1 Kolinto 3 - UPANGANO UPYA

Usuwa ni fitina

¹ Nga yachane, ntangi fwange nemwe ungati antu ya ntambi-ya-mweso, leelo ungati antu ya ntambi-yamwili sile, wa yanche yanono muli Klisto.

² Namonsizye iyele, ntamupanga ichakulya ichikomu, kuno mutangi muchilye. Muchili yantu ya ntambi-ya-mwili;

³ Kuno ngi muchili nusuwa ni fitina, Chene! musi yantu ya ntambi-yamwili? ni miele ino isi ya chiuntu?

⁴ Kuno pao pano wenga aluti: “Nemwi nene wi Paulo”; nunji ati: “Nemwi nene wi Apolo”; Chene! musi nu, untu wa kali?

⁵ Nga Apolo uwini? Na Paulo uwini? Aomvi yano mwasumile kuli yeneyo, na chila ntu ndi fino uMwene wampile.

⁶ Nemwi napezile na Apolo witilile amasi, leelo wino alukuzya i Leesa.

⁷ Ichino chisi chimwi wino alupela, nanti uwino alwitilila amasi, leelo wino alukuzya, i Leesa.

⁸ Ichino wino alupela na wino alwitilila amasi, ali yonga; leelo chila ntu alupiwa unnambu apa lwakwe ukuyana na machulo yakwe:

⁹ Kuno swemwi yaomvi ponga na Leesa; mwemwi mwe chalo chi Leesa, mwe ng'anda yi Leesa.

Kukula ng'anda apa ichiimbili

¹⁰ Ukuyana ni nkumbu shi Leesa zino napilwe, nene wi kakula unkulu wa mano, nawishile ichiimbili, untu unji alukula penepo; leelo chila ntu alole fino alukula penepo.

¹¹ Kimo ichiimbili chinina kusi wino angachiwika, siku chino chati chiwikwa, ali Yesu Klisto.

¹² Leelo ngu ntu wakula apa chiimbili chio, isaabu nanti feza, nanti amafinga ya mpia tupu, nanti iviti, nanti amafwa, nanti amasote, unnimo wi chila ntu ululoleka apatiswe.

¹³ Kuno uwanda ulye ululangizya, kuno ululoleka nu moto, nu moto uo ulwezya unnino wi chila ntu ndi uli uli.

¹⁴ Unnimo wi chila ntu uno wakuzile ngi wasyala penepo, alupokelela unnambu.

¹⁵ Ngu nnimo wi umwi wapya wasikisa, aluulovya, leelo unkola alufyusiwa, leelo ungati ukusompolwa um-moto.

¹⁶ Mutamanyile fino mwemwe ng'anda yi Leesa na fino uMweeso wi Leesa utenzi muno muli?

¹⁷ Ngi wino wonona ing'anda yi Leesa, Leesa alumonona. Kuni ng'anda yi Leesa inswefu nayo ali mwemwe!

¹⁸ Umwi atachiuzosya unkola! Ndi umwi waulola ali na mano pali mwemwe kuno ukunzi, awe ichiwele-wele, kuti awe uwa mano.

¹⁹ Kuno amano ya nsi yi apa manso yi Leesa uwele-wele. Kuno chaandikwe: “Wene uwino akululema aya mano uku uchenjezu wa mana yao.”

²⁰ Na kaili: “Mwene amanyile amelenguzi ya antu ya mano fino ayachaka.”

²¹ Ichino umwi atautensya uku antu; kuno vyonsi ifino.

²² Ngi Paulo, nanti Apolo, nanti Kefa, nanti insi nanti upuma nanti infwa, nanti ifino vili penepo pa li kwene, nanti ifino viluwako, vyonsi ifino.

²³ Leelo mwemwi mwe yi Klisto, na Klisto uwi Leesa.