रोमि 5 - Muria Far Western

परमेस्वरना येताना योग्य मन्जे बाताल मन्ता

¹ इन्जोर माक आपुना विस्वासता कारण परमेस्वर साटि येताना योग्य ठहरे मास मावोर प्रबु येसु मसिना द्वारा मावोर परमेस्वरनासंग सोबाय संबन्द आतु।

² मावोर प्रबु येसु मसिना द्वारा विस्वासता कारण परमेस्वरना दयाते माक इदेक मन्तोरोम ओद दयातिगा माक हतोम अनि माक परमेस्वरना महिमातिगा सहभागि आयकोम इन्जोर आशाते पकायि गिरदा किन्तोरोम।

³ इचोन वने आयो, विस्वासता कारणता पकाय तकलिप सहेनकियाना तोहान साटि मदत किन्ता। अनि सहेनकियानाता कारण परमेस्वरिन येताना योग्य मन्ता चरित्र पसिन्ता। अनि ओद चरित्रताल आशा जनम आता इदाम समजेमास,

⁴ माक आपुना पकाय तकलिपते वने पकायि गिरदा किन्तोरोम।

⁵ अनि आशा माकुन बसकेय लज्जा आयिला हेवो बाक्याकि परमेस्वर माकुन पवित्र आत्मा हितोर अनि ओर पवित्र आत्माता द्वारा परमेस्वरना मया मावा मन्दिगा पकाय हितोर।

⁶ माक कमजोरे मतोम ते वने मसि परमेस्वर ठहरे किता बेराते, माक परमेस्वरना विरोदते ताकवाल पापि लोकुरक साटि, आपुनतुन बलिदान हितुर।

⁷ मूसाना नियमतुन बराबर पालन केवाल साटि बोरे मानेय हायाना पकाय कमि मन्ता मति सोबाय मानेय साटि बोरे आपुना जिवा हियानाता हिमतते विचार किया परान्तोर।

⁸ मति माक पापिये मतोम ते वने मसि मावा साटि आपुना जिवा हितुर इदाम परमेस्वर मावा साटि आपुना मायातुन तोहतुर।

⁹ इन्जोर इदेक माक मसिना नतुरता कारण परमेस्वरना मुने येताना योग्य आतोम ते इदेक ओना द्वारा परमेस्वरना होंगते मन्ता ओद दन्डताल जरुर पिचिहकोम।

¹⁰ बाक्याकि माक परमेस्वरना वेयरि मन्दानपा ओना मरिना हायानाता कारण माकुन असा परमेस्वरनासंग गोतियाह बनेहकितुर। इदेक माक परमेस्वरना गोतियाह मन्तोरोम ते मसिना जिवनता कारणते माक पिसाना पुटार इन्जोर जरुरि मन्ता।

¹¹ इचोने आयो, माकुन परमेस्वरनासंग सोबाय संबन्द असा पुटाना कारण मन्तोर मावोर प्रबु येसु मसिना द्वारा माक परमेस्वरना मुने पकायि गिरदा किन्तोरोम।

आदम पोरोयतोर मानेयना द्वारा हायाना, मसिना द्वारा जिवन

¹² इन्जोर आदम पोरोयतोर वरोर मानेयना द्वारा पाप दुनियातिगा वातु अनि पापता द्वारा हायाना दुनियातिगा वातु। इदाम सबोय लोकुरक पाप कितोरक इन्जोर हायाना सबोय मानेयनिगा फयलेमातु।

¹³ बाक्याकि परमेस्वर मूसान नियम हियानाता मुने वने पाप इद दुनियातिगा मता, मति बोदे नियम हिले ते बोने पापि इन्जोर ठहरे केवोर।

¹⁴ आदमना लेहका परमेस्वरना नियमतुन पालन केवोर आयोर ते वने आदमताल मूसालवनाह हायाना दुनियाता सबोय लोकुरकनिगा अदिकार कितुर। आदम वायवाल मसिना चिन्ह मन्ता।

¹⁵ मति आदम परमेस्वरना नियम पालन केवोर आतुर ओद पाप अनि परमेस्वरना दयाता वरदान ओव रन्ड पोल्लो पकाय फरक मन्ता। वरोर मानेय मन्जे आदम परमेस्वरना नियम पालन केवोर आतुर अदेना कारण पकाय लोकुरक हायानाता दन्ड पुटिहतोरक। मति वरोर मानेय येसु मसिना दयाता कारण पुटता परमेस्वरना दया अनि वरदान सबोय लोकुरा भलायि साटि इदेनताल बचोन पकाय मन्ता।

¹⁶ अनि वरोर मानेय आदमना पापता कारण तता काया लेहका आयो परमेस्वरना इद वरदान; वरोर मान परमेस्वरना नियम पालन केवोर आतुर ओद हायानाता दन्डता आग्या हियान कारण आतु। मति परमेस्वरना ओद वरदान माक पकाय बेरा पाप कितोम ते वने पजा मावा पापता मापि किस परमेस्वरना मुने माकुन येताना योग्य बनेकियाना कारण आत।

¹⁷ बाक्याकि बसके वरोर मानेयना अर्थ आदम परमेस्वरना नियम पालन केवोर आतुर अदेना कारण हायाना सबोय लोकुरकनिगा राज कितुर ते दया अनि परमेस्वरना मुने येताना योग्य आयाना वरदान पकाय पुटाहन्तोर ओर लोकुरक वरोर मानेयना अर्थ येसु मसिना द्वारा हायानाता अनि पापता पोरो विजय आस राजाह लेहका जरुर जिवेमायनुर।

¹⁸ इन्जोर आदम पोरोयतोर वरोर मानेय परमेस्वरना नियमतुन उन्दिय बेरा मानेमायोर आतुर, इद सबोय मानेय साटि दन्डता कारण आतु अदामे मसिना उन्दि दरमता बुतोते सबोय मानेय परमेस्वरना मुने येताना योग्य ठहरे मास अनन्त जिवनता कारण आतु।

¹⁹ वरोर मानेय परमेस्वरना नियम मानेमायोर इन्जोर बदाम पकाय लोकुरक पापि ठहरे मातुरक अदामे वरोर मानेय परमेस्वरना नियम मानेमायानाते पकाय लोकुरक परमेस्वरना मुने येताना योग्य ठहरे मायनुरक।

²⁰ मूसाना नियम वातु इन्जोर लोकुरक परमेस्वरना नियम पालन केवोर इन्जोर सबोय लोकुरकुन सोबाय समजेमातुरक। मति बगा परमेस्वरना नियम पालन केवो आयाना पकाय आतुंग अगा परमेस्वरना दया वने पकाय आतु।

²¹ अदाम पाप हायानाता द्वारा लोकुरा पोरो बदाम राज कितु अदामे परमेस्वरना दयाते मावोर प्रबु येसु मसिना विस्वासता कारण परमेस्वरना मुने येताना योग्य बनेमास अनन्त जिवनतिके ओयान साटि राज केविर इन्जोर।