1 Kolinto 15 - UPANGANO UPYA

Ututuluko wi Klisto

¹ Ichino yachane, namumanyisya iswi-zipe lino namusunzile, uli lino mwapokelile, na muli lyenelyo mwimilila.

² Na kuli lyenelyo mulufyusiwa, ndi mululemasya amaswi yano namusunzile, ngi mutazumile sile.

³ Kuno namupile apa ntangulo yano napokelile nenkola; fino Klisto wafwile uku nnandu wa maifyo itu, ndi fino aMaandiko yavwanzile.

⁴ Na fino wazyisilwe, watutulwike pa wanda wa utatu, ndi fino aMaandiko yavwanzile.

⁵ Na fino walolike kuli Kefa na kuli yaya ikumi na yaili.

⁶ Ni chisila walolike uku yachitu imyanda isano ponga, pali yeneyo ainji yachilipo na li kwene, leelo yamwi yalala ifyala.

⁷ Ichisila walolike kuli Yakobo na kaili uku mitume yoshi.

⁸ Ni chisila chayantu yoshi walolike kunondi, kanti untu wino wavilwepano amanda yatatana yafika.

⁹ Kuno nene nnono apa mitume, ntaine ukwitwa untume, kuno nasunyile ikongani lyi Leesa.

¹⁰ Leelo uku nkumbu zyi Leesa nawa vi finondi; ni nkumbu zyakwe zino zili kunondi, zitali zya chaka, kuno ndusizye nkani ukuomba imilimo ukuluta anji yoshi; nga asi nene, leelo inkumbu zyi Leesa zino zili ponga nene.

¹¹ Ichino ngi nene nanti aliyo, ifino tukusunda, kaili ifino musumile.

Ututuluko wi yano yafwa

¹² Ngi Klisto alusundwa fino watutuluka uku yafwi, nga fino yamwi pano muli yakuluti, kusi ukututuluka kwa yafwi?

¹³ Leelo ngi kusi ukututuluka kwa yafwi, na Klisto kwene atatutulwike.

¹⁴ Na ngi Klisto atatutulwike, fwandi, ukusunda kwitu ukwa chaka, nusumilo wino uwa chaka.

¹⁵ Endita, neswe twaloleka fino swe yasyuta yi Leesa aya ufi. Kuno twimikile Leesa usyuta, ukuti watutulwile Klisto, wino atamtutulwile, ngafwi yatalututuluka.

¹⁶ Kuno ngafwi yatalututuluka, na Klisto kwene atatutulwike.

¹⁷ Na Klisto ngi atatutulwike, usumilo wino uwa chaka, muchili uminaifyo yino.

¹⁸ Na yani yalala ivyala muli Klisto angi yalowa.

¹⁹ Ngu mupuma u sile umuno twataila Klisto, sweswe tuli yapina ukuluta antu yoshi.

²⁰ Leelo li kwene, Klisto watutulwike uku yafwi, wawa untomolo kuli yano yalala ivyala.

²¹ Kimo infwa yalesilwe nu ntu, ifino nu kututuluka kwa yafwi kwalesilwe nu ntu.

²² Kuno ngi muli Adamu yoshi yafwa, ifino na muli Klisto yoshi yalututululwa.

²³ Leelo chila ntu apa lwakwe: Klisto alu ntomolo, apa chisila ayi Klisto apa kwiza kwakwe.

²⁴ Apano mpelelekezyo alupa Leesa Tata uwene wakwe, pano wacha wapoka ulâsi onsi, nukul onsi, na maka yoshi.

²⁵ Kuno chilungime alâse fika na lino alwika yasiluembu yaakwe yoshi apansi apa mulu yaakwe.

²⁶ Siluembu wa chisila wino alononwa, infwa.

²⁷ Kuno wawisile ifintu vyonsi apa mulu yakwe. Leelo pano watile: vyonsi vyawisilwe, apaswe fino Wino wannâsizye ifintu vyonsi, asipo.

²⁸ Apano ifintu vyonsi ngi vyawikwa panali, apano nu Mwana aluwuwika panali wino wamwikile ifintu vyonsi, ukuti Leesa awe vyonsi na muli vyonsi.

²⁹ Nanti ayano yabatiziwilwa uku yafwi yaluchita uli? Ngafwi yatalututululwa nanti uche, kuno ichani ukubatiziwa kuli yeneyo?

³⁰ Neswe kuno ichani tuli un-choze makati yoshi?

³¹ Yachane, uku utensyo wane kuno muli, muli Klisto Yesu uMwene witu, ndufwa manda yoshi.

³² Ngu ku untu nalwile ni vikalakasi uku Efeso, napata chani? Ngafwi yatalututuluka, tulyae nu kunwa, kuno iyulu tulufwa.

³³ Mutachilowana; kuno amaswi maipe yakulonona intambi nzipe.

³⁴ Muombele amano fino chiile nga mutachita maifyo, kuno yamwi yatamanyile Leesa. Nduvwanga fiyo kuti mukuzye imitwe. Mwili wa ntutuluko.

³⁵ Leelo palumwi umwi angati: yalututuluka uli afwi? Yakulwiza nu mwili wa uli?

³⁶ Chiyungani wee! Chino ukulupela, chitakumela, ngi chitane chiole.

³⁷ Nayo ino wapela, utapezile umwili uno uluwako, leelo imbezu sile, ngi yangano, nanti inji kwene.

³⁸ Leelo Leesa akuluipa umwili ndi fino akasime, na chila mbezu umwili wakwe.

³⁹ Imyili yoshi isi ili yonga, leelo kuli umwili onga uwa antu, nu mwili unji uwa vinyama, nunji uwa vyuni nunji uwa nswi.

⁴⁰ Na kaili kuli imyili ya mwiyulu ni i myili ya kuno ukunzi, leelo ukuzipa kwakwe iya mwiyulu kulekine ni ya kuno ukunzi.

⁴¹ Kuli uzipe onga uwilanzi nuzipe unji uwa mwezi, nuzipe unji uwa ntanda, kuno ukuzipa kwa ntanda kwene kulekine apa lutanda nu lunina.

⁴² Ifino nu kututuluka kwa yafwi fiyo kwene; kukulupelwa uku ononi kucha ututuluka um-upuma.

⁴³ Ukulupelwa uku nsoni, ututuluka uku ukulu; ukulukomelwa uku utonte, ututuluka um-maka.

⁴⁴ Ukulupelwa umwili wa chiuntu, ukulututuluka umwili wamweeso. Ndi uliko umwili wa chiuntu, nuwamweeso kwene ulipo.

⁴⁵ Ifino chaandikwe: Untu wa ntangulo, Adamu, wawa umweso mpuma; Adamu wa chisila umweso wakupa upuma.

⁴⁶ Leelo uwamweeso utakutangula, leelo uwa chiuntu pa chisila ulondelela uwamweeso.

⁴⁷ Untu wa ntangulo wafumile apansi, untu wimatwa; untu wa uwili afumile umwiyulu.

⁴⁸ Ndi fino uwivu wali, ifino yoshi aivu yali; na fino uwa mwiyulu ali, ifino yoshi aya mwiyulu yali.

⁴⁹ Neswe fino twatozile chata chi wiyo uwivu, ifino tulutola chata chakwe kwene wiyo uwa mwiyulu.

⁵⁰ Yachane, chino navwanga ichi: fino umwili nu wazi vitangi vipyane uwene wi Leesa, nanti ukuola kupyane ukuntaola.

⁵¹ Lolini, namunena melengwe. Tutalulala vyala swensi, leelo swensi tulusenuluka,

⁵² uku kazimbo kache, ukukopansya nu kulola api penga lya chisila; kuno ipengo lilulila, nafwi yalututuluka asi ya kuola, neswe tulusenuluka.

⁵³ Kuno chilungime eu wa kuola, uzwale uwa kuntaola, nau uwa kufwa uzwale ukuntafwa.

⁵⁴ Ichino eu uwa kuola pano wacha wazwala ukuntaola, nau uwa kufwa pano wazwala ukuntafwa, apano lilufikilila iswi lino lyandikwe, ukuti; Infwa yamilwa uku kupota.

⁵⁵ Kuli kwi, we nfwa, ukupota kwako? Kuli kwi, we nfwa, nkuwaya kwako?

⁵⁶ Ukuwaya kwa nfwa amaifyo, na maka ya maifyo Amasunde.

⁵⁷ Leelo asamaliziwe Leesa, wino watupa ukupota um-maka ya Mwene witu Yesu Klisto.

⁵⁸ Ichino yachane, muzyansye, mutachitelengana, mulusye nkani ukuomba imilimo ya Mwene manda yoshi, kuno mumanyile fino milimo ino isi ya chaka umu Mwene.