1 Kolinto 1 - UPANGANO UPYA

¹ Paulo wino wisilwe ukuwa ntume wi Klisto Yesu ukukukunda kwi Leesa, na Sostini uwachitu.

² Ukwi kanisa lyi Leesa lino lili uku Kolinto, yano yaswefiwa muli Klisto Yesu, yano yitwa yawe aswefu, ponga na yoshi yano yalwita isina lya Mwene witu Yesu Klisto ponsi ponsi, uMwene wao na witu kwene.

³ Inkumbu siwe kuno muli nutekano, zino zifumile kuli Leesa Tata witu nu ku Mwene Yesu Klisto.

Kusamalizya Leesa

⁴ Ndu samalizya Leesa manda yoshi kuli mwemwe, uku nkumbu zyi Leesa zino mwapiwa muli Klisto Yesu,

⁵ kuno kuli chila chintu mwawa yasafi muli wenewe, uku maswi yoshi na mano yoshi.

⁶ Ndi fino usyuta wi Klisto wakomenkesyiwa kuno muli.

⁷ Ichino mutaulilwa uwila umwi, angi mululolela nkani ukusokololwa kwa Mwene witu Yesu Klisto.

⁸ Wino alumukomya fika ni mpelelekezyo, kuti mutasumbikilwa apa wanda wa kwiza kwa Mwene witu Yesu Klisto.

⁹ Leesa ali wa kutailwa wino wamwisile unkola, mwingile um-uminkano wa Mwanakwe Yesu Klisto, uMwene witu.

Kupalunkana

¹⁰ Ichino ndumusunda yachane, ukwishina lya Mwene witu Yesu Klisto, ukuti mwensi muvwange ichili chonga, kutachiwa ukutana; leelo kuti muwe ichilichonga numweeso onga.

¹¹ Kuno yachane nanenwa amaswi yino na yalye aya ng'anda yi Kloe, fino muli ni vitina.

¹² Ichino ndutaka fi, untu wensi pali mwemwe aluti: “Nemwi nene wi Paulo!” Nunji ati: “Nemwi nene wi Apolo!” Nunji ati: “Nemwi nene wi Kefa!” Nunji ati: “Nemwi nene wi Klisto!”

¹³ Chene! Klisto watapalunkana? Chene! Paulo wamufwilile? Nanti Chene! mwabatiziwe ukwizina li Paulo?

¹⁴ Ndusamalizya fino ntachili mbatizye umwi kuno muli, siku Klispo na Gayo.

¹⁵ Umwi atachi avwange, ukuti: wabatiziwe ukwizina lyane.

¹⁶ Leelo nabatizye antu ya ng'anda mwi Stefano kwene; ukuluta yao ntamanyile ngi nabatizye umwi kaili.

¹⁷ Kuno Klisto atantumile ukubatizya, leelo ukusunda iswi-zipe; nga kusi uku maswi ya mano, kuti unsalaba wi Klisto utize usulwe.

Mano yi Leesa yalusile aya antu

¹⁸ Kuno iswi lya nsalaba kuli yano yalulowa ilya uwelewele; leelo swemwi swe yano tulukululwa, ali maka yi Leesa.

¹⁹ Kuno chaandikwe: “Ndonona kumanya kwao aya kumanya, na mano yao aya mano nduyakana.”

²⁰ Uwa kumanya ali kwi? Kaandika ali kwi? Kapaazya wa manda ya kasalaka ali kwi? Chene! Leesa atachisile amano ya kumanya aya kuno ukunzi fino ukuzowengana?

²¹ Kuno uku mano yi Leesa, insi itamanyile Leesa uku mano yi yeneyo, Leesa wakasime ukufyusya yano yazumile, uku kusulwa kwiswi liyo lino lilusundwa.

²² Kuno aYudea yalusita ivilangizyo, na aGliki yalusita amano.

²³ Leelo swemwi tulusunda Klisto, wino wakonkomilwe apa nsalaba, aumolwa; uku aYudea cha kufwitosya nu ku akulukuwa icha uwele-wele.

²⁴ Leelo kuli yano yalwitwa, aYudea nanti aGliki, i Klisto amaka yi Leesa, na mano yi Leesa.

²⁵ Kuno ukuzowengana kwi Leesa kuli na mano nkani ukuluta aya antu, nu kutonta kwi Leesa kuli namaka nkani ukuluta antu.

²⁶ Kuno lolini ukwitwa kwino, yachane, fino yatavuzile aya mano ya mwili, aya maka yatavuzile, yatavuzile aya visumbi, yano yitwa.

²⁷ Leelo Leesa wasolwile ifintu viyungani ivya kuno ukunzi, kuti asekelisye aya mano, na kaili Leesa wasolwile yano yasi na maka ya kuno ukunzi, kuti asekelisye aya maka.

²⁸ Na kaili Leesa wasolwile ifintu fino visi na maka ivya kuno ukunzi, fino vyasulwa, endita, ifintu fino visiko, ukuti asule fino viliko.

²⁹ Uwa mwili wensi atize autensye pali Leesa.

³⁰ Leelo kuli Wenewe mwemwi mwazana ukuwa muli Klisto Yesu, wino wachisilwe kuli sweswe amano yano yafumile kuli Leesa, ni chumi nu swefu nu kuluzi.

³¹ Kuti chiwe, ndi fino chaandikwe: “Wino alutensya, autensye muli Leesa.”