¹⁵ Kuno nati mungawa na yakasambilisha ielfu ikumi muli Klisto, leelo mutakwite yaso tupu. Kuno nene namuvile muli Klisto Yesu uku nzila yiswi-zipe.

¹⁶ Ichino ndumusunda: mundondele nene.

¹⁷ Ichino fi natuma Timoteo kuno muli, nawe umwanane imkundikwa uwa kutailwa um-Mwene; wino alumwelenguzya inzila zyane muli Klisto, ndi fino nkulusambilizya monsi monsi muli chili kanisa.

¹⁸ Yamwi yaluuwanzya kunti ntalwiza kuno muli

¹⁹ Leelo ndwiza zuwa kuno muli, ngi nakolelelwa; nene ndumanya asiswi lyao sile yano yauwanzyanga, leelo amaka yao.

²⁰ Kuno uwene wi Leesa usi umwiswi, leelo um-maka.

²¹ Mulusita chani? Kuche ngize ni ntuwa, nanti kuche ngize nu lukundo numweeso utonte?