1 Kolinto 14 - UPANGANO UPYA

Mawila ya ulau ni mivwango

¹ Londelini ulukundo nu kusita uwila wa Mweso. Leelo nkani kuti musunde.

² Kuno wino aluvwanga um-mvwango, atakuvwanga na antu, leelo aluvwanga na Leesa, kuno kusi wino alumanya; leelo aluvwanga ifintu vya melengwe u-mweso wakwe.

³ Leelo wino alusunda, aluvwanga na antu amaswi ya kuyakuzya, nu kuyasungula, nu kuyakomya imyenzo.

⁴ Wino aluvwanga um-mvwango, aluukuzya wenga, leelo wino alusunda, akukuzya ikongani.

⁵ Nene ndusita fino mwemwe mwensi mumvwanga ummivwango, leelo nkani ndusita musunde; kuno wino alusunda, alusile wino aluvwanga uku mvwango, siku ndi wasenulula, kuti ikongani likulwe.

⁶ Leelo kasalaka yachane, ngi niza kuno muli nu kuvwanga ululumi lunji, nduwa namupa chani, siku ndi navwanga nemwe, uku nzila ya kuswelula, nanti uku mano, nanti uku nzila ya kulauzya nanti uku nzila ya masambilizyo?

⁷ Nanti ifintu fino visi nupuma kwene, pano vilulila, nda ngawi mwilwa, nanti ndona, ndi vitalizile unnilo usyutane, chingamanyika uli fino umwimbo chi uno ululundwa kuli mwilwa nanti ndona?

⁸ Kuno ipenga ngi lyalila ichintamanyilika, uwini wino angauteyanya zuwa ukwisumo?

⁹ Ifino nemwe kwene, ngi mutavwanzile uku lulumi iswi lino limanyike, iswi lino muluvwanga lingamanyika uli? Kuno muluwa muluuvwangila chaka.

¹⁰ Kuli imivwango tupu kuno ukunzi, nga kusi nanti onga utamanyike.

¹¹ Kuno ngi ntamanyile umvwango uo uluti chani, nduwa wa mpupani kuli wino aluvwanga, na wino aluuvwanga, aluwa umpupani kunondi.

¹² Ifino nemwe kwene; fino mulusita nkani uwila wamweeso, mukunde angi muli nao nkani, ukuti mukuzye ikongani.

¹³ Ichino wino aluvwanga uku mvwango unji, apepe, kuti asenule.

¹⁴ Kuno ngi ndulomba uku mvwango unji, umweso waneulupepa, leelo ku mano yane kusi unzano.

¹⁵ Chili uli leelo? Nampepa ukumweeso, na nampepa nu ku mano kwene: nannunda ukumweeso, kaili nannunda nu ku mano kwene.

¹⁶ Kuno ndi wapepelela um-mweso wako, nga wino alipo angati uli: “Chiwe fiyo kwene!” apa kusamalizya kwako; nawe atamanyile chino uluvwanga?

¹⁷ Kuno mwenemo, wemwi ulusamalizya ningo, leelo unji atalukuziwa.

¹⁸ Ndusamalisha Leesa, kuno nduvwanga uku mivwango (muli Mweso) ukumulusya mwensi.

¹⁹ Leelo umwikongani ndusita ukuvwanga amaswi yasano uku mano yane, ukuti nsambilizya ainji, ukuluta ukuvwanga amaswi ielfu kumi uku mvwango.

²⁰ Yachane, mutawa na mano ya chanche, leelo uku viipe muwe wa anche; leelo muwe yikolo uku mano.

²¹ Um-vilangaso chaandikwe, ukuti: “Namvwanga na antu ya, uku mvwango wa yantu yanji, nu ku milomo ya eni, leelo nanti fino iviyo yatalumpulika!” ifino uMwene avwanzile.

²² Ichino imivwango ichilangizyo, kusi kuli yano yazumile, leelo kuli yano yatasumile; leelo ulau ulangizyo, kusi kuli yano yatasumile, leelo kuli yano yazumila.

²³ Ali ngi kanisa lyonsi lyakongana ponga, na yoshi yavwanga uku mivwango minina, nga yingila antu yano yatamanyile nanti ayano yatasumile, Chene! yatangi yaati: “Mwapena”?

²⁴ Leelo ndi yoshi yasunda, ngangi umwi wiza, wino atasumile, nanti uwino atamanyile, asundikwe na yoshi nu kuyangulwa na yoshi.

²⁵ Amelenguzi yakwe yawa apatiswe, apano alukupama nu kupepa Leesa, alusumila fino mwenemo Leesa ali ponga nemwe.

Ifintu ifilondekane

²⁶ Ali chili uli yachane? Pano mwakongana alawi angali nu mwimbo, nunji isambilizyo, nunji nuswelulo, nunji umvwango upya, nunji asenula; ifintu vyonsi viombeke uku kukuzya.

²⁷ Ngu ntu aluvwanga uku mvwango upya, yavwange yaili nanti yatatu, yataluta pao, na kaili uku kulekanila, na wenga asenulule.

²⁸ Leelo ndi kusi uwakusenulula, atuzye umwikongani, auvwangile um-mweso ponga na Leesa.

²⁹ Na yakalauzya yavwange yaili nanti yatatu, nanji yasolozye.

³⁰ Leelo unji wino atenzi ngi waswelwilwa iswi, uwantangulo atuzye.

³¹ Kuno mwensi mungasunda wenga wenga, ukuti yoshi yasambilile na yoshi chiyazipile.

³² Ni myenzo ya malau ikuluchindika amalau.

³³ Kuno Leesa asi Leesa wa mizungano, leelo uwa utekano.

³⁴ Ndi fino chili um-makongani yoshi aya aswefiwe, anachi yatuzye umwikongani. Kuno chaindwa ukuti yavwange, leelo yatontele ndi fino ni Ntambi kwene ivwanzile.

³⁵ Ngi yakasi ukusambilila chimwi, yatondosye yaiya yao uku mang'anda yao; kuno icha nsoni umwanachi ukuvwanga umwikongani.

³⁶ Nanti Chene! kuli mwemwe ukuno iswi li Leesa lyafumile? Nanti lizile kuli mwemwe mwenga?

³⁷ Ngu ntu umwi akuluulola fino ikalauzya nanti uwamweeso, amanye ifintu fiyo fino namwandikila, fino amatume nu Mwene.

³⁸ Leelo ngu ntuumwi wawa ichintamanya, asyale ichintamanya.

³⁹ Ichino fiyo yachane, mukundisye ukusunda, mutachilesya ukuvwanga uku mivwango mipya.

⁴⁰ Leelo ifintu vyonsi vichitwe ningo angi vilondekine.