1 Kolinto 16 - UPANGANO UPYA

Kusangila azumila. Lwendo lwi Paulo

¹ Leelo uku kusangila aswefiwe, ndi fino natasile um-makongani ya ku Galatia, nemwe kwene chitai fiyo kwene.

² Uwanda wa ntangulo uwa kutampa ijuma, chila wenga kuno muli auwikile ukuyana nu kupata kwakwe, ukuti mutache munsanga pano ningiza.

³ Nene pano nacha niza, ndutuma uku mbaluwa yao yano mwacha mwasolola, ayano ndutuma yasende uwila wino uku Yelusalemu.

⁴ Ngi chawa icha kuti nene kwene mpite, yalupita ponga nene.

⁵ Leelo ndwiza uku mwino ano pnacha nachila Masedonia, kuno ndupitilila Masedonia.

⁶ Palumwi ndutana ngikale uku mwino, endita, chingawa amakati yoshi aya nzusi, kuti muntwale konsi kuno nduya.

⁷ Kuno ntalusita ukulolana nemwe li kwene pano mpisile, kuno ndusita ukwikala uku mwino amanda yamwi ngu Mwene wampa upuma.

⁸ Leelo ndwikala uku Efeso ukuno iPentekoste inzanile.

⁹ Kuno ntiyulilwa unnyango ukulu ichizipe nkani, na kuli ainji yano yalundesenkanya.

Maswi ya kumalila nu kulaula

¹⁰ Leelo ngi Timoteo wacha wiza, muleke awikale ningo nanti ngofi, kuno aluomba unnimo wa Mwene wi nene kwene.

¹¹ Ichino untu wensi atachimsula; mumsindikile apite lumi ukwiza kunondi, kuno ndunnolela ponga nachitu.

¹² Leelo Apolo uwachitu nannailila nkani, kuti apite ponga nachitu yao, kuno muli, nawe atakasime ukupita apa kasalaka, leelo alwiza pano wacha wayulilwa.

¹³ Mutachilala, mwimisye umu usumilo, chitini cha chonsi, muwe na maka!

¹⁴ Ifintu vyonsi fino muluchita, viombeke undukundo.

¹⁵ Na kaili yachane, ndumulailila: mumanyile antu ya ng'anda yi Stefano, fino alu ntomolo wa mu Akaya, nayo yingila um-milimo yalwazwa aswefiwe.

¹⁶ Antu ndi ya muyachindike, na wensi wino aluomba imilimo nu kuchula ponga nayo.

¹⁷ Nene nduchimba kuno Stefano na Fotunato na Akaiko yiza, kuno yao yandetile chino naulilwa kuno muli.

¹⁸ Kuno yantekile umweso wane ponga ni myenzo ino. Ichino mumanye antu ndi yao.

¹⁹ Amakongani ya mu Asia yalumulaula; Akila na Plisika yalumulaula nkani um-Mwene, ponga nikongani Iya ng'anda umwao.

²⁰ Achitu yoshi yalumulaula. Mulaulana umwi tosolo liswepe.

²¹ Unnau u uwane ne Paulo ukwikasa lyane nenkola.

²² Nguntu wensi ataakunda uMwene, angi waatipwa. Malanatha.

²³ Inkumbu zya Mwene Yesu ziwe ponga nemwe.

²⁴ Ulukundo lwane luwe ponga nemwe mwensi muli Klisto Yesu.