तितुस 1 - Muria Far Western

अभिवादन

¹ परमेस्वर आचतोरक ओर लोकुरकुन विस्वासते मजबुत कियान साटि अनि परमेस्वरना सबोय आग्यातुन पालन किस जिवेमायान साटि मदत किन्ता ओद खरोय पोल्लोतुन ओरकुन करहान साटि, इदेनते ओरकुन परमेस्वरनासंग अनन्त जिवन जिवेमायाना आशा पुटानसाटि प्रबु येसु मसि नाकुन निवळेकितुर।

² अनि इद दुनिया बनेमायानाता मुनेटाले बसकेय खोटाल वळकोर ओर परमेस्वर इद आशाता बारेता वाचा हितोर।

³ मति परमेस्वरना ठहरे किता अदे बेराते आपुना पोल्लो वेहानाता द्वारा ओर अनन्ता जिवनता ओद आशा प्रगट कितुर।

⁴ परमेस्वरना आग्याते इद सोबाता पोल्लो वेहाना साटि सोपेकिया, नना परमेस्वरनोर दास अनि येसु मसिना खास चेला पोलुस, उन्दिय परमेस्वरनिगा विस्वास किन्तोरिट इन्जोर नावोर खास मरि लेहका मन्तोर ओर तितुस साटि इद पत्र कोटान्तोना; मावोर परमेस्वर बाबाल अनि पिसिहवाल येसु मसि निकुन दया अनि शान्ति हेविर इन्जोर नना प्रार्थना किन्तोना।

समुद्र नडुमता क्रेता नाटेनिगा तितुसना बुतो

⁵ ते नना निकुन समुद्र नडुमता क्रेते नाटेना पिसताल बुतोतुन पुरा कियिला अनि नावा आग्या अनुसार नाट-नाटेनोर मसिलोकुरा सभाता मुक्याल लोकुरकुन आचकि इन्जोर निकुन क्रेते नाटेनिगा इरस वातान।

⁶ अनि बोरकुन निमा आचकि ओरक मसिलोकुरा सभाता मुक्याल लोकुरक निरदोष अनि उन्दि मुत्तेना मुजोहराल मनिर, ओनोर बालक प्रबुनिगा विस्वास केवालोरक मनिर, अनि ओरा बालक बोदे गलति हरिते हनवाल मनमाकिर अनि ओर अवाल-बाबो अनि मसिलोकुरा सभाता मुक्या लोकुरा पोल्लोता अधिनते मनवाल आयिर।

⁷ अनि मसिलोकुरा सभातोर अध्यक्षना कयदिगा परमेस्वरना सेवा सोपे कितोर, इन्जोर ओर निरदोष मनिर; घमन्ड केवाल आयमाकिर, ओर होंग केवाल आयमाकिर अनि दाळंगो उन्वाल आयमाकिर, अनि ओर वाहचमाकिर, खराब बुतो किसुन पयसांग कमेय केवाल आयमाकिर।

⁸ मति ओर अध्यक्ष वरताहकुन सोबाय गिरदाते मानेमायवाल अनि भला कियान साटि तेयार मन्वाल, मया केवाल, न्याय केवाल अनि समजे किसुन वेहवाल, ओना मन शुद्ध मनि अनि ओर शान्त स्वभावतोर मनिर।

⁹ अनि ओर खरोय करियनातुन उपदेश हिस प्रोत्साहन किया परिर, अनि बोर लोकुरक खरोय करिहनातुन होंग किन्तोर ओरा गलतितुन समजेहकिसुन ओरा वळकाना बन्द केवाल मनिर इन्जोर ओर माक करिहिता विस्वास योग्य पोल्लोता अनुसार स्थिर मनवाल पहाजे।

खोटाल करिहनाता विरुद चेतावनि

¹⁰ बाक्याकि पकाय लोकुरक खरोय करिहनातुन होंग किन्तोरक, ओरक आग्यातुन मानेमायोरक अनि पुकोट वळकवाल, अनि विशेषाल पिसाना साटि कतना जरुरि मन्ता इदाम करहान्तोर ओर लोकुरक दोखा हेवालोरक मन्तोरक।

¹¹ ते येरा टोडि बन्द किम! बाक्याकि येर लोकुरक खरोय करहाना हरचुन गलति पोल्लो करहान्तोर अनि दुसरोना परिवारता विस्वासतुन नाश किसिन्तोर, अनि पयसांग कमेय कियान साटि ओरक गलति पोल्लोतुन करहान्तोरक।

¹² अनि ओरिगाडाले वरोर दिमाक वाले मानेय इदाम इन्तोर, “क्रेते नाटेनिगा मन्वालोर लोकुरा खोटाल वळकानाता आदत मन्ता अनि क्रूर जानवर लेहका अनि ओरक पकाय लेहळालोर अनि कोळहि मन्तोरक।”

¹³ अनि इद गवाहि खरोय आन्दु; इन्जोर अव गलति आन्दुंग इन्जोर ओरकुन रांगसुन वेहा। अनि इदाम ओरकुन विस्वासते पका किम,

¹⁴ अनि यहुदि लोकुरांग बनेहकितांग पिटोनिगा अनि परमेस्वरना खरोय वाचातुन मानेमायान साटि इन्कार किन्तोर ओरा द्वारा बनेहकितांग नियमतिगा मन लावेह केमाकिर इन्जोर ओरकुन डाटेह किम।

¹⁵ अनि बोर लोकुरा मन शुद्ध मन्ता ओरा साटि सबोय शुद्ध मन्ता। मति बोर येसुनिगा विस्वास केवोर अनि मन खराब बुतो ते निन्दिता मन्ता ओरा साटि बोदे शुद्ध हिले, बाक्याकि ओरा मन पापता विचारते निन्दिता अनि ओरक पाप किन्तोर असके ओरक लज्जातुन अनि दोषितुन समजेमायोर।

¹⁶ मति माक परमेस्वरदुन पुन्तोरोम इन्जोर ओरक इन्तोर, मति ओरक आपुना बुतोते परमेस्वरना आग्यातुन मानेमायोर अनि परमेस्वरतुन मानेमायोर इन्जोर परमेस्वर ओरकुन विरोद किन्तोर, अनि ओरक बोदे सोबाता बुतोतुन किया परोर।