तितुस 3 - Muria Far Western

येसुना लेहका ताकाट

¹ अनि सरकारि अदिकारिना अदिकारते मनिरक अनि ओरा आग्या मानेमायिरक अनि बोदे खरोय बुतो कियान साटि तेयार मनिरक इन्जोर विस्वासि लोकुरकुन आलिहचिम,

² अनि बोनांगे चाहळिंग वळकस बदनाम केमाकिरक, मति कोमल स्वभावतोर मन्दिला पहाजे अनि सबोय लोकुरासंग दरोज हजोर नम्रताते मिलेमास मनिर।

³ अनि माक वने येसु मसिन विस्वास कियानाता मुने निरबुद्धि, परमेस्वर अनि मानेयना आग्यानुंग मानेमायोम आन्दोम, असके माक खरोय हरितुन लेस मतोरोम अनि मन्दा पकाय खराब विचार अनि पाप कियानाता विचारता नियत्रणते मतोम अनि माक एका-मेका होंगते मतोम, हेवा किन्दोम, दुसरो लोकुरक माकुन होंग किन्दुरक अनि माक वने ओरकुन होंग किन्दोम।

⁴ असके पजा मावा पिसिहवाल परमेस्वरना दया अनि मया माक सबोय मानेयनिगा प्रगट आतु।

⁵ अनि मावा सोबाता बुतोते आयो; मति परमेस्वर मावागा दया किसुन मावा सबोय पापतुन नोरसितुर। अनि पवित्र आत्माते माकुन उन्दि पुनाल जनम अनि पुनाल जिवा हितोर।

⁶ अनि परमेस्वर मावा साटि पिसिहवाल येसु मसिना द्वारा मावागा पवित्र आत्मातुन पकाय हितोर।

⁷ अनि परमेस्वर मावागा दया किसुन माकुन निरदोष बनेहकितुर इन्जोर माक अनन्त जिवा पुटार इदाम पकाय हजोर आशा मन्ता।

⁸ अनि इव पोल्लोंग बोव नना मिकुन वेहान्तोना इव पोल्लोंग पकाय खरोय मन्तांग, इन्जोर विस्वासि लोकुरकुन इव पोल्लोंग डाटेह किसुन ओरकुन समजे किम। अनि बोर परमेस्वरतिगा विस्वास कितोर ओरकुन इव पोल्लोनुंग सोबाय बुतो कियान साटि मन लावेह किसोर मनिरक इन्जोर इव पोल्लोंग पकाय सोबाय मन्तांग अनि सबोय लोकुरकुन फायदातांग मन्तांग।

⁹ मति बेकारता पोल्लोंग अनि वारसाना बारेते ओरा विवादताल लक मन्ट अनि यहुदि नियमता बारेते विवाद किन्तोरक ओरा वने लक मन्ट अनि वाहचानाताल लक मन्ट, बाक्याकि इव सबोय पोल्लोंग बाताले फायदातांग हिलेंग अनि बाताले बुतोता वने हिलेंग।

¹⁰ अनि बोर मानेय मसिलोकुरा सभातुन बिगळे किया हुळान्तोर, ओन उन्दि-रन्ड बेरांग ओना गलतितुन समजेह किम अनि ओर समजेमायवेक ओना बारेते निमा वले वळकमा, अनि ओर मसिलोकुरा सभातुन बिगळे केमाकिर इन्जोर ओनाताल निमा अलग आम।

¹¹ अनि इदामनोर मानेय खरोय हरितुन हरचुन लेसकतोर अनि आपुना पाप किसुन आपुनतुन दोषि किन्तोर इन्जोर निमा पुन्तोन।

आकरिता पोल्लो

¹² अनि पजा नना अरतिमास या तुकिकुसिन नियाके लोहका ते निमा निकुपुलिस सहेरतिगा नावा हेरे वायाना कोसिस कियाकि, बाक्याकि अगा हन्जुन पुरा पिनिता महिना अगा मनका इन्जोर नना निर्णय कितोना।

¹³ अनि नियमतुन सोबाय करिहवालोर जेनास अनि अपुल्लोस इदाम तेयारि किसुन लोहकि, येरकुन हन्दान साटि बोदे चिजता कमि आयमाकि।

¹⁴ अनि ओरक सोबाय बुतो केविर इन्जोर निमा सबोयलोर विस्वासि लोकुरकुन करहा, बाक्याकि ओरक वरोन दुसरोना जरुरितुन पुरा केविर, अनि इदाम ओरक बिना फयदाते मनमाकिर।

¹⁵ अनि नावा संग मनवालोरक विस्वासि निकुन नमस्कार इन्तोर, अनि मावागा मया केवालोर विस्वासि लोकुरकुन नमस्कार किन्तोरोम। अनि नना वेहतोना अद सबोय पोल्लोतुन ओरकुन करहा अनि सोबाय समजेह किम। अनि मिया सबोय लोकुरकनिगा परमेस्वर दया केविर इन्जोर नना प्रार्थना किन्तोना। आमेन।