रोमि 9 - Muria Far Western

परमेस्वर आपुना योजनाता अनुसार आपुना लोकुरकुन आचान्तोर

¹ नना मसिना संबन्दते मन्तोना इन्जोर नना खोटाल वळकोन मति खरोय वळकान्तोना।

² नाकुन पकाय दुःख लागान्ता अनि नावा मन्दुन दरोज तकलिप आन्ता इन्जोर नावा मन्दा विचार पवित्र आत्मातासंग उन्दि आस नाकुन गवाहि हिन्ता।

³ बाक्याकि नावोर प्रिय बायि-दादालोरक परमेस्वरताल लक आतोर आपुना वंशतोर लोकुरकुन परमेस्वरना हेरे ततान साटि नना मसिहाताल अलग आस परमेस्वरना सराप आयिका इन्जोर वने नना विचार किन्तोना।

⁴ ओरक इस्रायेल लोकुरक आन्दुरक अनि परमेस्वर ओरकुन आपुना बालपोस मरक आयान साटि आचतोर। अनि ओर बचोन माहान मन्तोर इद ओरकुन तोहतोर अनि ओरासंग करारक कितुर। अनि ओर ओरकुन मूसाना द्वारा नियम हिस आरादना बदाम कियाला पहाजे इन्जोर ओरकुन करिहतुर अनि ओरकुन वाचावने हितोर।

⁵ अनि ओर अब्रहाम, इसहाक अनि याकुब इदाम पुरकातोरक ओरा बाबो-दादिलोरक मन्तोरक। अनि ओरागागडाले मसिहाल मानेय आस जनम आतुर, ओर सबोयनोर परमेस्वर आस सबोयना पोरो राज किन्तोर अनि ओना स्तुति सबोय काळते आयिला पहाजे! आमिन।

⁶ मति परमेस्वर हिस मतोर ओद पोल्लो पुरा किया परोर आतुर इदाम आयो। इस्रायेल वंशतोर सबोय लोकुरकुन परमेस्वर आचोर।

⁷ अनि बोर अब्रहामना वंशते जनम आतुर ओरागडाल सबोय लोकुरक अब्रहामनोर खरोय सन्तान वने आयोर; मति “केवल इसहाकना पिळिते जनम आयनुर ओरकुने नियोर सन्तान इन्दानुर” इन्जोर परमेस्वर इतोर।

⁸ इदेना अर्थ इदाम मन्ता: अब्रहामना पिळिताल जनम आतोरिगाडाल सबोय लोकुरक परमेस्वरनोर सन्तान आयोर। मति परमेस्वरना वाचाता अनुसार अब्रहामना पिळिताल जनम आतोर ओरकुने खरोय सन्तानता रुपते मानेमातोरक।

⁹ बाक्याकि “ठहरेकिता बेरा नना मलस वायका असके सारा उन्दि पेकान जनम हिस मन्दार इन्जोर अब्रहामिन परमेस्वर वाचा हिस मतोर।”

¹⁰ अचोने आयो ओर पेकाल मावोर पुरकातोर इसहाक मतोर, अनि ओर रिबेकानासंग मरमिंग कितुर अनि रिबेका गर्बवति आस जुळवा पेकोरकुन जनम हितु।

¹¹ अनि ओरक पेकोरा जनम आयानाता मुने अनि ओर बारायि खराब गलति कियानाता मुनेय परमेस्वरना आचानाता उदेश बोनाय मानेयना बुतोता कारणते आयो मति ओना योजना पुरा कियान साटि ओना इच्चाते कारण इदाम आयान साटि,

¹² “नियोर हुडलोर मरि हजोर मरिना पोरो राज कियानुर” इन्जोर परमेस्वर अदेन वेहच मतोर।

¹³ अनि “नना याकुबिन मया कितान मति एसावितुन स्विकार केवोन” इद वने पवित्र पुस्तकतिगा कोटतोर।

¹⁴ ते माक इदेना बारेते बाताल इन्काट? परमेस्वर खरोय न्याय केवोर इदाम माक इन्काट बहे? बसकेय आयो!

¹⁵ बाक्याकि, “नाकुन बोन दया कियाना इच्चा मन्ता ओनिगा दया कियाका। अनि नाकुन बोन दया कियाना इच्चा मन्ता ओनिगा दया कियाका” इदाम परमेस्वर मूसान इतुर।

¹⁶ इन्जोर साटि मानेयना इच्चाता अनुसार या ओना पकाय कोसिसता द्वारा परमेस्वर ओन आचोर। मति दया किन्तोर आपुना इच्चाते अनुसार ओर बोरे मानेयतुन आचान्तोर।

¹⁷ “नियागा नावा लाव तोहका अनि इदेना द्वारा दरतितोर सबोय लोकुरक नावा बारेते पुन्दाना साटि नना निकुन राजाल बनेकितान” इन्जोर पवित्र पुस्तक मिस्रि देशतोर राजान इतुर।

¹⁸ इन्जोर बोन दया कियाना परमेस्वरना इच्चा मन्ता ओन परमेस्वर दया किन्तोर अनि बोना मन कटोर कियाना ओना इच्चा मन्ता ओना मन परमेस्वर कटोर किसिन्तोर।

परमेस्वरना होंग अनि दया

¹⁹ इन्जोर परमेस्वर सबोय आयि ओना इच्चाता अनुसार किन्तोर ते पजा ओर माकुन दोष बाक्या हिन्तोर इदाम बोराय नाकुन इन परान्तोर? बोरायि ओना इच्चाता विरोदते हन्दिला परोर।

²⁰ मति परमेस्वरतुन विरोद किस उत्तर हेवालोर केवल मानेय निमाट बोर आन्दिट? निमा नाकुन इदाम बाक्या बनेकिति इन्जोर उन्दि अळका आपुना बनेकेवालतुन बसकेय पुच्चेमाय परान्ता बहे?

²¹ बाक्याकि अळका बनेकेवाल आपुना इच्चाता अनुसार उन्दिय गोला तोळियते उन्दि अळका खास आदरता बुतो साटि अनि बोदायि बुतो साटि बनेकियाना अदिकार ओन मन्ता ते इगा बोद आश्चरयता पोल्लो मन्ता?

²² अदामे परमेस्वर होंग कियाना अनि आपुना लाव तोहाना अदिकार मन्ता। मति परमेस्वरना होंग किस बोरकुन नाश कियान साटि आचतोर ओरकुन परमेस्वर दिरजते सहेमास ओर लोकुरकुन दया किन्तोर।

²³ अनि आपुना हजोर महिमातिगा सहभागि बनेकियान साटि परमेस्वर मुनेटाले तयार कितोर लोकुरकुन वने ओर बचोन महान मन्तोर इन्जोर तोहान साटि,

²⁴ ओर आचतोर ओरिगा केवल यहुदिलोकुरक आयो मति माक यहुदि आयोर लोकुरक वने मन्तोरोम।

²⁵ अनि “नावोर लोकुरक हिले आसि ओर लोकुरकुन नना आपुना लोकुरक इन्का। अनि नना मुने मया केवोन आन्दान ओर लोकुरकुन इदेक नना मया कियाका”

²⁶ अनि “निमाट नावोर लोकुरक आयविट इन्जोर बगा परमेस्वर ओरकुन इन्ज मतोर अगाय ओरक जिवित परमेस्वरना सन्तान इन्दानुरक” इदाम यहुदि आयोर लोकुरा बारेते परमेस्वरना पोल्लो वेहवाल होशेयाना पुस्तकतिगा इन्तोर।

²⁷ अनि “इस्रायेल लोकुरा संख्या समुद्रता वारु इचोन मनि ते वने ओरागडाल हुचुलोर लोकुरे पिसानुरक।

²⁸ दुनियाता सबोय लोकुरा न्याय कियाना पोल्लो प्रबु हितोर अद न्यायतुन ओर सान्डेय पुरा कियानुर” इन्जोर परमेस्वरना पोल्लो वेहवाल यशायाह इस्रायेल लोकुरा बारेते जोरदे इन्तोर।

²⁹ अनि “सबोयताल लाव वाले प्रबु मावोर बालकुन मावा साटि इरोर आस मनेर ते माक सदोम अनि अमोरा सहेरता लोकुरक लेहका आस मनेरोम” इन्जोर येरा बारेते परमेस्वरना पोल्लो वेहवाल यशायाह वने मुने इतोर।

विस्वासता द्वारा परमेस्वरना मुने येताना योग्य ठहरे माय परान्तोरोम

³⁰ ते माक बाताल इन्काट? परमेस्वरना मुने येताना योग्य बनेमायाना कोसिस केवोर यहुदि आयोर लोकुरक मसिनिगा विस्वास इरतुरक इन्जोर परमेस्वरना मुने येताना योग्य ठहरे मातुरक।

³¹ अनि इस्रायेल लोकुरक आपुनतुन परमेस्वरना मुने येताना योग्य ठहरे मायान साटि मूसाना नियमता पालन किन्दुरक मति ओरक परमेस्वरना मुने येताना योग्य ठहरे माय परोर आतुरक।

³² इदाम बाक्या आतु? परमेस्वरना मुने येताना योग्य ठहरे मायान साटि मसिनिगा विस्वास कियाना ओरा विस्वास हिले आसि। मति नियमता पालन किस परमेस्वरना मुने येताना योग्य ठहरे मायान साटि ओरक कोसिस कितुरक। मसिहाल उन्दि कल लेहका मन्तोर। अनि ओनिगा विस्वास कियाना ओरक इस्रायेल लोकुरा इच्चा हिले आसि इन्जोर ओद कलतुन कोदोर हिस मुटाना लेहका ओरक आतुरक।

³³ अनि “हुळाट! नना येरुसलेमता सियोनतिगा उन्दि कल इरान्तोना अदेनते पकाय लोकुरक कोदोर हिस ओरक मुटानुरक। अनि अदेनिगा विस्वास कियानुरक ओरक बसकेय लज्जा आयोर आयनुरक” इन्जोर परमेस्वरना पोल्लोतिगा कोटता मन्ता अदेना अनुसार आतु।