रोमि 8 - Muria Far Western

पवित्र आत्माता लावदे मावा जिवन

¹ इन्जोर इदेक बोर येसु मसिनिगा विस्वास किन्तोर ओरकुन बोदे दन्ड साटि न्याय हिले। बाक्याकि ओरक पाप स्वभावता अनुसार आयो मति पवित्र आत्माता अनुसार ताकान्तोरक।

² येसु मसि हिन्तोर ओर पवित्र आत्मा माकुन जिवन हिन्तोर। ओर पवित्र आत्मा मिकुन पापता अदिकारताल अनि पापता द्वारा वान्ता हायानाता योग्य दन्डताल स्वतन्त्र किन्तोर।

³ मूसाना नियम माकुन मुक्ति हिया परो बाक्याकि मावागा पाप कियाना इच्चा किस मावागा पाप अदिकार किसोर मता इन्जोर नियमतुन पालन किया परो आतोम। इन्जोर परमेस्वर आपुना मरि येसु मसिन माक पाप केवाल मानेयना मेन्दुलता रुपते मानेयना पापता बलिदान साटि दुनियातिगा लोहतुर। इदाम येसु मसिना मेन्दुलता बलिदानता द्वारा मानेयकनिगा मता ओद पापता अदिकारतुन परमेस्वर मसिना मानेयना रूपता ओदे मेन्दुलतिगाय न्याय किस बन्द कितुर।

⁴ माक इदेक पाप स्वभावता इच्चाता अनुसार आयो मति इदेक परमेस्वरना नियम पुरा आयान साटि पवित्र आत्माता अनुसार जिवित मन्तोरोम।

⁵ बाक्याकि आपुना पापि स्वभावता अनुसार जिवे मान्तोरक ओर लोकुरक पापि स्वभावता इच्चातुन पुरा कियान साटि विचार किन्तोरक। मति पवित्र आत्माता अनुसार जिवे मान्तोरक ओर लोकुरक पवित्र आत्मा इच्चा किन्ता ओद पोल्लोंग कियान साटि विचार किन्तोरक।

⁶ पापता इच्चातिगा मन लावेकियाकिट ते हायानाता योग्य दन्ड पुटार मति पवित्र आत्माता अनुसार जिवेमायकिट ते जिवन अनि शान्ति पुटार।

⁷ पापि स्वभावता अनुसार जिवे मान्तोरक ओर लोकुरक परमेस्वरना दुश्मन मन्दानुरक बाक्याकि ओरक परमेस्वरना नियमता अदिकारते मनोरक अनि परमेस्वरना नियमता अदिकारते मन परोरक।

⁸ अनि पापि स्वभावता अदिकारते जिवे मान्तोरक ओर लोकुरक परमेस्वरतुन बसकेय गिरदा किया परोरक।

⁹ मियागा परमेस्वरना आत्मा मन्ता इन्जोर निमाट पापि स्वभावता अदिकारते हिलविट मति पवित्र आत्माता अदिकारते मन्तोरिट। मसिना आत्मा हिले ते ओरक मसिना लोकुरक आयोरक।

¹⁰ अनि मसि मियागा मन्तोर ते मेन्दुल पापता कारण हायार मति निमाट परमेस्वरना मुने येताना योग्य मन्तोर इन्जोर मिया आत्मा अनन्त जिवनते मन्दार।

¹¹ अनि येसु मसिन हातोरिगाडाल असा जिवेहकिस मता परमेस्वरना आत्मा मियागा मन्ता ते ओर परमेस्वर पवित्र आत्माता लावते मिकुन हातोरिगाडाल असा जितो कियानुर।

¹² इन्जोर हे बायि-दादालोरक, माकुन इद पाप स्वभावता इच्चाता अनुसार जिवन जिवेमायो आयकोम इदाम मावा कर्तव्य मन्ता।

¹³ बाक्याकि निमाट पापि मेन्दुलता इच्चाता अनुसार जिवेमायकिट ते हायानाता योग्य दन्ड पुटार मति निमाट पवित्र आत्माता द्वारा मेन्दुलता इच्चातुन जिकिकिट ते अनन्त जिवन्ते मनकिट।

¹⁴ परमेस्वरना आत्माता इच्चा अनुसार ताकान्तोरक ओर लोकुरक परमेस्वरनोर मरि आन्दुरक।

¹⁵ बाक्याकि मिकुन पुटता ओर पवित्र आत्मा मिकुन असा दन्ड पुटार इदाम वरहान साटि मिकुन पापता दास बनेकेवो मति ओर पवित्र आत्मा मिकुन परमेस्वरना बालपोस मरि बनेकिन्तोर। अदेनते माक “हे आब्बा, हे बाबो” इन्जोर इन्तोराट।

¹⁶ माक परमेस्वतोर मरि आन्दोम इन्जोर ओर पवित्र आत्मा मावा आत्मातासंग मिलेमास गवाहि हिन्ता।

¹⁷ अनि माक ओना मरक आन्दोम ते वारिस वने आन्दोम, अनि माक मसिनासंग परमेस्वरनोर वारिस मन्तोम; अनि परमेस्वरना महिमाता सहभागि आयाना मन्ता ते ओनासंग दुःखता वने सहभाहि आयिला पहाजे।

परमेस्वरनोर मरकनिगा वायवाल मुनेटा काळते दिसार ओद महिमा

¹⁸ वायार ओद मुनेटा काळते मावागा दिसार ओद महिमाता मुने इद बेराता दुःख अनि पकाय तकलिप बारायि हिले इदाम नना समजेमान्तोना।

¹⁹ बसके परमेस्वर खरोय आपुना मरक बोरक आन्दुर इद प्रगट किहानुर ओद दिया साटि इद सृष्टि पकाय आशाते हर हुळिला आता।

^20-21 बाक्याकि सृष्टि परमेस्वर बनेकिता आपुना सोबाता उदेशतुन पुरा किया परो आत; आपुना इच्चाते या आपुना बुतोता गलतिते आयो मति परमेस्वरना योजनाता अनुसार अदाम आत। सृष्टि परमेस्वर बेनेकिता आपुना उदेश पुराकिया परो आतु ते वने उन्दि दिया आपुना नाश आयाना शरापताल लेहचियाना पुटिहच परमेस्वरनोर मरकनासंग भाग्यते स्वतन्त्रताता गिरदा कियानुर इन्जोर सबोय सृष्टि आशा किन्दु।

²² उन्दि आळ नुनान जनम हियानपा अदेन पकाय नोमुर आन्ता अदाम लेहका इद सबोय सृष्टि पकाय नोमुरुते नेन्डवनाह तळपेमास मन्ता इन्जोर माक पुन्तोराट।

²³ अनि केवल इद सृष्टि आयो मति परमेस्वरताल मुने वरदान आस पवित्र आत्मातुन पुटता माक वने आपुना मेन्दुलतुन पिसान साटि मन्जे ओना बालपोस मरक आयान साटि किलसोर हर हुळसोर मन्तोरोम।

²⁴ परमेस्वरताल माकुन मुक्ति पुटतु असके माक इद आशा पुटतु। मति माक बोद आशा किन्तोरोम अदेन हुळान्तोरोम ते ओद आशा मनो आन्ता। बाक्याकि बोद चिजतुन बोरे हुळिला आतोर अदेना आशा बाक्या कियानुर?

²⁵ मति बोद चिजतुन माक हुळोम अदेना स्विकार कियान साटि आशा किन्तोरोम ते हिमते सहेमास ओद आशिषसाटि हर हुळसोर मन्तोरोम।

²⁶ इद रितिते पवित्र आत्मा वने मावा कमजोरितिगा मदत किन्ता। प्रार्थना बोद रितिते कियाला पहाजे इन्जोर माक पुनोम मति माक वळकानपा बोव पोल्लोंग मावा बोलिते पसियला परो ओद कनावेमायाना लेंगता द्वारा मावा साटि पवित्र आत्मा विनन्ति किन्ता।

²⁷ मावा सबोय लोकुरा मन्दा इच्चातुन पुन्तोर ओर परमेस्वर पवित्र आत्मा बाताल प्रार्थना किन्तोर इन्जोर पुन्तोर बाक्याकि पवित्र आत्मा परमेस्वरना इच्चाता अनुसार परमेस्वरना पवित्र लोकुरक साटि विनन्ति किन्तोर।

²⁸ अनि परमेस्वरतुन मया किन्तोरक अनि बोर ओना योजनाता अनुसार केयतोर मन्तोर ओर लोकुरक साटि सबोय पोल्लोंग मिलेमास भलायितुने उत्पन्न किन्तोर इदाम माक पुन्तोरोम।

²⁹ परमेस्वर मुनेटाल आचतोर ओर लोकुरकुन आपुना मरि येसु मसि पकाय हेलाळ तमोहनिगा सबोयताल हजोर तमो आयिर इन्जोर आपुना मरिना स्वरुपता लेहका आयान साटि मुनेटाले ठहरे कितुर।

³⁰ अनि मुनेटाले आचतुर ओर लोकुरकुन ओर केयतुर, अनि ओर केयतुर ओर लोकुरकुन परमेस्वरना येताना योग्य बनेकितुर, अनि परमेस्वरना येताना योग्य बनेकितुर ओर लोकुरकुन ओर आपुना महिमा वने हितोर।

बोवे पोल्लोंग परमेस्वरना मयाताल माकुन लक किया परो

³¹ ते इद सबोय पोल्लोता बारेते माक बाताल इन्काट? परमेस्वर मावा बासा मन्तोर ते मावा विरोद ते बोर आय परान्तोर?

³² परमेस्वर आपुना मरिन वने पिसिहच इरोर आस माक सबोय लोकुर साटि बलिदान कियालाय सोपे कितोर ते ओर परमेस्वर मावा योजना किता सबोय पोल्लोंग बाक्या माकुन पकायि हेवोर आयनुर बहे?

³³ परमेस्वर आचुन आपुना मुने येताना योग्य बने किन्तोर ते बोर ओर लोकुरकुन दोष लावे कियानुर?

³⁴ पजा बोर ओरकुन दोषि ठहरे किया परान्तोर? इदाम बोरे हिलेर! बाक्याकि येसु मसि मावा साटि हातुर। इंगो, ओर हातोरिगाडाल असा जिवेमातुर अनि परमेस्वरना तिन्दान कय बासा उदितोर अनि परमेस्वरना मुने मावा साटि विनन्ति वने किन्तोर।

³⁵ मसिना मयाताल माकुन बोर अलग कियानुर? बाताल पकाय तकलिप या सन्कट, बाताले तिन्दाना हिले या संन्दरांग हिलेंग, दोखा या बोरे हव्काना साटि वरहान्तोर ते वने इदाम बोवे पोल्लोंगते येसु मसिना मयाते माकुन अलग किया परोरक।

³⁶ “निया कारण सबोय दिया माकुन हायानातुन सोपे किन्तोर, असकान्तोर ओव बेळांग लेहका माकुन ओर समजेमान्तोर” इन्जोर पवित्र पुस्तकतिगा कोटता मन्ता।

³⁷ ते वने माकुन मया किन्तोर ओर मसिना द्वारा इव सबोय पोल्लोतिगा माक उन्दि हजोर विजयि पुटहिला आतोरोम।

³⁸ बाक्याकि हायाना आयो अनि जिवन आयो, स्वरगदूत आयो अनि राज केवाल दुष्टात्मा आयो, वर्तमानता अनि भविष्यता बोवे पोल्लोंग आयो, दरतिता पोरोडा अनि दरतिता अडियता बोवे आत्मिक लाव आयो, इदाम बोवे सृष्टितुन,

³⁹ मावोर प्रबु येसुनिगा मन्ता परमेस्वरना मयाताल माकुन अलग किया परोर इन्जोर नना खरोय पुन्तोना।